مەرۋەرت تۇسىپبايەۆا: شەتەلگە كوشىپ كەتكىم كەلەدى

مەرۋەرت تۇسىپبايەۆا نەگە شەتەلگە كوشىپ كەتكىسى كەلەدى؟ ءوزىن «تالعامسىز» دەپ ايتقان سانگەرلەردەن ەسەسىن قالاي قايتارماق؟ «جىبەك-2» سەريالىنداعى مەرۋەرت نەلىكتەن جۇمىسىن توقتاتۋعا ءماجبۇر بولعان..؟ وسى سارىنداعى سان ءتۇرلى ساۋالدارعا جاۋاپتى تومەننەن وقىڭىز.

— ءسىز تۋرالى الىپ-قاشپا اڭگىمە جازعىش «سارى» سايتتارمەن كۇرەسىپ جۇرگەن ەدىڭىز. سونىڭ سوڭى نە بولدى؟

— مەنىڭ ينستاگرامداعى پاراقشام جابىق. مەن ولارعا نەگە رەنجيمىن؟ ءبىر كۇنى: «بۇگىن مەندە دەمالىس. سەگودنيا ۋ مەنيا ۆىحودنوي…»-دەپ، كەۋدەمە دەيىن كورپە جامىلىپ جاتقان سۋرەتىمدى ينستاگرامعا سالعانمىن. سويتسەم، ەكى كۇننەن كەيىن «تۇسىپبايەۆا ماكياجسىز جالاڭاش شىقتى…، اناۋ-مىناۋ» قۇداي ساقتاسىن ۋ دا شۋ اڭگىمە… ەندى نە ىستەۋ كەرەك ەكەنىن بىلمەيمىن. ينستاگرامدى جاۋىپ-اشىپ، اشىپ-شاۋىپ شارشادىق. «جىبەك» سەريالىنا تۇسكەن كەزدە پروديۋسەرلەر جارناما ءۇشىن قاجەت دەپ پاراقشالارىمىزدى اشىپ قويۋدى تالاپ ەتكەن بولاتىن. باياعىدا شەتەلدىك ارنالاردان مادوننالاردىڭ جۋرناليستەردەن بەتىن بۇركىپ، جاۋىپ، تىعىلىپ قاشىپ جۇرەتىنىن كورەتىن ەدىك قوي. «اناۋ ءۇيتىپ قاپتى، مىناۋ ءبۇيتىپ قاپتى» دەپ شۋلاتىپ جاتاتىن. سول زامان بىزگە كەلدى مە دەپ ويلايمىن. مەن سايتتارعا تاعى دا ايتامىن: «ماعان تيمەڭدەرشى، وز-وزىممەن عانا تىنىش ءومىر سۇرەيىنشى. مەن وزىمە ءوزىم جاۋاپ بەرە الامىن. مەن تۋرالى جازباي-اق قويىڭدار!»

— سىزبەن قاتار ساحناعا كەلگەن، اتاقتى قانشاما انشىلەر بار. نەگە سول سايتتار تەك ءسىز تۋرالى جازۋعا قۇمار؟ سەبەبى نەدە دەپ ويلايسىز؟

