جاقىندا شىنجاڭ ۇيعىر تەلەارناسىنىڭ  «شىرىن ءتۇس» باعدارلاماسىنىڭ تاقىرىبىنا ارقاۋ بولعان قانداسىمىز زايرا اسەيىنعازى قىزىنىڭ ىزگى ىستەرى جۇڭگو حالقىن تەبىرەنتىپ، الەۋمەتتىك جەلىلەردە قىزۋ تالقىلانىپ جاتىر، دەپ حابارلايدى قازاقپارات.

باعدارلامادا بەلگىلى بولعانداي، زايرا اسەيىنعازى قىزى اتا-اناسىنان ايىرىلعان جارىمجان بالالارعا ارنايى ورتالىق اشقان ەكەن. ول وسى  كۇنى اتالعان ورتالىقتا ءار ۇلت وكىلدەرىنەن 62 مۇگەدەك ءارى جەتىم بالالاردى ءوز قامقورلىعىنا الىپ،  وقىتىپ، ءتۇرلى قاجەتتىلىكتەرىنە كومەكتەسۋدە. زايرا بۇل ءىسىن ءوزىنىڭ باسىنان وتكەن تاعدىرىمەن بايلانىستىرادى. «مەنىڭ ءوزىم 4 جاسىمدا جەتىم قالدىم. ەر جەتۋىمە، ومىرىمدەگى قيىن كەزەڭدەردى ەڭسەرۋگە كوپتەگەن مەيىربان ادامدار كومەك بەردى. كىشكەنە كەزىمدە تۇرمىسىمىز وتە تومەن بولدى. سوندا، كەيىن ەر جەتكەندە، ءوزىم سەكىلدى جەتىم بالالارعا جاردەم قىلسام، ماڭدايىنان سىيپاسام دەپ ارماندايتىنمىن. مەكتەپ بىتىرگەننەن كەيىن جوعارى وقۋ ورنىنا تۇسۋگە قاراجاتىم بولمادى. سوسىن زاۋىتقا تۇرىپ، اۋىر جۇمىستار ىستەۋگە ءماجبۇر بولدىم»، - دەپ اڭگىمەلەيدى زايرا اسەيىنعازى قىزى.

وسىلايشا ەرتە جاستان ەڭبەككە ارالاسقان ول كوپتەگەن قيىنشىلىقتاردى باستان كەشكەنىن ايتادى. سىرقاتتانىپ توسەك تارتىپ قالعان كەزدەرى، ءتىپتى، 40 كۇندەي تەك قۇرعاق نان جەپ، قايناعان سۋمەن وزەك جالعاعان كەزدەر بولىپتى. ايتسە دە، تاعدىردىڭ اۋىر سىناعىن ەڭسەرۋگە مەيىربان جانداردىڭ كومەگى كوپ سەپتىگىن تيگىزگەن. «اۋرۋىم اسقىنعان كەزدە جەكە ەمحاناسى بار ءبىر دارىگەر كىسىنىڭ ارقاسىندا تەگىن ەمدەلىپ، جازىلدىم. بۇل ماعان جىگەر بەردى. اقشام جوق بولسا دا، ومىردە جاقسى ادامدار بار ەكەنىنە كوزىم جەتتى. كەيىن كوشەدە نان سۇراپ، قايىر تىلەپ جۇرگەن ءبىر اجەنى كورىپ، اڭگىمەگە تارتتىم. ول كىسىنىڭ بالالارى ومىردەن ەرتە وزىپتى.  مەن اجەگە كومەكتەسىپ، وعان بالا بولدىم. وسىلايشا ومىردەن وزىمە كوپتەگەن انالار، اكەلەر تاپتىم. ءوزىم كورگەن قيىندىقتاردى بۇگىنگى جەتىمدەر كورمەسە ەكەن دەدىم. سول ءۇشىن اتا-اناسىنان ايىرىلعان مۇگەدەك بالالاردى جيناپ، باۋىرىما باستىم. ولاردىڭ ونەرىن ۇشتاۋعا، ومىردەن ءوز ۇلەستەرىن الۋعا بارىنشا جىگەرلەندىرىپ كەلەمىن. بۇگىندە 8 ۇلت وكىلىنەن 62 بالام بار.  ولاردىڭ ءبىرىنىڭ اكەسى جوق، ءبىرىنىڭ شەشەسى جوق، بىرەۋىنىڭ اياعى جوق، ءبىرىنىڭ كوزى كورمەيدى»، - دەيدى زايرا اسەيىنعازى قىزى.

ونىڭ ايتۋىنشا، بۇل الەم جاقسى ادامدارعا تولى. ومىردە بارلىق ادام تەڭ. الايدا، سولاي بولا تۇرا، ادامدار اقشادان، جاقسى ومىردەن جالىعۋى مۇمكىن، ال ىزگىلىك پەن ماحابباتتان، قامقورلىق پەن مەيىرىمنەن ادام بالاسى ەش جالىقپايدى. «مەن بۇل جەتىمەكتەردى ىزگى-نيەتتى جانداردىڭ كومەگىنىڭ ارقاسىندا باعىپ جاتىرمىن. كومەك قولىن سوزاتىندار كوپ. ءقازىر بالالارىمنىڭ 20-سى ۇيلەندى. مەن وسى ورتادا ءجۇرىپ كوپتەگەن اسەرلى، ىزگى ىستەرگە كۋا بولدىم.  بىردە 23 جاستاعى ون ەكى مۇشەسى ساۋ، وقىعان قىز كەلىپ، كوزى مۇلدەم كورمەيتىن زاعيپ جىگىتپەن باس قوستى، وتاۋ قۇردى. اينالاسىنداعى ءبىراز جۇرت وعان: «سەن وقىعانسىڭ، بولاشاعىڭ بار قىزسىڭ، نەگە مۇگەدەك جانعا ءوز تاعدىرىڭدى  بايلايسىڭ»، دەپ قارسى بولدى. سوندا الگى قىز: «مەن بۇل دۇنيەدەن ەشتەڭە ىستەمەي وتسەم دە، وسى جىگىتتىڭ قوس جانارى بولايىن»، - دەدى. مىنە وسىدان ارتىق قانداي ادامگەرشىلىك، قانداي ىزگىلىك بار»، - دەپ كوزىنە جاس الادى زايرا اسەيىنعازى قىزى.   باعدارلاما بارىسىندا، زايرا اسەيىنعازى قىزىنىڭ تاربيەسىندەگى جارىمجان قازاق قىزى ءان سالدى جانە قولى جوق، قۇلاعى ەستىمەيتىن، سويلەي المايتىن بالانىڭ اۋزىمەن، اياعىمەن سالعان سۋرەتتەرى كورسەتىلدى. سونىمەن بىرگە باعدارلاماعا قوناق رەتىندە شاقىرىلعان كاسىپكەرلەر  قايسار قازاق قىزىنىڭ مەيىرىمدىلىگىنە، ەرلىگىنە العىستارىن ءبىلدىرىپ، ءوز كومەكتەرىن جاسادى.