«قامشى» پورتالى 14 قاراشادا تاراتقان اقپاراتىندا 29 قازاندا الماتىدا وتكەن قانات يسلام جەكپە-جەگىنە قاتىستى «ەلدى جاڭىلدىرعان بەس دەرەك» تۋرالى بەلگىلى سپورت ءجۋرناليسى رۋسلان مەدەلبەكتىڭ جازباسىن جاريالاعان بولاتىن.
بۇعان بايلانىستى قالىڭ وقىرماننان جاعىمسىز پىكىرلەر ءتۇسىپ، جازبا اۆتورى مەن پورتالىمىزدى سىناپ جاتقاندار تابىلدى. ءبىز قازاق نامىسىن قورعاپ جۇرگەن باتىرىمىز قانات يسلامعا اسا جانكۇيەر وقىرماندارىمىزدىڭ پەيىلىنە العىسىمىزدى بىلدىرە وتىرىپ، ول جازباداعى ماسەلەنىڭ ءمانىن تۇسىندىرە كەتۋدى ءجون كوردىك.
الماتىدا وتكەن قانات يسلام مەن پاتريك اللوتەي اراسىنداعى جەكپە-جەك ماڭىنداعى داۋعا بايلانىستى قازاقستان كاسىپقوي بوكس فەدەراسياسىنىڭ ۆيسە-پرەزيدەنتى ۆيكتور دەميانەنكو تومەندەگىدەي مالىمدەمە جاسادى:
«الماتىدا يسلام مەن اللوتەي اراسىندا وتكەن جەكپە-جەك اياسىندا تاراپ جاتقان قاۋەسەتتەرگە بايلانىستى تۇسىنىكتەمە بەرەيىن. بىردەن ايتايىن، قازاقستان كاسىپقوي بوكس فەدەراسياسى ءوز ميسسياسىن تولىعىمەن 100 پايىزعا اتقارىپ شىقتى. دەگەنمەن 2016 جىلى 29-قازاندا وسى جەكپە-جەكتى ۇيىمداستىرۋشى «نەلسون پروموۋشەن» كومپانياسى فەدەراسيانى بوكسشىلار قولدانعان قولعاپتاردىڭ ساپاسىزدىعىن ياعني جارامايتىنىن ايتىپ، جالا جاپقان بولاتىن. نەگىزىنەن، بوكستاعى زاڭدىلىققا ساي جەكپە-جەكتى ۇيىمداستىرۋشى پروموۋتەر بارلىق بوكسشىعا قولعاپتاردى تاۋىپ بەرۋى ءتيىس، سونىمەن قاتار قولدارى جاراقات الماۋى ءۇشىن تيتۋل ءۇشىن تالاساتىن بوكسشىلارعا ساپالى قولعاپتارىن بەرۋى ءتيىس» — دەدى ۆيكتور دەميانەنكو.
بەلگىلى بولعانداي، وسىعان دەيىن جەكپە-جەكتەن سوڭ قانات يسلامنىڭ جاراقات العان قولىنىڭ سۋرەتتەرى جەلىدە جاريالانعان بولاتىن. دەمەك، بوكس قولعابى ساپاسىز بولعانى راس. بۇل — ۇيات بولعان ءبىرىنشى جايت.
ەكىنشىدەن، ءوزىن قانات يسلامنىڭ مەنەدجەرى دەپ تانىستىرعان نۇرعازى يسماعامبەتوۆ تە قازاقستان بوكس فەدەراسياسى جەكپە-جەك وتكىزىلگەننەن كەيىن كەزدەسۋ قورىتىندىسى BoxRec-تە جاريالاماعانىن ايتىپ، سول سەبەپتى WBA قانات يسلامنىڭ WBA-Fedelatin تيتۋلى ءۇشىن جۇدىرىقتاسقانىن مويىنداماعان دەپ كىنا تاققان بولاتىن. بۇعان قاتىستى فەدەراسيا باسشىسى بىلاي دەگەن:
«بۇل جەردە ايتا كەتۋ كەرەك، بارلىق كەزدەسۋدىڭ قورىتىندىسى BoxRec-كە جىبەرىلگەن، سول كەشتە-اق بىردەن كەش قورىتىندىلارى مەن قانات يسلام قورعاماق بولعان WBA-Fedelatin ۆاكانتتىق تيتۋل دا جاريالانعان. الايدا بىرنەشە كۇن وتكەننەن كەيىن، 3-قاراشادا WBA سايتىندا قانات يسلامنىڭ WBA ايماقتىق تيتۋلدار بويىنشا بىردە-بىر جەكپە-جەگى بولماعان، سونىڭ ىشىندە Fedelatin ءۇشىن دە دەپ، سول ءۇشىن BoxRec-تەن ول تيتۋلدى الىپ تاستادى».