— بىلمەيمىن…. مەن ءبىر كۇنى ءبىر جۋرناليستكە سۇحبات بەرگەن ەدىم. ول: «ون جىل بۇرىن ءسىزدىڭ اندەرىڭىز حيت بولدى. نەگە قازىرگى ۋاقىتتا سىزدە حيت ءان جوق؟-دەگەندە ، -«ويتكەنى ول كەزدە مەن قاتتى عاشىق ەدىم. ول كىسىنىڭ باسى بوس ەمەس ەدى. مەنىڭ سول كەزدەگى كۇيزەلىسىم، ءساتسىز ماحابباتىم سول اندەردىڭ شىعۋىنا سەبەپ بولدى»- دەپ جاۋاپ بەرگەنمىن. سويتسەم 4 كۇننەن كەيىن «اجىراسقاننان كەيىن وتباسىلى ادامدى قۇلاي ءسۇيدىم!» دەپ جازىپ قويىپتى. ال، مەن ەشقانداي ارتىق ويسىز، حيت تۋرالى سۇراعاندا شىن كوڭىلدەن اشىق جاۋاپ بەردىم عوي. «وي، بىلمەيمىن، ءقازىر ءبارى تويدىڭ ءانىن ورىنداعاسىن…» دەپ قىسقا جاۋاپ بەرە سالۋىما دا بولار ەدى. قايدان بىلەيىن، سايتقا كىرىپ قالسام قانشاما پىكىر جازىپ، جۇرت شۋلاپ جاتىر. كەيبىر اعالاردى وتباسىنان ايىرىپ، كۇيەۋگە شىعىپ العان انشىلەرگە ەل ولاي جابىلماعان شىعار. بۇل ماعان اۋىر بولدى. ءيا، مەن بارىنشا شىنايى جاۋاپ بەرۋگە تىرىسامىن. ءبىراق، سايتتاردىڭ وسىلاي رەيتينگ قۋىپ، بۇيرەكتەن سيراق شىعاراتىنى اشۋىما تيەدى. تەك سايتتار ەمەس، اناۋ ءبىر «ەل اۋزىندا»، «جۇلدىزدار جارقىرايدى» دەگەن باعدارلامالار دا جوقتان بار شىعارىپ كەسىپ-كەسىپ انا ءسوزدى اندا، مىنا ءسوزدى مىندا قويىپ، جالعاپ-جالعاپ بىردەڭەلەردى جاساپ قويادى. ودان كەيىن ءقايتىپ رەنجىمەيسىڭ؟ ايتقىڭ دا كەلمەيدى، سويلەگىڭ دە كەلمەيدى، ءتىپتى باسقا مەملەكەتكە قاشىپ كەتكىڭ كەلەدى…

— وسىدان 5 جىل بۇرىن جاعداي باسقاشا ەدى…

— ءيا، كەلىسەمىن. بۇرىن مۇنداي ەمەس ەدى!

— بۇرىنعى كەزدى اڭسايسىز با؟

— ارينە، بۇرىنعى كەزدى قاتتى اڭسايمىن. ول كەزدە «ينستاگرام»، «فەيسبۋك» دەگەن جوق قوي. ول كەزدە ءارتىستى كورۋ دەگەن ارمان. تەك كونسەرتكە بارعاندا عانا كورەدى، بولدى! ءبىر كونسەرتىمدە ادامدار مەنى كورۋ ءۇشىن گريمەركانىڭ ەسىگىن سىندىرىپ كىرىپ كەتە جازداعان. ءقازىر ءارتىس دەگەن ويىنشىق بوپ قالدى عوي. الدە ءارتىستىڭ باعاسى قۇلاپ قالدى ما..؟ وسىنىڭ بارلىعىنا وسى الەۋمەتتىك جەلىلەر كىنالى دەپ ويلايمىن.

— ال، ادامدار مادەنيەتتەن الشاقتاپ بارا جاتىر دەپ ويلامايسىز با؟

— ءيا،مۇنىڭ راس. ينستاگرامدا مەنى بوقتايدى. ءتىپتى ءبىر قىز قاتتى بوقتاعان، ونى تاۋىپ الىپ ميليسياعا اپارعاندا جىلاعان. وسى كەلەڭسىز وقيعادان كەيىن، جۇرەگىم اۋىرىپ، ينستاگرامدى جاۋىپ تاستاعانمىن. ينستاگرام ماقۇل، جاستار وتىرادى دەلىك، ال فەيسبۋكتە كوپتى كورگەن، ەگدە جاستاعى ازاماتتار، ازاماتشالار وتىر. ولار دا نەشە ءتۇرلىنى جازادى.

