الماتىدا Bekmاmbetov cinema كينوتەاترىندا رەجيسسەر ءسابيت قۇرمانبەكوۆتىڭ  «ورالمان» تولىقمەتراجدى كوركەم ءفيلمىنىڭ باق-قا ارنالعان جابىق كورسەتىلىمى ءوتتى،-دەپ  حابارلايدى «قامشى» پورتالى ءتىلشىسى.

 ءفيلمدى قازاقستان رەسپۋبليكاسىنىڭ مادەنيەت جانە سپورت مينيسترلىگىنىڭ تاپسىرىسى بويىنشا ش.ايمانوۆ اتىنداعى «قازاقفيلم» اق تۇسىرگەن. «ورالمان» ەل  تاۋەلسىزدىگىنىڭ 25 جىلدىق مەرەيتويىنا ورايلاستىرىلعان.  كينو تۋىندىنىڭ  سەنارييىن «مەنىڭ اتىم قوجا» فيلمىندە قوجانىڭ ءرولىن سومداعان اكتەر، كينودراماتۋرگ نۇرلان سانجار ءسابيت قۇرمانبەكوۆتىڭ قاتىسۋىمەن جازعان.

  باسىندا «تورە-تام» دەپ اتالماق بولعان فيلم قازاق قوعامىنداعى وتانىنا ورالعان قانداستاردى جەرگىلىكتى كەي قازاقتاردىڭ «ورالمان» دەپ بولە قاراۋىنا بايلانىستى، قوعامعا وي سالۋ ماقساتىندا «ورالمان» دەپ  وزگەرگەن.  باستى رولدەردە: دۋلىعا اقمولدا، ەرجان ءتۇسىپوۆ، ەسىم سەگىزبايەۆ، شىنار اسقاروۆا،  بايان قانجابييەۆالار ويناعان. فيلمگە ءان جازعان كومپوزيتور ايدوس ساعات. فيلم تاجىكستان مەن الماتى وبلىسىنداعى سارىوزەك ەلدى-مەكەنى ماڭىندا  تۇسىرىلگەن.  

 فيلم حح عاسىردىڭ 30-جىلدارى قىزىل اسكەردىڭ جەندەتتەرىنەن اۋعانىستانعا قونىس اۋدارۋعا ءماجبۇر بولعان قازاق وتباسى تۋرالى. باس كەيىپكەر بازارباي قارتتىڭ سول جاقتا ءبىر قىز، ءبىر ۇلى دۇنيەگە كەلەدى.  بالالارى ەسەيىپ، وتباسىن قۇرادى. كەيىننەن تۋعان جەردىڭ توپىراعىن اڭساپ، سۇيەگىنىڭ اتا-جۇرتتا كومىلگەنىن قالاعان قارت  قازاقستانعا ورالىپ، كوز جۇمادى. ۇلى ساپارقۇل اكەسىن اقتىق ساپارعا جالعىز ءوزى شىعارىپ سالادى. اتا-جۇرت جۇماق مەكەنىمىز دەپ اڭساپ كەلگەن وتباسى جەرگىلىكتى قازاقتاردان «ورالمانسىڭ»، «ساتقىنسىڭ» دەگەن اۋىر سوزدەرمەن، شەتتەتۋلەردى ءجيى ەستيدى. سوعان قاراماستان  اۋعانستاندا ازانشى بولىپ جۇمىس ىستەگەن ساپارقۇل قيراپ قالعان اسكەري رادار عيماراتىن قايتا جوندەپ، ورنىنا مەشىت تۇرعىىزادى.

"ورالمان" قالىڭ كوپشىلىككە كەلەسى جىلدىڭ ناۋرىز ايىندا جول تارتپاق. كينو كارتينانىڭ ومىرگە كەلۋىنە اتسالىسقان ازاماتتار ەلىمىزدىڭ تۇكپىر-تۇكپىرىندەگى  كينوتەاترى جوق شالعاي  اۋىل قازاقتارىنا بۇل تۋىندىنى تاماشالۋعا بارىنشا جاعداي جاساۋعا تىرىساتىندارىن ايتتى.