قاراعاندى ايماعىنداعى ءبىرقاتار كەنىش پەن ءوندىرىس نىسانىنا قوجالىق ەتەتىن «ارسەلورميتتال تەمىرتاۋ» كومپانياسىنىڭ باسشىلىعى وبلىستىڭ ساران قالاسىنداعى كەنىشتە 10 قاراشا كۇنى بولعان اپاتقا قازا بولعان كەنشىلەردىڭ ءوزىن كىنالى ەتىپ وتىر، - دەپ حابارلايدى Qamshy.kz.

ەستەرىڭىزگە سالساق، 10 قاراشا كۇنى ساران شاحتاسىندا ساعات تۇسكى ەكى جارىمدار شاماسىندا اپات بولىپ، وقيعا ورنىندا 3 كەنشى كوز جۇمىپ، بەسەۋى اۋرۋحاناعا جەتكىزىلگەن. جاراقات العان كەنشىلەردىڭ بىرەۋى 11 قاراشا كۇنى قاراعاندىنىڭ ماقاجانوۆ اتىنداعى كلينيكاسىندا كوز جۇمعان بولاتىن.

اشىق دەرەككوزدەردە اپاتتىڭ قالاي بولعانى جازىلۋدا. سول كۇنى اۋىسىم اياقتالعان سوڭ 12 كەنشى «فەرريت» ديزەلدى كولىگىمەن جوعارى قاراي ورلەپ كەدە جاتقان. جولدا كولىك تىركەمەسىنىڭ تروسى ءۇزىلىپ كەتىپ، ونداعى 12 ادام 200 مەتر بيىكتىكتەن تىركەمەمەن بىرگە تومەن قاراي قۇلاعان.

ادەتتەگىدەي اتالعان وقيعانىڭ سەبەپتەرى مەن كىنالىلەردى انىقتاۋ ءۇشىن ينۆەستيسيالار جانە دامۋ مينيسترلىگى جانىنان ارنايى كوميسسيا قۇرىلىپ، جۇمىسىن باستاعان. وبلىستىق پروكۋراتۋرا بولعان قايعىلى وقيعاعا بايلانىستى قىلمىستىق ءىس قوزعالىپ، سوتقا دەيىنگى تەرگەۋ باستالعانىن حابارلادى.

ارنايى كوميسسيانىڭ جۇمىس قورىتىندىسى شىقپاي جاتىپ، كەنىش قوجايىنى «ارسەلورميتتال تەمىرتاۋ» باسشىلىعى قايعىلى وقيعا بولعان كۇننىڭ ەرتەڭىنە وڭىردەگى اقپارات قۇرالدارىنا باسپا ءسوز حابارلامالارىن جولداپ، وندا بولعان اپاتتىڭ «سەبەپتەرىن» كورسەتىپتى. كومپانيا باسشىلىعى اپاتقا كەنشىلەردىڭ «تەحنيكالىق ستاندارتتارعا ساي ەمەس كولىك قۇرالدارىن پايدالانۋى» سەبەپ بولعان دەپ وتىر.

«الدىن الا اقپاراتتارعا ساي، 10 قاراشا كۇنى ساعات 14.25-تە جۇمىسشىلار تەحنيكالىق ستاندارتتارعا ساي كەلمەيتىن كولىكتى پايدالانعان. تالاپقا ساي ەمەس كولىكتى دۇرىس پايدالانباۋ ءۇش ادامنىڭ ولىمىنە جانە بەس ادامنىڭ جاراقات الۋىنا اكەپ سوقتى»، - دەلىنگەن اتالعان حابارلامادا. كومپانيانىڭ باسقاشا اقتالۋى مۇمكىندىگى دە جوق ەدى. ادەتتە كومىر شاحتالارىندا اپاتتار جەر قىرتىسىنىڭ وپىرىلۋىنان بولىپ جاتادى. ول كەزدەردە كەنىش باسشىلارى دا، كومپانيا جەتەكشىلەرى دە بار كىنانى وپىرىلعان كەنگە اۋدارىپ، اۋىر ايىپتان قۇتىلىپ كەتەتىن.