— «ءبىر سوزىڭىزدە شەتەلگە كوشىپ كەتكىم كەلەدى» دەدىڭىز. كوشىپ كەتۋگە نە كەدەرگى؟

— ەشقانداي دا كەدەرگى جوق. بالامنىڭ وقۋى ءبىتسىن دەپ وتىرمىن. بالامدى توعىزىنشى سىنىپتان كەيىن امەريكاعا كوللەدجگە بەرگىم كەلىپ ەدى. بالام بارسا ، مەن دە كەتەمىن دەپ ويلاعانمىن. ءبىراق اينالامداعى جاقىندارىم: «بالا تىم كىشكەنتاي، ەرتە جىبەرمە» دەپ كەڭەس بەردى. بىردە ءبىر تانىسىم: «ءسىز اۋىلدى تۇردىڭىز عوي؟»- دەپ سۇرادى. مەن: «ء-يا، تۇردىم» دەدىم. ول «سوسىن الماتىعا كەلدىڭىز عوي…» دەدى، مەن تاعى «ء-يا!» دەدىم. سوسىن ول: «ەندى اۋىلعا باراسىز با؟» دەگەنىندە «-جوق، بارمايمىن!» دەپ جاۋاپ بەردىم. سول سياقتى ءبىر تال بالام مەملەكەتكە كەلمەي قويا ما، قازاق بولماي كەتە ما دەگەن سۇراقتار دا ويلاندىردى.

— وتاندىق ديزاينەرلەرمەن نەگە رەنجىسىپ ءجۇرسىز؟

— مەن انىقتاپ سۇراستىردىم، بۇل تاپسىرىس بولعان ەكەن. ءۇش ديزاينەرگە دە «مەرۋەرت تۇسىپبايەۆا تالعامسىز كيىنەدى!» دەپ ايتقىزعان. وسى سىزدەردىڭ سايتتارىڭىز ارقىلى ايتايىن، وقىسىن!

ەگەر مەن ەڭ تالعامى تومەن ءارتىس بولسام، وندا ءبىزدىڭ ەستراداداعى انشىلەردىڭ ساحنالىق ءسانى (كيىمى) «وتە جوعارعى دەڭگەيدە» ەكەن. ويتكەنى ساحنادا سەمىرىپ كەتكەن، سالپى ەتەك ءبىزدىڭ قىزدارىمىز، اپكەلەرىمىز، سىڭىلىلەرىمىز كوپ. مەن ءوزىمدى ولاردىڭ قاسىندا تالعامسىزبىن دەپ سانامايمىن. ونىڭ ۇستىنە مەن بۇگىنگى تاڭدا قالاعان كيىمىمدى ساتىپ الا الاتىن جاعدايدامىن.

