مادەنيەت جانە سپورت ءمينيسترى سوتقا بەرگەن ەڭلىك سىدىقوۆانىڭ ادۆوكاتى داۋلى وقيعاعا قاتىستى پىكىر ءبىلدىردى، - دەپ حابارلايدى Tengrinews.kz.

 تاياۋدا مادەنيەت جانە سپورت ءمينيسترى ارىستانبەك مۇحامەدي ۇلىنىڭ ەڭلىك سىدىقوۆانى سوتقا بەرگەنى بەلگىلى بولدى.

قىزدىڭ ادۆوكاتى گۇلنارا جۋاسپايەۆا ونىڭ مۇددەسىن سوتتا تەگىن قورعاۋعا كەلىسىم بەرىپ وتىر ەكەن. ەندى ول سوتتا قىزدىڭ ايتقان سوزدەرىن دالەلدەۋگە تىرىسامىن دەيدى.

"ارينە، قولىمىزدا كوزىر بار، ونى سوتتا جاريا ەتەمىز. وقيعا تىزبەگىن باقىلاپ وتىرساڭىزدار، داۋ شىققان كەزدە، ەكىنشى كۇنى مەن "ەگەر مينيستر ءوز قىزمەتىنەن كەتپەي، ەڭلىكپەن سوتتاساتىن بولسا، ادىلەتسىز سوت بولادى" دەپ ايتقانمىن. ول ءقازىر ەڭلىككە ءتىسىن باتىرىپ، سوتتا جەڭىپ شىعۋى ءۇشىن بارلىق اكىمشىلىك قۇرالدارىن قولدانىپ جاتىر"، - دەپ مالىمدەدى قىزدىڭ ادۆوكاتى گۇلنارا جۋاسپايەۆا.

سونىمەن قاتار، ادۆوكات ەڭلىك سىدىقوۆاعا جانە ونىڭ تۋىستارىنا بەلگىسىز ادامدار قىسىم ءتۇسىرىپ جۇرگەنىن، بۇعان دەيىن مينيسترگە تاققان ايىپتارىن جوققا شىعارۋدى ۇسىنىپ جاتقانىن مالىمدەدى. "ولاردىڭ ۇيىنە بىرنەشە رەت بارىپ، ەڭلىكتى استاناعا ۇشاقپەن جەتكىزۋدى ۇسىنىپتى، استاناعا جەتكىزىپ، ولار ەڭلىكتى ۆيدەوۇندەۋ جازعىزىپ، اقشا ءۇشىن جاسادىم دەگىزگىسى كەلگەن"، - دەپ مالىمدەدى ادۆوكات.

ادۆوكات جۋاسپايەۆا سوتقا كۋاگەر رەتىندە ەڭلىك سىدىقوۆانى قولداۋعا دايىن ادامداردىڭ شاقىرتىلاتىنىن اتاپ ءوتتى. "ولار سوتقا كەلىپ، كۋاگەر رەتىندە ءسوز سويلەۋگە، ەڭلىكتى قولداۋعا ۋادە بەردى. قىزدار كوپ، سوتتا قانشا ادام بولاتىنىن ايتا المايمىن، ءبىراق كوپ. ءبىز بارلىق ۆيدەونى كورسەتكەن جوقپىز. ساقتاي تۇرۋىمىز كەرەك"، - دەپ حابارلادى ەڭلىك سىدىقوۆانىڭ ادۆوكاتى.