بۇل ارادا كوپ تۇسىنبەستىكتىڭ ورىن العانى انىق. ونى قازاقستان بوكس فەدەراسياسى بىلاي تارقاتادى.
««نەلسون پروموۋشەن» WBA-Fedelatin-نەن العان سانكسيانى وقىماعان سەكىلدى، ال وندا قانات يسلام قورعادى دەگەن تيتۋل ونىكى ەمەس ەكەنى، ول ۆاكانتتى تيتۋلعا اينالعانى انىق كورسەتىلگەن. سول سەكىلدى وسى ماچقا دەيىن قانات تيتۋلدىق ەمەس 2 جەكپە-جەك وتكىزگەن. مىنە، وسى جۇمىستار تۋرالى ونىڭ كومانداسى WBA-Fedelatin حاباردار ەتىپ، وسى جەكپە-جەكتى وتكىزۋگە رۇقسات الۋى كەرەك بولعان. ەگەر ونداي رۇقسات الىنباسا، 6 ايدا تيتۋل قورعالماسا وندا بوكسەر ءوزىنىڭ يەلىگىندەگى اتاقتان اۆتوماتتى تۇردە ايىرىلادى. ياعني، «نەلسون پروموۋشەن» WBA-Fedelatin تيتۋلى قورعالاتىنىن جاريالاۋدا ولار فەدەراسيانى دا، كورەرمەندەردى دە الداعان. قاناتتى وسىنداي بەلبەۋگە يە دەپ. مەنىڭشە، بۇل جەكپە-جەكتى ەسەپكە الماعان سەكىلدى، ويتكەنى WBA-Fedelatin بەكىتكەن سۋپەرۆايزەر مەن تورەشى كەلگەن جوق، تەك WBA وكىلدەرى عانا قاتىستى. بۇل ارادا «نەلسون پروموۋشەن» اقشاسىن ۇنەمدەپ، WBA-Fedelatin سالعان سانكسيانى تولەمەگەن، ال WBA BoxRec-تە جاريالانعان بۇل اقپاراتتى كورىپ، تيتۋلدى سايتتان الىپ تاستاعان دەپ ويلايمىن.
مەن كىشى جانە ۇلكەن نەلسونمەن دە قولعاپ ساپاسى جانە تيتۋلدىق جەكپە-جەك سانكسياسى تۋرالى سويلەسكەن بولاتىنمىن. ولار ەشتەڭەگە الاڭداۋدىڭ قاجەتى جوق، بارلىعىن رەتتەيمىز دەدى. مەنىڭشە، ولار قازاقستانعا ءبىر شالعايدا ەشقانداي دامۋى جوق اۋىلعا، جاۋاپسىزدىقتارى كورىنبەيتىن سەكىلدى كەلە سالعان.
مەن بوكس سۇيەر قاۋىمنىڭ بۇل جەكپە-جەكتەگى تاراپتار جاۋاپسىزدىعىنىڭ قازاقستان بوكس فەدەراسياسىنا ارتا سالعىسى كەلىپ جاتقانىن جەتكىزىپ، ونى دۇرىس تۇسىنەر دەپ ۇمىتتەنەمىن. ءبىز ءقازىر WBA-Fedelatin رەسمي ساۋال جولدادىق، تيتۋلدى جەكپە-جەكتى نەگە ەسەپكە الماعانىنىڭ ناقتى دەرەگى تاياۋدا بەلگىلى بولادى».
پىكىر قالدىرۋ