— ءسىز ءتىپتى ولاردىڭ جۇمىسى ساپاسىز دەپ تە سوكتىڭىز. ونى نەگە سۇيەنىپ ايتتىڭىز؟

— دۋبايدا جۇرگەنىمدە ءبىر كويلەگىمە القا كەرەك بولدى. ول القانى الا سالا مەن ساماراعا ۇشۋىم كەرەك. كويلەگىم قازاقي ستيلدە قازاقستاندا تىگىلگەندىكتەن وعان سونداي ويۋلارى بار كوكشىل القا قاجەت ەدى. كومەكشىمە «تەز ارادا مىنا كويلەككە القا تاۋىپ سالىپ جىبەرشى، كاۋمەنوۆاعا بارا سال» دەدىم. ول ايدا كاۋمەنوۆانىڭ بۋتيگىنە بارعان دا 98 مىڭعا ءبىر القانى العان. ونى ماعان جەدەل جەتكىزدى دە ءبىز بىردەن ساماراعا ۇشىپ كەتتىك. سوندا بارىپ الگى القانى كورەيىن دەپ اشىپ قالسام، قۇداي ساقتاسىن، قىتايدىڭ 5 مىڭ تەڭگەلىك سىرعالارىنان تىككەن. ونىڭ تىگۋى بار… ايدانىڭ اتى بار… جارايدى، سونىڭ ءبارى 50 مىڭ تەڭگە بولسىن، ال 98 مىڭ دەگەن ەكى مىڭ تەڭگەسى كەم 100 مىڭ تەڭگە عوي. «جارايدى، قۇرىسىنشى ،تاعا بەرەيىنشى» دەپ تاقىرىپتى جابا سالعام. سوسىن ايدا مەنى تالعامسىز دەگەندە الگى سۋرەتتى فەيسبۋككە شىعاردىم. اركىم ءوزىنىڭ جانىن قورعايدى عوي. «مىنە، بۇگىندە بىزگە نە كيۋ كەرەك، قالاي كيىنۋ كەرەك، ءسان مەن سىمباتتى ۇيرەتىپ جۇرگەن ديزاينەرلەرىمىزدىڭ دۇنيەسى وسىنداي بولسا، بىزدە قايدان تالعام بولسىن»-دەپ جازدىم. ايتپەسە ول القانى العانىما ءبىر جارىم جىل بولعان، جاڭاعى ساپاسىز سىرعالارى قايدا ءتۇسىپ قالعانىن دا بىلمەيمىن. سوندا دا ەشكىمگە ايتپاي، ەشقايدا جاريالاماي تىپ-تىنىش جۇرگەنمىن. مەن ەشكىمگە وزدىگىمنەن تيىسپەيمىن، ءبىراق تيىسسە وڭدىرمايمىن. سول پوستتى جاريالاعاننان كەيىن وتە كوپ ادام ماعان حات جازدى. ءبارى دە سول ايدادان پالەن باعاعا العان كويلەكتەرىنىڭ ساپاسى سىن كوتەرمەگەنىن جارىسا جازدى.

— بۇنى ەستىگەن ايدا كاۋمەنوۆا سىزگە حابارلاسپادى ما؟

— مايرا ءىلياسوۆا حابارلاسىپ «فەيسبۋكتەگى» سۋرەت پەن جازبانى الىپ تاستاپ، ايتىسپاي ءوزارا كەلىسىمگە كەلۋگە سەبەپكەر بولدى. ناتيجەسىندە ادەمى شەشىمگە كەلدىك. ايدا اقشامدى قايتارىپ بەردى (كۇلدى). القانى الىپ قالدى. ەندى ەرتەڭ پورتۋگالياعا ۇشپاقپىن، سول جاققا بارىپ 98 مىڭعا باسقا جاقسى برەند القا ساتىپ الامىن.

— ال، جادوعا قاتىستى نە ايتاسىز؟

— ەندى ول كىسى اۋەسقوي ديزاينەر، اۋەسقوي پروديۋسەر، اۋەسقوي ءبيشى عوي. بۇگىنگى كۇنى اۋەسقوي دەگەن ءسوز مەن ءۇشىن ناعىز باعاسىز… مەن وعان اپكە رەتىندە ءبىر عانا اقىل ايتار ەدىم: «بىرەۋدى سىناماس بۇرىن ادام ءوزىنىڭ دەڭگەيىن سارالاپ، باعالاپ كورۋ كەرەك!». مەن دە ديزاينەر بولا الامىن. كىشكەنتايىمنان ءىس تىگۋ مەن توقىما توقۋعا قاتتى اۋەس بولدىم. سەنەسىز بە، كيىم جوق كەزدەردە مەن بارلىق تۋعان-تۋىستارىما، وزىمە كەرەكتىڭ ءبارىن توقىپ الاتىنمىن. مەن وتە جىلدام ءارى تىڭعىلىقتى توقيمىن. ەندىگى ويىم ءبىر ديزاينەرمەن، ەرلان جولداسبەكپەن بە قوسىلىپ توقىمادان كوللەكسيا جاساسام با دەپ وتىرمىن. مەنى سىناعان ديزاينەرلەرگە وسىلاي جاۋاپ بەرمەكپىن. بىرەۋدى جالداپ توقىتا سالۋعا دە بولار ەدى، ءبىراق مەن قانشا كەرەك سونىڭ ءبارىن ءوزىم توقيىن دەپ شەشتىم. قاشان باستادىم، قاشان اياقتادىم ءبارىن ينستاگرامعا سالىپ، ونلاين كورسەتىپ وتىرامىن.

