ۇبت  تۋرالى از ايتىلىپ جۇرگەن جوق، وتكىزۋ پروسەسىنە تۇزەتۋلەر دە ەنگىزىلىپ، بايقاۋ-باقىلاۋ جۇمىستارىنىڭ ادىس-تاسىلدەرى دە جەتىلدىرىلىپ تە جاتىر، ءبىراق ءبارىبىر ونى مەكتەپ ءبىتىرۋشىنىڭ ءبىلىم ساپاسىن بارىنشا ادىلەتتى باعالاي الاتىن سىناق دەپ ەشكىم دە ايتا الماس. پارلامەنت ءماجىلىسىنىڭ پلەنارلىق وتىرىسىندا دەپۋتات تۇرسىنبەك ءومىرزاقوۆ تا ونى جەتىلدىرۋ جولىندا كەزەكتى ۇسىنىس جاريالادى. بۇل ۇسىنىس پرەمەر-مينيستر كارىم ءماسىموۆتىڭ اتىنا دەپۋتاتتىق ساۋال رەتىندە جولداندى، سوندىقتان ونى جەردە قالماي، قارالاتىنى ءسوزسىز. سونىمەن بۇل ۇسىنىستا نە ايتىلدى دەيسىز عوي.

         بىرىنشىدەن، اپپەلياسيا تۋرالى. قازىرگى قولدانىستاعى زاڭداستىرىلعان تارتىپكە قاراعاندا اپپەلياسيا ۇبت-نىڭ قورىتىندىسى جاريالانعان ۋاقىتتان كەيىنگى كەلەسى كۇننىڭ 14.00 ساعاتىنا دەيىن بەرىلەدى. دەپۋتات ت.ءومىرزاقوۆ وسى مەرزىمدى كەم دەگەندە ەكى كۇنگە ۇزارتۋدى دۇرىس دەپ سانايدى. ويتكەنى، وسى ۋاقىتتا عانا مەكتەپ ءبىتىرۋشى مەن ونىڭ اتا-اناسى ناتيجەنى اسىقپاي سارالاۋعا ۇلگەرە الادى. ال اپپەلياسيانى ەكىنشى كۇنگى 14.00-گە دەيىن عانا بەرۋدىڭ ۋاقىتى تىم از، جارتى كۇندە ءبارىن سالماقتاپ شىعۋ مۇمكىن ەمەس. الەمنىڭ كوپتەگەن ەلدەرىندە، سونىڭ ىشىندە رەسەيدە دە اپپەلياسيا بەرۋ مەرزىمى بىزدىكىنەن الدەقايدا كوپ. وسى تاجىريبەنى دەپۋتات دۇرىس دەپ سانايدى.

دەپۋتاتتىڭ ۇسىنىسىنداعى ەكىنشى ماسەلە تەستتەردىڭ مازمۇنىن ارتتىرۋدى قالاۋ بولىپ وتىر. وسى كۇنگى تەستەر سۇراق-جاۋاپ تۇرىندە عانا بولىپ جانە جاۋاپتاردىڭ نۇسقالارى بەرىلگەندىكتەن تەست تاپسىرۋشى ولاردى تاڭداۋمەن عانا شەكتەلەتىنىن ايتا وتىرىپ دەپۋتات تالاپكەردىڭ لوگيكالىق قابىلەتىن تەكسەرەتىن سۇراقتاردىڭ دا قويىلۋى قاجەتتىگىن ايتادى. سوندا ۇمىتكەردىڭ ءبىلىمىنىڭ تەرەڭدىگى انىقتالار ەدى، ال قازىرگى تەستەر ونى كورسەتە المايدى. سوندىقتان حالىقارالىق تاجىريبەلەردى (ۇلىبريتانيا، اقش جانە ت.ب.) ەسكەرە وتىرىپ، جاڭا تيپتەگى تەستىك تاپسىرمالار ازىرلەنسىن، دەيدى ول. سونىڭ ىشىندە جاۋاپ نۇسقالارى جازىلماعان اشىق سۇراقتاردىڭ بولعانى ابزال. سوندا مەكتەپ ءبىتىرۋشى قايسىسىن السام ەكەن دەپ دايىن نۇسقالاردى تاڭداۋمەن عانا وتىرماي ءوزىنىڭ انىق ءبىلىمىن كورسەتەر ەدى. سونىمەن بىرگە دەپۋتات ۇلىبريتانيالىق ا-LEVEL تەستى بويىنشا ۇمىتكەر ءاربىر ءپاندى جەكە-جەكە تاپسىراتىنىن ەسكەرتەدى. قالا بەردى ول ۇبت تاپسىرۋدىڭ بارىنشا ءمولدىر ءارى ادىلەتتى بولۋى ءۇشىن رەسمي سايت اشىپ، وندا بارلىق ناتيجەلەر كورسەتىلىپ وتىرعانىن قالايدى. ال ەندى ۇبت تاپسىرۋ پروسەسىنە تاۋەلسىز ۆولونتەرلەردى جانە ايماقتارداعى بەدەلدى قوعام قايراتكەرلەرىن باقىلاۋشى رەتىندە تارتۋ تۋرالى ويلارى قازاقستاندىق كورپەگە لايىق ەمەس سياقتى. ويتكەنى، ول ءۇشىن قوسىمشا قاراجات كەرەك قوي. ال وندايعا ءبىزدىڭ وكىمەت ولسە بارار ما؟ ال قوزعالتقىشى باقىلاۋشىلار وتىرعان جەردە بولاتىن ونلاين رەجيمىندەگى ۆيدەوكامەرالار ورناتۋ كەرەك دەگەن ۇسىنىسى ويدان شىعادى. دەپۋتاتتىڭ وسىنداي ورىندى ۇسىنىستارى ورىندالسا، ۇبت-نىڭ ءبىلىم ساپاسىن انىقتاۋداعى قىزمەتى ارينە، ادىلەتتىرەك بولار ەدى.

بورانباي بالعوجا ، ساراپشى