ال مادەنيەت جانە سپورت ءمينيسترىنىڭ ادۆوكاتى ەسكەندىر الىمبايەۆ ءوز كەزەگىندە ەگەر ەڭلىك سىدىقوۆا ايىپتاۋلارىن جوققا شىعارسا، مۇحامەدي ۇلى ارىزىن قايتارىپ الۋعا دايىن ەكەنىن اتاپ ءوتتى. "شىنتۋايتىندا مينيستر ادامدى قىلمىستىق جاۋاپكەرشىلىككە تارتۋعا نيەتى جوق. ەگەر ول ءوز ايىپتاۋلارىن جوققا شىعارسا، مينيستر ارىزىن قايتارىپ الۋعا دايىن. جازالاۋعا نيەتى جوق. قىزدىڭ ءبىر جاعدايلاردىڭ قۇربانى بولعانىن جاقسى ءتۇسىنىپ وتىرمىز، ونىڭ ايتىپ وتىرعان سوزىندە جاساندىلىق بار. ياعني ول ويلاعانىن ايتىپ وتىرعان جوق، الدىن الا دايىندالىپ قويعان ءماتىندى وقىپ وتىر. سوعان قاراعاندا وعان بىرەۋ وسىنى ايت دەپ اسەر ەتكەن سياقتى. ءتۇرلى بولجام ايتۋعا بولادى. ءبىراق بۇل قىزدىڭ بەلگىسىز ءبىر جاعدايلاردىڭ قۇربانى بولۋى مۇمكىن ەكەندىگىن جوققا شىعارمايدى"، - دەدى ءمينيستردىڭ ادۆوكاتى.

ونىڭ ايتۋىنشا، مينيستر سوتقا ءوز نيەتىمەن ەمەس، مەملەكەتتىك قىزمەتكەر بولىپ، ءوز ابىرويىن قورعاۋعا مىندەتتەلگەن سوڭ بەرىپتى. 

"مينيستر مەن ەڭلىك سىدىقوۆا كەزدەسپەگەن بولۋى دا مۇمكىن. سىدىقوۆا ءوز ايىپتاۋىندا وقۋ ورنىنا ءتۇسۋ ءۇشىن رەكتورمەن كەزدەسۋدى ۇيىمداستىرۋعا ونىڭ قابىلداۋ ەمتيحانىنا كەشىگىپ قالعانى سەبەپ بولعان دەيدى. الايدا، تاياۋدا باق-تاردا جاريا ەتىلگەن مالىمەتتەرگە قاراعاندا، سىدىقوۆا 2011 جىلى بۇل وقۋ ورنىنا تۇسپەگەن. (...) 2011 جىلى ول قىزىلورداداعى باسقا ءبىر وقۋ ورنىنا تۇسكەن. ءبىراق ۆيدەوۇندەۋىندە ول الماتىداعى وقۋ ورنىنا تۇسكىسى كەلگەنىن ايتادى"، - دەپ مالىمدەدى ارىستانبەك مۇحامەدي ۇلىنىڭ ادۆوكاتى ەسكەندىر الىمبايەۆ.

ەسكە سالايىق، وسىعان دەيىن ت. جۇرگەنوۆ اتىنداعى قازاق ۇلتتىق ونەر اكادەمياسىنىڭ بۇرىنعى ستۋدەنتى ەڭلىك سىدىقوۆا ءمينيستردى بوتەن ويمەن ءتيىستى دەپ ايىپتاعان بولاتىن. ۆيدەودا قىز 2011 جىلى مۇحامەدي ۇلى رەكتور بولعاندا اكادەمياعا اقشاعا ءتۇسىرىپ بەرەتىنىن ايتتى جانە ەكىۇشتى ۇسىنىستار ايتتى دەپ مالىمدەيدى. ال مۇحامەدي ۇلى ءوز كەزەگىندە بۇل مالىمدەمەنىڭ شىندىققا جاناسپايتىنىن مالىمدەگەن. وسىدان كەيىن باق-تاردا تاعى ءبىر قىزدىڭ ءمينيسترى "ءتيىستى" دەپ ايىپتاعانى جايلى حابار تارادى. ال كەيىن ق ر مادەنيەت جانە سپورت ءمينيسترى ارىستانبەك مۇحامەدي ۇلى ار-نامىسى مەن ابىرويىن سوتتا قورعايتىن بولاتىنى حابارلاندى.