— ءسىزدى سىنعا العان ديزاينەرلەر وزدەرى ءسىز سياقتى ءىس تىگىپ، توقىما توقي الا ما ەكەن؟

— كۇمانىم بار…

— سىزگە تەگىن الۋ مۇمكىندىگى تۋسا، وتاندىق ديزاينەرلەردىڭ قايسىسىنىڭ كويلەگىن كيەر ەدىڭىز؟

— ەرلان جولداسبەكتىڭ جۇمىستارى قاتتى ۇنايدى، ىزدەپ ءجۇرىپ كورەمىن. ايدا كاۋمەنوۆانىڭ كوللەكسياسى دا جامان ەمەس، ءبىراق ءبارى ءبىر سارىندى. لاريانىڭ ، سالتانىڭ، بەرىك يسمايىلوۆتىڭ كيىمدەرىن تەگىن بەرسە كيەر ەدىم. مەندە بۇل ديزاينەرلەردىڭ ءبارىنىڭ كيىمدەرى بار.

— ال، جادو حانىم ءسىزدى سىناماعاندا، ونىڭ كيىمدەرىن كيەر مە ەدىڭىز؟

— مەندە ونىڭ كيىمى جوق. ءقايبىر جىلى شەتەلگە كونسەرتپەن قازاقشا كويلەك كيىپ بارۋ كەرەك بولدى. جادونىڭ سالونىنا جۇگىرىپ باردىم. انا قويماسىن ءبىر كورسەتتى، مىنا قويماسىن ءبىر كورسەتتى. مەن بۇل جايلى ايتقان ەمەسپىن، ونى كومەكشىلەرى بىلەدى، سەنەسىز بە سەنبەيسىز بە، سول سان ءتۇرلى كيىمدەردىڭ ىشىنەن پروكاتقا وزىمە ءبىر كويلەك تە تاپپادىم…

— مۇمكىن ءسىزدى سىنعا العان ديزاينەرلەردەن كيىنسەڭىز ءسىزدى ماقتايتىن با ەدى؟

— مۇمكىن. ايدا، كەل ساعان كويلەك تىگىپ بەرەمىز دەپ شاقىردى. كورە جاتارمىز، بۇيىرسا كيەرمىز، بۇيىرماسا وزىمىزدە دە، شەتەلدە دە كيىم كوپ.

— «جىبەك 2» تەلەحيكاياسى جايلى ءسىز فەيسبۋك پاراقشاڭىزدا : «بۋگiن «جiبەك-2» سەريالىندا جۋمىسىمدى اياكتايمىن.(كستاتي ،يا سامايا ۆىسوكووپلاچيۆامايا اكتريسا،ۆ سەريالە )كازانشىنىن وز ەركi بار گو…اكشا بiتتi مە؟؟؟كiم بiلسiن؟ايتەۋip ،جانسايانى ،الىسكااااا جيبەريپ جاتىر،،(سەناريستتە وز كولىندا گو)بالاسىدا تۋسiندە كورمەيدi،كورەرمەن تۋگiلi….نە ايتامىز؟؟كازير ارتيست پروديۋسەر -دەگەن كۋدايدىن كۋلى گوي….بipاك،از تۋسسەمدە،ەموسيونالنايا ناگرۋزكا «جiبەك-2»-كوپ بولدى….شارشاپ،اۋىرىپ،تiپتi كارتايىپ كەتتiم….باگاسىن بەرەتiن سiزدەر!!!» — دەپ جازدىڭىز. شىنىمەن دە سولاي بولدى ما؟