الايدا، اپات سەبەپتەرىن قولمەن قويعانداي ەتىپ كورسەتكەن كومپانيا باسشىلىعى كەنىشتە «تەحنيكالىق تالاپقا ساي ەمەس» كولىكتىڭ قالاي پايدا بولعانىن، ونى پايدالانۋعا كىم رۇقسات بەرگەنىن اشىپ ايتپاپتى. باسپا ءسوز حابارلاماسىندا سونداي-اق، ول كولىكتىڭ قانداي تەحنيكا ەكەندىگى، اپاتقا ناقتى قانداي اقاۋلار سەبەپ بولعانى دا ايتىلماعان. كومپانيانىڭ كوميسسيا جۇمىسىنىڭ قورىتىندىسىن كۇتپەي جانتالاسا وسىنداي حابار تاراتۋىنىڭ باستى سەبەبى – قايعىلى وقيعادان باستارىن اۋاشالاپ الۋ ەكەندىگىن باسپا ءسوز حابارلاماسىنداعى مىنا ءبىر سويلەمدەر ايگىلەپ تۇر.

«وسىنداي جاعدايلاردىڭ بولۋىنىڭ الدىن الۋ ماقساتىندا ءتيىستى شارالار باعدارلاماسى ازىرلەنىپ، قايعىلى جاعدايعا بايلانىستى قۇرىلعان كوميسسيا جۇمىسى باستالعانعا دەيىن قولدانىسقا ەنگىزىلدى»، - دەگەن «امت» باسشىلىعى ارنايى كوميسسيانىڭ الدىن وراپ، باسقا كەنىشتەردەگى كەم-كەتىكتەرىن جاسىرۋعا كىرىسىپ كەتكەندەي.

ءوڭىر تۇرعىندارى تەك كومپانيا باسشىلىعىنا عانا ەمەس، وبلىس اكىمدىگىنە، باسقا دا مەملەكەتتىك ورگانداردىڭ سىلبىرتتىعىنا نارازى. ماسەلەن، قايعىلى وقيعا تۋرالى حابار تەك سول كۇنى كەشكى التىلاردا تاراعان. وعان دەيىن كومپانيا باسشىلىعى دا، مەملەكەتتىك ورگاندار دا جۇمعان اۋىزدارىن اشپاعان. ەگەر بىرنەشە كەنشى كوز جۇمباعاندا، بۇل اپات تا «جابۋلى قازان جابۋلى كۇيىندە» ايتىلماي دا قالار ما ەدى؟

بىرنەشە وتباسىنىڭ شاڭىراعىنا قايعى اكەلگەن اپاتقا بايلانىستى قارالى كۇن جاريالاۋ، ءوندىرىس وشاقتارىندا ءجيى بولىپ تۇراتىن اپاتتارعا قاتىستى قوعامدىق بەلسەندىلەردى قاتىستىرا وتىرىپ تىڭداۋ وتكىزۋ دە ازىرگە وبلىس باسشىلارىنىڭ ويىنا كەلمەگەن سىڭايلى. ونى ايتاسىز، قايعىلى وقيعادان ءبىر كۇن وتكەن سوڭ عانا وبلىس اكىمى ن. ابدىبەكوۆتىڭ اتىنان قازا بولعانداردىڭ وتباسىنا كوڭىل ايتۋ جولدانعان. اپات ورنىنا بارىپ، بولعان جايدى ءوز كوزىمەن كورۋدى كەندى ولكەنىڭ باسشىسى قاجەت دەپ تاپپاعان سىڭايلى. وسىلايشا جەر استى بايلىعىنا بەلشەسىنەن باتقان كومپانيا جەرگىلىكتى جۇمىسشىلارعا، ءتىپتى، بيلىك وكىلدەرىنە دە پىسقىرىپ قارامايتىنىن انىق اڭعارتىپ وتىر.

جومارت ابدوللا ۇلى