«تومەنگى تەمپەراتۋرالى جارىقشاقتانۋ كەزىندە اسفالتبەتوندى جول توسەمىنىڭ ءوزىن-وزى قۇرۋ زاڭدىلىعى» اتتى عىلىمي ەڭبەگى ءۇشىن قازاق عالىمى باعدات تەلتايەۆ التىن مەدال الدى. بۇل تۋرالى «قامشى» پورتالى قازاقستان جول عىلىمي زەرتتەۋ ينستيتۋتى تاراتقان اقپاراتقا سىلتەمە جاساپ حابارلايدى.
ينستيتۋتتىڭ جەتەكشىسى، «قازجولعزي» اق پرەزيدەنتى، تەحنيكا عىلىمدارىنىڭ دوكتورى، پروفەسسور، ۇلتتىق عىلىم اكادەمياسىنىڭ قۇرمەتتى مۇشەسى، قازاقستان رەسپۋبليكاسى ۇلتتىق ينجەنەرلەر اكادەمياسىنىڭ جانە حالىقارالىق كولىك اكادەمياسىنىڭ اكادەميگى، تمد جانە قازاقستاننىڭ قۇرمەتتى جولشىسى باعدات بۇرحانباي ۇلى تەلتايەۆ رەسەي جاراتىلىستانۋ عىلىمدارى اكادەمياسى ءتورالقاسىنىڭ شەشىمىمەن كورنەكتى ورىس فيزيگى، نوبەل سىيلىعىنىڭ لاۋرەاتى پەتر كاپيسا اتىنداعى التىن مەدالمەن ماراپاتتالدى. باعدات بۇرحانباي ۇلى بۇل جوعارى ماراپاتقا «تومەنگى تەمپەراتۋرالى جارىقشاقتانۋ كەزىندە اسفالتبەتوندى جول توسەمىنىڭ ءوزىن-وزى قۇرۋ زاڭدىلىعى» اتتى عىلىمي ەڭبەگى ءۇشىن يە بولىپ وتىر. بۇل عىلىمي جاڭالىق اۆتوموبيل جولدارى سالاسىنداعى ەڭ العاشقى عىلىمي جاڭالىق بولىپ سانالادى. ب.تەلتايەۆتىڭ جاڭالىعىندا تەرموديناميكانىڭ قايتىمسىز ءۇردىسى مەن سينەرگەتيكا نەگىزىندە تەمپەراتۋرالىق جارىقشاقتارى بار اسفالتبەتون جول جامىلعىسى، تەرموديناميكالىق جۇيەنىڭ سىرتقى اسەرلەرگە بەيىمدەلۋىنىڭ ءتۇرى بولىپ كەلەتىن ەرەكشە ديسسپاتيۆتىك قۇرىلىم ەكەندىگى دالەلدەنگەن. اتالمىش زاڭدىلىق، سونداي-اق، جارىقشاقتار سانىن الدىن الا بولجاۋعا جانە ءارتۇرلى اۋا رايى مەن كليماتتىق جاعدايدا اسفالبەتون قۇرامىن تاڭداۋ ارقىلى جارىقشاقتار سانىن كەمىتەتىن جوبالار جاساۋعا مۇمكىندىك بەرەدى.
بۇگىن وسى جاڭالىققا وراي قازاقستان جولدارى عىلىمي زەرتتەۋ ينستيتۋتى اق باسپا ءسوز ءماسليحاتىن وتكىزبەك. وندا جول سالاسىنىڭ ماماندارى عالىمنىڭ عىلىمي جاڭالىعىن جان-جاقتى تالقىلاپ، وزدەرىنىڭ وي-پىكىرلەرىمەن بولىسەتىن بولادى.
پىكىر قالدىرۋ