— ءيا، بۇل جولعى تۇسىرىلىمدەر قيىن بولدى. شەتەلدە قالاي ەكەنىن بىلمەيمىن، ءبىراق، بىزدە گونورار ون ەكى ساعات جۇمىسقا تولەنىپ وتىردى. ون ەكى ساعات ءبىر ءتۇسىرىلىم كۇنى بوپ ەسەپتەلدى. سول سەريالعا تۇسكەن 5 كۇندە 5 جىلعا قارتايىپ، شارشاپ كەتتىم. پروديۋسەرلەر ماعان ازىراق اقشا تولەۋ ءۇشىن بۇكىل اۋىر ەپيزودتاردى سول ون ەكى ساعاتتىڭ ىشىنە تىققان ەكەن، «سىڭبىرۋگە» ۋاقىت بولمادى. 5 كۇن قاتارىنان دەمالىسسىز جۇمىس ىستەپ اۋىرىپ تا قالدىم. ءبىراق ءبىزدىڭ ەلدە پروديۋسەر-قۇداي. اكتەردىڭ جاعدايى نە بوپ جاتىر…، ول اۋىرىپ قالمادى ما دەگەن سياقتىلار ەش ەسكەرىلمەيدى. پروديۋسەر نە دەسە سول بولادى.ءبىزدىڭ ەلدە وتاندىق سەريالداردى ءتۇسىرۋ قولعا الىندى عوي. قانشاما قاراجات ءبولىنىپ جاتىر. ءبىراق ونىڭ قايدا كەتىپ جاتقانىن ءبىر قۇداي بىلەدى، ءبىر پروديۋسەر بىلەدى. ول اكتەرلەرگە جۇلمالانىپ جەتكەنشە تيىن بوپ قالادى. ول تيىنعا كەلىسپەيىن دەسەڭ سەنىڭ ورنىڭا ودان دا تومەن باعاعا تەاتردان تانىمال بولۋدى ارمانداپ جۇرگەن كەز كەلگەن اكتەردى شاقىرىپ الىپ تۇسىرە بەرەدى. ءبىزدىڭ سەريالدارىمىزدىڭ ساپاسىنىڭ تومەندىگى دە سودان بولار. بىزدە نە كوپ اكتريسا كوپ، ونەر اكادەمياسىن وقىماعان دا اكتريسا، وقىعان دا اكتريسا، ءوزىن-وزى اكتريسا دەپ اتاپ العاندار، تۋما-تۋىس، قۇدا-جەكجاتتاردىڭ ارقاسىندا اكتريسا بولىپ جۇرگەندەر دە كوپ. بىزدە امال جوق، اتاقتىمىن دەپ كوپ اقشا سۇراساڭ اناۋ، سۇراماساڭ مىناۋ! سەريالدىڭ پروديۋسەرىنىڭ ايتۋىنشا، مەن وسى سەريالدا گونورارى ەڭ جوعارى اكتريسا ەكەنمىن. سەناريي وزدەرىنىڭ قولىندا تۇر عوي.(كۇلىپ الدى) سوندىقتان…مەنىڭ كەيىپكەرىم وتە الىسقا كەتەدى. ءتىپتى بالاسىنىڭ دا تۇسىنە كىرمەيتىن الىسقا. تۇسكە كىرۋ ءۇشىن دە مەن ويناۋىم كەرەك، وعان دا اقشا تولەنۋ كەرەك دەگەندەي. ءتۇس كورۋ دە قىمبات بوپ وتىر عوي…

— (كۇلىپ) مەرۋەرت حانىم، سۇقباتتاسقانىڭىز ءۇشىن راقمەت! ساتتىلىك تىلەيمىن!