قىتايداعى ونەرتاپقىش قانداسىمىز ەركىنبەك مۇحتاربەك ۇلى ەكسپو-2017 كورمەسىنە قاراي ءوزى جاساعان، قازاقي ۇلگىدەگى اۋە شارمەن شانحايدان استانا قالاسىنا ۇشىپ كەلمەك. سۇحباتىندا ول، قىتايدىڭ شانحاي قالاسىنان شىعىپ، جىبەك جولى بويىمەن ءجۇرىپ ءوتىپ، استانا قالاسىنا ات باسىن تىرەۋدى كوزدەپ وتىرعانىن ءمالىم ەتتى.

«بۇل مەنىڭ قازاقستاندا وتەتىن «ەكسپو-2017» حالىقارالىق كورمەسىنە دايىنداپ جاتقان تارتۋىم دەپ بىلەمىن. اللا بۇيىرسا، قىتايدىڭ شانحاي قالاسىنان شىعىپ، جىبەك جولى بويىمەن ءجۇرىپ ءوتىپ، استانا قالاسىنا ات باسىن تىرەۋدى جوسپارلاپ وتىرمىن. سول ارقىلى ەكى ەلدىڭ دوستىعىن نىعايتىپ، استانادا وتەتىن «ەكسپو-2017» كورمەسىنىڭ ناسيحاتتالۋىنا از دا بولسا ۇلەسىمدى قوسۋ»، - دەيدى ەركىنبەك مۇحتاربەك ۇلى.

ونىڭ ايتۋىنشا، قازىرگى كۇنى اۋەشارمەن ۇشىپ ءوتۋ باعدارى، جولدا ايالداۋ ماسەلەسى پىسىقتالىپ جاتىر. سونىمەن بىرگە ول ەكى ەلدىڭ دوستىعىن جاڭعىرتىپ، ەكسپو-2017 كورمەسىن ناسيحاتتاۋدى ماقسات ەتىپ وتىرعانىن ايتتى. «بۇل جوبانى جاساۋعا كوپتەگەن جىلدار جۇمسادىم. مىنە ساتىمەن ءبىتىپ، سىناقتان وتكىزدىم. مەنىڭ باستى ماقساتىم - قازاقتىڭ ونەرىن، بولمىسىن الەمگە پاش ەتۋ. قازاق ەجەلدەن باس كيىمدى جانە تۇلپاردى قادىرلەگەن حالىق سول سەبەپتى دە اۋەشاردىڭ بەينەسىن قازاقتىڭ ويۋلى باس كيىمىنە ۇقساتىپ جوبالادىم. ول ۇلكەن بيىكتىككە كوتەرىلگەندە ءبىزدىڭ باس كيىمدى جەردەگى بۇكىل حالىق كيگەندەي بولادى. بۇل - بەرەكە-بىرلىكتىڭ كورىنىسى. شاردىڭ استىندا تۇلپاردىڭ ءمۇسىنى بەينەلەنىپ، ادام وتىراتىن ورىن جاسالعان. اسپان كەڭىستىگىنە كوتەرىلگەندە، تۇلپارعا ءمىنىپ قازاقتىڭ قاس باتىرى ۇشىپ كەلە جاتقانداي اسەر قالدىرادى»، دەيدى جوبا اۆتورى. ونىڭ ايتۋىنشا، جوبانى جاساۋعا جەكە قارجىسى جانە قىتايداعى دەمەۋشى قانداستاردان جيناعان اقشاسى جۇمسالعان. دەگەنمەن، سوڭعى جۇمىستارىنا قاراجات جەتپەي تۇرعانىن دا جاسىرمادى. «مۇمكىندىك بولسا قالتالى ازاماتتاردان قولداۋ كۇتەمىن»، دەدى ول.