«الماتى تاۋەرس» بيزنەس ورتالىعىنداعى ءورت سالدارىنان قازا تاپقان 5 ادامنىڭ ستۋدەنتتەر ەكەنى انىقتالدى. ولار وقىس وقيعا بولعان كەزدە عيماراتتان قاشىپ شىعا الماي قالعان. ويتكەنى سىرتىنان قۇلىپتاپ كەتىپتى. الاپات ورتتە تىرىدەي جانىپ كەتكەن ستۋدەنتتەردىڭ تورتەۋى – وڭتۇستىك قازاقستان وبلىسىنىڭ تۋمالارى. تاعى ءبىرى الماتى وبلىسىنان. بۇگىن ولاردىڭ دەنەلەرى تۋعان جەرلەرىنە جىبەرىلدى. ايتا كەتەيىك، جەكسەنبى كۇنى كەشكە بولعان ورتتەن 54 جاستاعى دانەكەرلەۋشى دە قازا تاپقان.

بۇل تۋرالى كتك ارناسى حابارلايدى.

الاپات ءورت ءومىرىن جالماعان ستۋدەنتتەردىڭ دەنەسى بۇگىن الماتىداعى سوت-مەديسينالىق ساراپتاماسى ورتالىعىنان شىعارىلىپ، تۋعان جەرلەرىنە جىبەرىلدى. ولاردىڭ اتا-انالارى مەن تۋىستارى تۇننەن بەرى كوز ىلمەي وسىندا ءجۇر. ال مارقۇمدار ءبىلىم العان وقۋ ورىندارىندا ستۋدەنتتەردىڭ سۋرەتتەرى قويىلعان. قىرشىن كەتكەن ەلامان ايدارالييەۆ پەن نۇرلىبەك سارتايەۆ – ءال-فارابي اتىنداعى قازاق ۇلتتىق ۋنيۆەرسيتەتى فيزيكا-تەحنيكالىق فاكۋلتەتىنىڭ 3-كۋرس ستۋدەنتتەرى ەكەن. تۋىستارىنىڭ ايتۋىنشا، ولار جۇمىس ىستەپ جاتقان بولمە سىرتىنان قۇلىپتالىپ، بالالار قامالىپ قالعان.

سانات مالدىبەكوۆ، مارقۇم ە. ايدارالييەۆتىڭ ناعاشىسى:

-قاراۋسىز قالعا عوي. ەسىكتى جاپقان. وتتىڭ ورتاسىندا قالعان. شىعاتىن جەر جوق. كۇيىپ ولگەن، جانىپ ولگەن.

ازاپتى ولىممەن كوز جۇمعان بەسەۋىنىڭ ءبىرى – اسفەندياروۆ اتىنداعى قازاق ۇلتتىق مەديسينا ۋنيۆەرسيتەتىنىڭ 2-كۋرس ستۋدەنتى يسمايلجون يسرايلوۆ. جيىرمادان ەندى اسقانبوزبالا ءتىس دارىگەرى بولۋدى ارمانداعان ەكەن. وتكەن جەكسەنبىدە ول «الماتى تاۋەرس» عيماراتىنداعى قابىرعاعا پلاستيك ماتەريالدار قاعىپ بەرىپ، اقشا تابۋ ءۇشىن بارعان ەكەن. اكەسىنىڭ ايتۋىنشا، جۇمىس بەرۋشىلەر كىنانى بالالاردىڭ وزدەرىنە جاپپاقشى.

ەسرالى يسرايلوۆ، مارقۇم ي. يسرايلوۆتىڭ اكەسى:

-كەرى قاراي زاتتارىن الىپ كەتۋ ءۇشىن بارعان دەيدى. ءوز ءومىرى ءۇشىن قورىققان ادام التىن بەرسە دە ونداي جەرگە قايتىپ بارمايدى عوي. ولار قاشىپ شىققىسى كەلگەن. ءبىراق ەسىك جابىق بولعان. ولاردى ەشكىم باقىلاماعان.

قانىش ساتبايەۆ اتىنداعى قازاق ۇلتتىق تەحنيكالىق زەرتتەۋ ۋنيۆەرسيتەتىنىڭ 2 جانە 4-كۋرس ستۋدەنتتەرى ەكۋبجون توحتامىشوۆ پەن ابىلاي زۇلپىبەكوۆ تە سول قىرشىن قيىلعانداردىڭ قاتارىندا. بارلىق جوعارى وقۋ ورىندارى مارقۇم ستۋدەنتتەرگە قۇرمەت ءبىلدىرىپ، ۋنيۆەرستيتەت قابىرعاسىندا قارالى حاباردى جاريالاپ قويعان. سونداي-اق، ستۋدەنتتىك ۇيىمدار دا ولاردىڭ تۋىستارىنا قولدان كەلگەنشە كومەكتەرىن بەرىپ جاتىر. تەك جانعا باتاتىنى، بالالاردى جالداعان كومپانيا باسشىلارى كوڭىل ايتۋدىڭ ورنىنا قوقان-لوققى كورسەتىپ ءجۇر ەكەن.

سانات مالدىبەكوۆ، مارقۇم ە. ايدارالييەۆتىڭ ناعاشىسى:

- كومپانيانىڭ باسشىلارىنان ءبىر ادام كەلمەدى. كوڭىل ايتۋدىڭ ورنىنا دىكەڭدەپ ءجۇر. سۇراۋى جوق ادامدار ەمەس.

قازا تاپقان ستۋدەنتتەر 20-22 جاس ارالىعىندا ەكەن. بارلىعىن دا ۇستازدارى تەك جاقسى قىرىنان سيپاتتاپ بەردى. ال ءورتتىڭ ءوزى نەدەن تۇتانعانى ءالى انىقتالعان جوق. ايتا كەتەيىك، وسى ءورت سالدارىنان 54 جاستاعى دانەكەرلەۋشى دە قازا تاپقان ەدى. ءسويتىپ، الماتىنىڭ قاق ورتاسىندا جەكسەنبى كۇنى بولعان ءورت 6 ادامنىڭ ءومىرىن جالمادى.