تۇڭعىشباي جامانقۇلوۆ كەلتىرگەن شىعىنىڭ ءبىر بولىگىن قايتاردى. بۇل تۋرالى بۇگىن ق ر پارلامەنتى ءماجىلىسىنىڭ جالپى وتىرىسىنان كەيىن ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ ءتوراعاسى قايرات قوجامجاروۆ وسىلاي ءمالىم ەتتى، دەپ حابارلايدى قازاقپارات.

وسىعان دەيىن جامانقۇلوۆ شىعىندى ءىشىنارا وتەگەندىگى حابارلانعان ەدى، بۇل تۇرعىدا قوجامجاروۆ اكتەردىڭ تولەگەن قارجىسىن ناقتىلاپ ءوتتى. اگەنتتىك باسشىسىنىڭ سوزىنە قاراعاندا، بۇگىندە تۇڭعىشباي جامانقۇلوۆ 6 ملن. تەڭگەگە جۋىق قارجىنى قايتاردى. سونىمەن قاتار «قازاقفيلم» الدىنداعى بارلىق بەرەشەگىن تولەيتىندىگى تۋرالى مىندەتتەمەنى وزىنە الىپ وتىر. ەسكە سالا كەتەيىك، كۇدىكتى رەتىندە ۇستالعان تانىمال اكتەر كەپىلزاتپەن بوساتىلىپ، قازىرگى كەزدە تۇڭعىشباي جامانقۇلوۆ ۇيىندە. بۇدان بۇرىن حابارلانعانداي، قاراشا ايىنىڭ باسىندا «جامانقۇلوۆ ءوز كىناسىن مويىندادى» دەگەن اقپارات تاراعان بولاتىن. ول 2 قاراشادا قارجىنى جىمقىردى دەگەن كۇدىكپەن ۇستالدى. تەرگەۋ «قازاقفيلم» اق ءفيلمنىڭ باستاپقى ازىرلىك جانە دايىندىق كەزەڭدەرىنە «ت.ك.Turan Universal Business» جشس-نا 79 ملن تەڭگە بولگەنىن انىقتادى. بۇل سومانىڭ 69 ملن تەڭگەسىن ونىڭ قۇرىلتايشىسى بولىپ تابىلاتىن «ت.ك.Turan Universal Business» ج ش س ارقىلى كارتينانىڭ باس پروديۋسەرى تۇڭعىشباي جامانقۇلوۆ جىمقىرعاندىعى حابارلاندى.