قازاقستان پرەزيدەنتى نۇرسۇلتان نازاربايەۆتىڭ جاپونياعا ىس-ساپارمەن بارعانى تۋرالى جاپون بۇقارالىق اقپارات قۇرالدارىندا ماتەريالدار جاريالانۋدا. «NHK» تەلەراديو كورپوراسياسى «ورتا ازيادا ورنالاسقان قازاقستان رەسپۋبليكاسىنىڭ باسشىسى ن.نازاربايەۆ قاراشانىڭ 6 كۇنى جاپونياعا كەلدى» دەپ حابارلادى. كەڭەس كەزىندەگى يادرولىق سىناق سالدارىنان ءالى دە كوپتەگەن ازاماتتاردىڭ دەنساۋلىق زاردابىن تارتىپ جاتقانىن ايتا كەلە، «قازاقستان پرەزيدەنتى قاراشانىڭ 6 مەن 9 ارالىعىندا جاپونيادا بولىپ، يمپەراتورمەن جانە پرەمەر-مينيستر ابە شيندزوۋمەن كەزدەسەدى. بۇل كەزدەسۋلەردە ەكى ەل اراسىنداعى ەكونوميكالىق ىنتىماقتاستىق تۋرالى پىكىر الماسادى. سونداي-اق پارلامەنتتە بايانداما جاسايدى» دەيدى.  

«قازاقستاندا كەڭەس داۋىرىندە سولتۇستىك شىعىستاعى سەمەي پوليگونىندا 450-دەن استام سىناق جاسالىپ، قازىردە سول ايماقتاعى حالىق سونىڭ زاردابىن تارتۋدا. سوندىقتان پرەزيدەنت نازاربايەۆ قاراشانىڭ توعىزىندا حيروشيماعا بارىپ، بەيبىتشىلىك پاركىندە بولىپ، اتوم بومباسى مۋزەيىنە باس سۇعادى. بۇۇ قۇرىلعان كۇننەن باستاپ 2045 جىلعا دەيىنگى 100 جىلدىق مەرزىمگە ارنالعان اتوم بومباسى جارىلىسىنا جول بەرمەۋگە قاتىستى عالامدىق ماقسات تۋرالى ءسوز سويلەيدى. بۇعان قوسا پرەزيدەنت نازاربايەۆ مۇناي مەن تابيعي گاز سياقتى رەسۋرستارعا باي قازاقستانعا بيزنەس وكىلدەرىن شاقىرۋ ماقساتىندا  كەلەسى جىلى استانا قالاسىندا وتەتىن، ەنەرگيانى باستى تاقىرىپ ەتكەن حالىقارالىق كورمە جايلى جاپون كاسىپكەرلەرىمەن اڭگىمەلەسەدى».

«اساحي» باسىلىمى دا يمپەراتوردىڭ قازاقستان پرەزيدەنتى نۇرسۇلتان نازاربيەۆپەن كەزدەسكەنى تۋرالى اقپاراتتى جاريالادى. بۇل كەزدەسۋدە جاپون ساربازدارى (ءسىبىر اسكەري تۇتقىندارى) مەن جەكەلەگەن تۇرعىنداردىڭ كونسلاگەرگە،  ءبىر بولىگى قازاقستانعا ايدالعانى تۋرالى ايتىلدى. يمپەراتور سارايى باسقاراماسىنىڭ مالىمەتىنە سۇيەنسەك، سول ەلدە ءومىر سۇرگەن جاپوندار تۋرالى اڭگىمە قوزعالىپ، يمپەراتور قازاقستانعا بارعان جاپون ازاماتتارىن حالىقتىڭ جىلى قابىلداعانى ءۇشىن العىس ايتتى.

«قازاقستان پرەزيدەنتى اتوم بومباسى جارىلىسىن باستان وتكەرگەن حيروشيما قالاسىنا العاش رەت بارماق» دەپ حابارلايدى جاپون باسىلىمى. «ءاساحيدىڭ» جازۋىنشا، قازاقستان پرەزيدەنتىنىڭ ءسوزىن جاپون يمپەراتورى زور ىقىلاسپەن، مۇقيات تىڭداعان.

«نيحونكەيدزاي شينبۋن» ەكونوميكالىق باسىلىمى 8 قاراشادا يمپەراتوردىڭ قازاقستان پرەزيدەنتىن قابىلداعانىن تۋرالى ماتەريال جاريالادى.  «يوميۋري» باسىلىمى دا نۇرسۇلتان نازاربايەۆتىڭ حيروشيماعا العاشقى ساپارى تۋرالى حابارلاي وتىرىپ، سەمەي پوليگونى زارداپتارىنا توقتالادى.

«يوميۋري» نازاربايەۆتىڭ حيروشيماداعى اتوم بومباسىنان قازا تاپقاندار ەسكەرتكىشىنە گۇل شوقتارىن قويىپ، اتوم بومباسى مۋزەيىنە باراتىنىن حابارلايدى. سونداي-اق ەلباسى حيروشيما حالىقارالىق كونفەرەنسيا ورتالىعىنداعى جيىندا ءسوز سويلەمەك. جيىنعا 200 ادام قاتىساتىنىن جازعان «نيحونكەيدزاي شينبۋن» حيروشيما تۇرعىندارىن اتالمىش جيىنعا كەلۋگە شاقىرادى.

شارافات جىلقىبايەۆا