بۇگىن استانا قالاسىندا ءماسليحات شەشىمىمەن ءبىرقاتار كوشەلەردىڭ اتاۋى اۋىسقانى، جاڭا كوشەلەرگە ات بەرىلگەنى بەلگىلى بولدى. ءماسليحات دەپۋتاتتارى ەلوردانىڭ نەگىزگى داڭعىلدارىنىڭ ءبىرى ورىنبور كوشەسىن «ماڭگىلىك ەل» دەپ اتاۋدى ۇيعارىپتى.

ورتالىقتان الاستاتىلعان ورىنبور اتاۋى ەندى بۇعان دەيىن شارتتى تۇردە ە10 اتالىپ كەلگەن جاڭا كوشەگە بەرىلمەك ەكەن.

بۇدان بولەك ەسىلدىڭ سول جاعالاۋىندا ەندى نياز بي، نۇرپەيىس بايعانين، سۇلتانبەك قوجانوۆ، قايىم مۇحامەدحانوۆ، نيكولاي تەسلا، رابيعا ەسىمجانوۆا، ساتتار ەرۋبايەۆ، سۇيىنبيكە حانشايىم، بۇقار جىراۋ ەسىمدەرىمەن اتالاتىن جاڭا كوشەلەر پايدا بولماق. سونداي-اق، ي. پانفيلوۆ كوشەسىنە ساكەن ءجۇنىسوۆتىڭ ەسىمى بەرىلىپ، ب. مايلين كوشەسى ا193 كوشەسىمەن قوسىلماق. ال، بۇرىنعى حۋسەين بەن تالال كوشەسى ۇلى دالا داڭعىلى، ەڭبەكشىلەر كوشەسى ءاليحان داڭعىلى اتالماق.

بۇل ونوماستيكالىق شەشىمدەردى نەگىزىنەن قۇپتاۋعا بولادى. الاش كوسەمى ءاليحاننىڭ اتىن ۇلىقتاۋ، باسقا دا ۇلت قايراتكەرلەرىنىڭ ەسىمدەرىن جارىققا شىعارۋ قولداۋعا تۇرارلىق باستاما. تەك، كۇمان تۋعىزعانى ورىنبور كوشەسىنىڭ وزگەرۋى بولىپ وتىر. «ماڭگىلىك ەل» قاقپاسى ورنالاسقانى ءۇشىن عانا كوشە اتاۋى وزگەرتىلگەن بولسا، وندا اكىمدىكتەگىلەر مەن ءماسليحات دەپۋتاتتارىنىڭ وڭباي قاتەلەسكەنى. ورىنبور اتاۋى، سونداي قالانىڭ، ورىنبورداي استانامىزدىڭ بولعانىنىڭ ءوزى ەل تاريحىنىڭ اينىماس بولىگى، كەلەشەك ۇرپاق ءۇشىن ناعىز ماڭگىلىك ەل مۇراتىنىڭ، باي تاريحىمىزدىڭ ءبىر بەلگىسى ەمەس پە؟ استاناعا دەيىن الماتى، قىزىلوردا، ورىنبور، سەمەي قالالارىنىڭ حح عاسىردا الاش ۇكىمەتىنىڭ، كەڭەستىك قازاقستاننىڭ استاناسى بولعانىن ەلدىڭ بىلگەنى قىلمىس پا؟ 

جوق الدە، «كەزىندە قىرىمعا كۋرورتقا باراتىنبىز» دەپ ۋكراينانىڭ ارالىن تارتىپ العان رەسەيدىڭ الىمجەتتىك ساياساتىنان سەسكەنىپ وتىر ما بيلىكتەگىلەر؟ جوق، رەسەي ءبىزدىڭ ورىنبوردان دامەمىز بار دەپ سەزىكتەنىپ، سونى ىمداپ جەتكىزدى مە ەكەن ءبىزدىڭ باسشىلارعا؟ ايتپەسە، قانشاما ۋاقىتتان بەرى كوز ۇيرەنىپ، قۇلاققا ءسىڭىستى بولىپ قالعان كوشە اتاۋىن وزگە كوشەلەرمەن بىرگە ەدەل-جەدەل اۋىستىرىپ جىبەرگەنى قالاي؟ نەسى بولسا دا، سارايشىق، سىعاناق سىندى ەجەلگى استانالارىمىزدىڭ اتىمەن اتالاتىن كوشەلەردىڭ ءبىر اۋماققا شوعىرلانعانى الدەبىرەۋلەرگە ۇنامايتىن سەكىلدى. ايتپەسە، كوشە اتاۋى "ماڭگىلىك ەل" سالتاناتتى قاقپاسىنىڭ سىنىن كەتىرىپ تۇر دەگەندى ەش جەردەن ەستىمەپ ەدىك.

جومارت ابدوللا ۇلى