ايىپتالۋشى ورىندىعىندا – ءۇش ادام. ەكەۋى قاندى قىلمىستى جاساعاندار، ال ءۇشىنشىسى - مۇمكىندىگى بولا تۇرا قىلمىس تۋرالى مالىمدەمەگەن مالشى. سوتتىڭ بۇگىنگى الدىن الا تىڭدالىمىندا، قوس تاراپتىڭ تۋىستارى سوزگە كەلىپ، شەكىسىپ قالدى.        

بۇل تۋرالى كتك ارناسى حابارلايدى.            

سوتتىڭ تابالدىرىعىندا بىر-بىرىنە تەرىس قاراعان قوس تاراپ. ءبىرىنىڭ –قاراۋعا بەتى جوق، ال ءبىرى اشۋ-ىزاسىن ارەڭ ۇستاعان. تار دالىزدە ءارى قاراي بىرگە تۇرۋعا ءداتى شىداماسا كەرەك، كۇدىكتىلەردىڭ تۋىستارى اقىرى سىرتقا قاشىپ شىقتى.           

كامشات وڭالبايەۆا، كۇدىكتى م.وڭالبايەۆتىڭ ايەلى:

– نەگە ءتۇرىڭىزدى جاباسىز؟ ءبارىبىر سوتقا كىرەسىز عوي!  ەندى جۇمىس ىستەيمىن  تانيتىن ەل دە كوپ.  ۇيات قوي، قويشى.

تۋىستارى ۇياتتان ورتەنگەنىمەن، كۇدىكتىلەر ەركىن وتىر. ءتىپتى تاعىلعان ايىپتارمەن كەلىسپەيتىنىن دە سۋدياعا كەسىپ ايتتى.    باستاپقىدا كىناسىن مويىنداعانداي بولعان كۇدىكتىلەر وسىلايشا سوتتا تايقىپ شىعا كەلدى. بىرەۋى دە ءوزىن كىنالىمىن دەپ وتىرعان جوق. تالعات سۇلەيمەنوۆ قاراقشىلىق فاكتىسىن دە مۇلدە جوققا شىعاردى. ۇزىناعاش بازارىنان ءۇش اعايىندىنى 40 باس سيىرىمەن اۋىلعا الداپ اپارىپ، ارتىنشا ايۋاندىقپەن ءولتىردى دەپ ايىپتالعان وسى سۇلەيمەنوۆ پەن مۇرات وڭالبايەۆ. ال ءۇشىنشىسى - مارقۇمداردىڭ قالاي ولتىرىلگەنىن كورگەن، ءبىراق وقيعا تۋرالى مالىمدەمەگەن مالشى. جاۋاپكەرشىلىگىن ءالى سەزىنبەسە كەرەك، قولحاتپەن ۇيىنەن كەلىپ جۇرگەن ول بۇگىنگى سوتقا دا اراق ءىشىپ كەلىپتى. جەتى كۇن ۇندەمەي جاتقان بايقاسىموۆتى سول سىبايلاستارى ۇستاپ بەرگەنىن ايتا كەتەيىك. 

باقىت بايقاسىموۆ، كۇدىكتى:

- اۋزىم بايلانىپ قالدى بالا-شاعامدى ويلاپ.  

-نەگە جاسىراسىڭ؟

-ايت شىندىقتى.

نەگە جاسىراسىڭ؟

-بىلمەيمىن،قورقىپ كەتتىم!  

بۇگىنگى تىڭدالىمىندا وسى قاندى قىلمىسقا قاتىسى بار دەلىنگەن تاعى ەكى ادامنىڭ اتى اتالدى. ولار - كۇدىكتى تالعات سۇلەيمەنوۆتىڭ اكەسى مەن ءىنىسى. 

ەركىن بەيسەكە، مارقۇمداردىڭ تۋىسى:

-قارۋدى سۇلەيمەنوۆ جاناي بەرىپ وتىر. قىلمىستى سۇلەيمەنوۆ تالعات جاساپ وتىر. مالدى سۇلەيمەنوۆ دانيار الىپ وتىر. فاميلياسى دا ۇشەۋىنىڭ سۇلەيمەنوۆ. تالعات سۇلەيمەنوۆ، جاناي، دانيار سۇلەيمەنوۆ.

اكەلى –بالالى قاندى وقيعا ءتۇنى اۋىلدا كۇتىپ، ۇرلىق مالدى ءتۇسىرىپ الىپ قالعان ەكەن. ءبىراق سولاي بولا تۇرا ىسكە تەك كۋاگەر رەتىندە تارتىلۋىنا جابىرلەنۋشى تاراپ كەلىسپەي وتىر.   

اتىشۋلى قىلمىستىق ىستە توپپەن ادام ءولتىرۋ، قاراقشىلىق جانە زاڭسىز قارۋ الىپ ءجۇرۋ سىندى اۋىر باپتارمەن ايىپتار تاعىلعان. ءبىراق تا مارقۇمداردىڭ تۋىستارى ءالى دە «ءمايىتتى قورلاۋ» دەگەن تاعى ءبىر اۋىر باپتىڭ قوسىلۋىن تالاپ ەتىپ وتىر. ويتكەنى، سوت ساراپتاماسى كورسەتكەندەي قاندىقول قاراقشىلار مارقۇمداردى اتىپ ولتىرمەس بۇرىن ولاردى ابدەن ازاپتاعان ەكەن.

ياعني، جارقىنبەك، قادىلبەك، مۇقيات ەسىمدى ءۇش اعايىندىنىڭ جاۋىرىنى مەن جاعىن ۇرىپ سىندىرعان ەكەن. ارتىنشا مىلتىقپەن باسىنان، جۇرەكتەن اتقان. نەگىزگى سوت وتىرىسى ءتورت كۇننەن كەيىن باستالماق، قاندى وقيعانىڭ بۇگە-شۇگەسى سوندا ايتالدى.