بۇگىن، 11 قاراشادا، اتىراۋ وبلىسىنىڭ اكىمى نۇرلان نوعايەۆ نيدەرلاند كورولدىگىنىڭ قازاقستانداعى، تاجىكستانداعى جانە قىرعىزستانداعى توتەنشە جانە وكىلەتتى ەلشىسى ديرك يان كوپپەن كەزدەستى.

كەزدەسۋ باسىندا ەلشى مىرزا وبلىس اكىمىنە ورىس تىلىندە سۇحباتتاسۋدى ۇسىندى. نۇرلان نوعايەۆ بۇل ۇسىنىستى قابىل المادى.

"ءبىز قازاقستاندامىز عوي. مىسالى، مەن نيدەرلاند ەلىنە بارار بولسام، قاسىما گوللاند تىلىندە سويلەيتىن اۋدارماشىنى ەرتىپ اپارامىن، سوندىقتان، ءقازىر قازاق تىلىندە اڭگىمەلەسۋگە مۇمكىندىگىڭىز بولماسا، كەلەسىدە قازاقشا سويلەسۋگە كەلىسەيىك"، – دەدى نۇرلان نوعايەۆ.

كەزدەسۋ بارىسىندا ديرك يان كوپ نيدەرلاند كورولدىگىنىڭ اتىراۋ وبلىسىمەن قارىم-قاتىناستى نىعايتۋعا مۇددەلى ەكەندىگىن ايتتى.

"اتىراۋ وبلىسى ينۆەستيسيا قۇيۋعا وتە قولايلى ايماق. سوندىقتان، بىزدىك كومپانيالاردىڭ وسىندا جۇمىس ىستەپ، ەكى تاراپقا دا پايدا كەلتىرۋلەرىنە مۇددەلىمىز"، - دەدى ەلشى.

ايتا كەتەلىك، 2016 جىلدىڭ العاشقى توعىز ايىنداعى كورسەتكىش بويىنشا، وبلىس پەن كورولدىك اراسىنداعى ساۋدا اينالىمى 1،5 ميلليارد دوللار بولعان. وبلىستا ءقازىر گوللانديالىق كاپيتالدىڭ قاتىسۋىمەن 96 كاسىپورىن تىركەلگەن.

اتىراۋ وبلىسىنىڭ اكىمى نۇرلان نوعايەۆ اتىراۋ وبلىسىندا ەلباسىنىڭ ايقىنداپ بەرگەن ساياساتىن ۇستانۋ ارقىلى ينۆەستورلارعا بارىنشا جايلى جاعدايدىڭ جاسالىپ جاتقانىن ايتتى.

 "ينۆەستورلارعا جان-جاقتى قولداۋ بىلدىرۋگە دايىنبىز. قارىم-قاتىناسىمىزدى ودان ءارى نىعايتا ءتۇسۋ ءۇشىن بارلىق مۇمكىندىكتى پايدالانامىز"، - دەدى ايماق باسشىسى.

ايتا كەتەلىك، ءقازىر اتىراۋ وبلىسىنداعى "ۇلتتىق يندۋستريالدىق مۇناي-حيميالىق تەحنوپاركى" ارنايى ەكونوميكالىق ايماعىندا 14 قاتىسۋشى جوبالارىن جۇزەگە اسىرىپ جاتىر. ايماقتا ينۆەستورلار ءۇشىن سالىقتىق، كەدەندىك جانە باسقا دا جەڭىلدىكتەر بار.