قاراشانىڭ 18 كۇنى الماتى قالاسى، ءو.جولداسبەكوۆ اتىنداعى ستۋدەنتتەر سارايىندا ەل تاۋەلسىزدىگى مەن «قازاق كوشىنىڭ» 25 جىلدىعىنا وراي «كوش جانە كوشباسشى» مەرەكەلىك كونسەرتى وتەدى. وسى كەشتە ق ر ەڭبەك سىڭىرگەن ءارتىسى رامازان ستامعازييەۆ ونەر كورسەتپەك. اتالعان كەش تۋرالى رامازان ءومىرالى ۇلىنىڭ شاعىن سۇحباتىن نازارلارىڭىزعا ۇسىنىپ وتىرمىز.
— رامازان اعا، الداعى جۇما تاۋەلسىزدىگىمىزدىڭ 25 جىلدىعى، اتاجۇرتقا ميلليون قازاقتى قوسقان 25 جىلدىققا ارنالعان ۇلكەن مەرەكەلىك كەش وتكەلى جاتىر. وسى كەشتىڭ ماڭىزدىلىعى جايلى ءوزىڭىزدىڭ پىكىرىڭىزدى بىلسەك دەپ ەدىك؟
— بۇل ەل تاريحىندا اتى التىن ارىپپەن جازىلاتىن ۇلكەن مەرەيلى توي. ەگەمەندىككە قول جەتكىزگەن شاعىمىزدا تاعدىردىڭ قاتال جازۋىمەن كەزىندە شەكارا اسىپ كەتكەن قانداستارىمىزعا قۇشاعىمىزدى اشتىق. تۋعان جەرىن اڭساپ وتكەن بابالاردىڭ ۇرپاعى اتا اماناتىن ارقالاپ قازاق جەرىنە ءتۇتىن تۇتەتۋگە كەلدى. قانداستارىمىزبەن بىرگە قازاق جەرىنە ءسالت-داستۇر، ۇلتتىق سالت-سانا، ۇلتتىق ءبىتىم-بولمىس تا ورالدى. سوندىقتان بۇل مەرەيتوي قازاقتىڭ رۋحاني جاڭارۋىنىڭ تويى دەپ قابىلداساق قاتەلەسپەسپىز.
"كوش جانە كوشباسشى" مەرەكەلىك كونسەرتى قوجا احمەت ياسساۋي بابامىزدىڭ 850 جىلدىعى، كەشەگى قازاق حاندىعىنىڭ 550 جىلدىعى، الاش قوزعالىسىنىڭ 100 جىلدىعى مەرەيتويلارىنىڭ جالعاسى. ءارى ەل ىشىندە وتكىزىلىپ جاتقان مادەني-ساياسي ءىس-شارالاردىڭ قورىتىندىسى ىسپەتتى. سەبەبى كونسەرت ەلدىكتى وياتۋ، نامىستى قايراۋ، رۋحاني سەرپىلىس اكەلۋ، وتكەن-كەتكەن دۇنيەلەرگە كوز جۇگىرتۋ جانە وي باعامداۋدى ماقسات تۇتادى.
— قازاق كوشى تورتكۇل دۇنيەگە تارىداي شاشىلعان بارشا قازاق ءۇشىن ەستەن كەتپەيتىن ۇلى كوش. قيىردا جۇرگەن قازاقتى وتانىنا قايتارىپ، تۋعان جەرىمەن تابىستىردى.
— كەرەگەمىز كەڭەيدى. اتاپ ايتقانىمداي، جۇتىلىپ بارا جاتقان سوناۋ تۇكپىردەگى بارشا ءبىزدىڭ ۇلتتىق قۇندىلىقتار ورالدى. قازاقتىڭ سانى كوبەيدى. جاتتا جۇرگەن باۋىرلار تۋعان جەردىڭ توپىراعىمەن تابىستى. مىڭداعان قازاقتىڭ جۇرەگىندەگى ارمان-شەرى، ساعىنىشى باسىلدى. سوندىقتان، الداعى جۇما كۇنى وتەتىن كەشكە بارشا قازاق بالاسى كەلسە دەيمىن. بۇل كەش بۇرىنعى كەشتەردەن وزگەشە! بۇل كەشتە قازاقتىڭ دومبىراسىن كۇمبىرلەتىپ، كەشەگى بابالاردىڭ ءانىن ايتىپ، جىرىن جىرلاپ، شىن جۇرەكتەن ەلدىگىمىز، ەرلىگىمىز ءۇشىن قۋانامىز!
سۇحباتتاسقان: ايجان باقداۋلەت قىزى
