قىزىلورداعا ءتيىپ تۇرعان بەلكول كەنتىنىڭ تۇرعىندارى ساپاروۆتار وتباسىنا كومەك سۇرايدى. وسىدان بىرنەشە كۇن بۇرىن گاز باللونى جارىلىپ، وتاناسى قايتىس بولعان. ال وتباسىنىڭ بەس مۇشەسى اۋرۋحانادا جاتىر. ولاردىڭ جاعدايىنا الاڭداعان اۋىلداستارى، بارار جەرى جوق ەكەنىن ايتىپ، قايىرىمدى جاندارعا يەك ارتادى. ءبىزدىڭ ارناعا كومەك سۇراي كەلگەن اۋىل تۇرعىندارى، سوڭعى 1 ايدا اتالعان كەنتتە وسىمەن 6 وتباسى ورتتەن زارداپ شەككەنىن ايتتى.

بۇل تۋرالى استانا ارناسى حابارلايدى. 

وقىس جاعداي قاراشانىڭ 2-سىندە بولعان. ساپاروۆتاردىڭ كەنجەسى 11 جاستاعى داۋلەتتىڭ جادىندا قالىپ قويعان. ونىڭ ايتۋىنشا، كەشكىسىن، ادەتتەگىدەي، اناسى تەلەديدار قاراپ، اعا-جەڭگەسى مەن بالالارى كومپيۋتەرمەن الەك بولىپ جاتقان. اياق استىنان قاتتى داۋىس شىعىپ، اپ-ساتتە ءۇيدىڭ قابىرعالارى قۇلاعان. داۋلەت مىرزاحمەت: گازدىن باسقا كيگىزىپ قوياتىنى ۇشتى دا، گاز جەرگە قۇلادى. باسىنان اق اقتى دا، جارىلدى. سوسىن مەنى اعام قۇتقاردى، مامامدى اعام قۇتقاردى، مىنا سانجار مەن قاراقاتتى مامالارى قۇتقاردى.  ساپاروۆتاردىڭ ورتانشى ۇلى كومەككە ءبىرىنشى بولىپ كەلگەن. ول جۇمىستان شىعىپ ۇيگە بەتكە العاندا، الىستان جالىندى بايقاپ ۇيىنە جۇگىرگەن. العان جاراقاتتاردان انالارى كوز جۇمدى. اۋىل حالقى قاراجات جيناپ، ونى سوڭعى ساپارعا شىعارىپ سالىپتى.

عازيزا باكيروۆا، تۋىسى: بالالارى جەتىم قالدى، جاعدايلارى اۋىر. ەندى شىققاننان كەيىن مىناۋ ءۇيدىڭ قاي جاعىنا بارادى؟ مەنىم ۇيىمە بارعانىمەن، مەنىڭ ءۇيىم دە شاعىن. بۇل بالالاردى قاي جاققا اپارامىن مەن؟  كەلىن 45 پروسەنت كۇيگەن، بالامىز 25 پروسەنت، ءولىم مەن ءومىردىڭ اراسىندا جاتىر.

ءالىمجان تولەگەنوۆ، قىزىلوردا وبلىستىق مەديسينالىق ورتالىقتىڭ بالالار حيرۋرگى: ناۋقاستار تۇسكەن كەزدە جاعدايلارى وتە اۋىر بولدى، وتپەن كۇيگەن جاراقاتتار وتە تەرەڭ بولادى. بۇل سەبەپتى كەلگەن كەزدە رەانيماسياعا جاتقىزدىق ءۇش بالانى دا. قازىرگى ۋاقىتتا وتدەلەنيەدە ەم الىپ جاتىر تولىق كولەمدە. بارلىق دارى-دارمەكتەر جەتكىلىكتى. قازىرگى جاعدايلارى ورتاشا اۋىرلىقتا. اۋىل تۇرعىندارى، قىس باستالماي جاتىپ، ورتتەن زارداپ شەككەندەردىڭ كوپ ەكەنىن ايتتى. سوڭعى 1 ايدا 6 ءۇي ورتتەن زارداپ شەككەن.

بايان توقسانبايەۆا، بەلكول كەنتىنىڭ تۇرعىنى: وسى ءبىر ايدىڭ كولەمىندە التى ءۇي زارداپ شەگىپ وتىر، وسى ءورتتىڭ كەسىرىنەن. ال ول نەگە دەپ ويلايسىزدار؟ سەبەبى بۇل گاز جوقتىقتان. ءبىز مىناۋ قالاعا ءتيىپ تۇرمىز. كورشى تۇرامىز ساپاروۆتار وتباسىنا. بەلكول كەنتىنىڭ اتىنان سىزدەردەن سۇرارىم: وسى ساپاروۆتار وتباسىنا كومەكتەسسەڭىزدەر ەكەن. ۇلكەن وبلىس باسشىلىعىنان بولسىن، اۋدان باسشىلىعىنان بولسىن، مەن دەگەن ازاماتتار بولسا، كاسىپكەرلەر بولسا.

نۇرسۇلتان بايمەنوۆ، بەلكول كەنتى اكىمى اپپاراتىنىڭ زاڭگەرى: كەنت اكىمشىلىگى تاراپىنان التى اي كولەمىندە زاڭعا سايكەس باسپانامەن قامتاماسىز ەتىلەدى. ءبىراق الداعى ۋاقىتتا تۇراقتى باسپانا قاجەت. ويتكەنى بەلكول اكىمدىگى تاراپىنان ونداي باسپانا جوق. ەندى كەزەكتىلىگىنە سايكەس الداعى ۋاقىتتا الادى دەپ ويلايمىز، قۇجاتتارىن دايىنداپ وتكىزگەن سوڭ. توتەنشە جاعداي ماماندارىنىڭ دەرەگىنشە، گاز باللونىندا اقاۋ بولعان بولۋى مۇمكىن.

ەربولات سەرمانوۆ، وبلىستىق تجد ءورتتى مەملەكەتتىك باقىلاۋ ءبولىمىنىڭ باس مامانى: ءورتتىڭ شىعۋ سەبەبى انىقتالۋدا ءقازىر. وسى جيناقتالعان قۇجاتتاردىڭ بارلىعى تەرگەۋ رەتتىلىگىمەن 2016 جىلى 3 قاراشاسىندا قىزىلوردا قالالىق ىشكى ىستەر باسقارماسىنا جولداندى. سوت ساراپتاماسى تاعايىندالدى، ءقازىر انىقتالىپ جاتىر. ءورت بولعاندا، ءبىرىنشى جارىلىس بولعان عوي، گاز باللونى جارىلىس بولعان نەگىزىندە. ءورتتىڭ اقاۋى سول گاز باللونى اۋزىنان ءيىس شىعۋىنان عوي. دەنساۋلىقتى تۇزەگەن سوڭ، الدىمەن قۇجاتتاردى راسىمدەۋلەرى ءتيىس. كەنت تۇرعىندارى بولسا، الەۋمەتتىك جەلى ارقىلى دا بارلىق قايىرىمدى ازاماتتاردان كومەك سۇراپ جاتىر.