جاقىندا الماتىدا كەرەمەت بوكس كەشىن وتكىزىپ، قارسىلاسى پاتريك اللوتەيدى ۇپاي سانىمەن جەڭگەن قانات يسلامنىڭ  NUR.KZ پورتالىنا ەكسكليۋزيۆتى سۇحباتى جاريالاندى. بۇل سۇحباتتا قانات ءوزىنىڭ جەكپە-جەگىنە قاتىستى «قامشى» پورتالىندا كوپ تالقىلانعان كۇماندى اڭگىمەلەر تۋرالى دا ايتقان. «قامشى» پورتالى قانات يسلامنىڭ سۇحباتىن ىقشامداپ وقىرمان نازارىنا ۇسىنادى.

 - قانات، ەلىمىزدە بۇرىن سوڭدى بولماعان كاسىپقوي بوكس كەشىن وتكىزدىڭىزدەر. اڭگىمەمىزدى الدىمەن وسى بوكس كەشىنەن باستايىقشى. ۇيىمداستىرۋدا قانداي قيىندىقتار بولدى؟

- كوپ ادام سياتىن ارەنادا ءتۇرلى-تۇستى جارىقتارمەن شوۋ جاسالعان الەمدىك دەڭگەيدەگى كاسىپقوي بوكستى تەلەارنادان عانا كورىپ، ونى امەريكا نەمەسە گەرمانيادا عانا وتكىزۋگە بولادى دەپ ويلايتىندار جوق ەمەس. ءبىراق، وسى جارىستان سوڭ كوپ ادامنىڭ ويى وزگەردى. شەتەلدەن كەلگەن قوناقتار: «قانات نەگە امەريكادا جەكپە-جەك وتكىزىپ ءجۇر، مۇندا ءبارى بار عوي» - دەپ تاڭ قالىپتى. بۇل جەكپە-جەكتى شەتەلدىڭ بىرنەشە تەلەارنالارى كورسەتكەنىن بىلەسىزدەر. كاسىپقوي بوكس كەشى وتە جوعارى باعاعا يە بولدى.

«Golden Boy Promotions»، «Top Rank Promotions» جانە دە كوپتەگەن پروموۋتەرلىك كومپانيالار بۇگىنگە دەيىن حابارلاسىپ، قازاقستاندا جەكپە-جەك ۇيىمداستىرۋعا ۇسىنىس ايتىپ جاتىر. بىزدە ءقازىر ءبارى بار. ەلباسىمىز بارلىق جاعداي جاساپ جاتىر. ۇلكەن ارەنا سالىندى. وسى جارىستىڭ ءوتۋىن الماتى قالاسىنىڭ اكىمى باۋىرجان بايبەك اعامىز قولداپ، باۋىرجان وسپانوۆ اعام باستاپ كەڭەس راقىشيەۆ، ايدىن راحىمبايەۆ اعالارىم دەمەۋشىلىك جاسادى. شەتەلدەن تورەشىلەر، WBA، WBO، UBC تۇجىرىمدارىنىڭ وكىلدەرى كەلىپ، جارىستىڭ جوعارى دەڭگەيدە ءارى ءادىل ءوتۋىن باقىلادى. جارىسقا جوعارى باعا بەردى.

مەنىڭ ءبىر ارمانىم ورىندالدى. وسىنداي بوكس كەشىن قازاقستاندىقتارعا سىيلاعانىمىزعا وتە قاتتى قۋانىشتىمىن! 12 مىڭدىق ارەناعا 15 مىڭ ادامنىڭ كەلۋى، قانشا ادامنىڭ دالادا كىرە الماي قالعانى مۇنىڭ ءبارى قازاقستاندىقتاردىڭ سپورتقا، بوكسقا دەگەن قىزىعۋشىلىعىنىڭ دالەلى.

 - قانات ءسىز وسى ۋاقىتقا دەيىن 12 راۋندتىق جەكپە-جەك وتكىزىپ كورمەدىڭىز. قارسىلاسىڭىز دا وسال بوكسشى ەمەس. كوردىك. 12 راۋند بويى جويقىن سوققىڭىزعا شىداعان ەڭ العاشقى مىقتى قارسىلاس وسى. دەگەنمەن، كوپشىلىك سىزدەن نوكاۋت كۇتتى. قۇلاتا الماعانىڭىزدىڭ باستى سەبەبى نەدە؟

- بوكستا ءبىر سوققىمەن دە جۇزدەگەن سوققى ۇرىپ تا جەڭىسكە جەتۋگە بولادى. بۇل سونداي قىزىق ءارى قيىن سپورت. مەن بۇل جەكپە-جەكتە 12 راۋندقا دايىندالدىم. ويتكەنى مەنىڭ قارسىلاسىمنىڭ نوكاۋتىنىڭ ءوزى مەن وتكىزگەن جەكپە-جەكتەن كوپ. وزدەرىڭىز كوردىڭىزدەر، بار كۇش-جىگەرىمدى سالدىم. رەتى كەلسە قۇلاتۋدى دا ويلادىم. ءبىراق قارسىلاسىمنىڭ تاكتيكاسى قاشىپ ءجۇرىپ بوكستاۋ بولدى. ونداي قارسىلاستاردى جىلدام قۇلاتۋ وڭاي ەمەس. بۇل جەكپە-جەك ماعان ۇلكەن تاجىريبە بولدى. ەندى مەن بارلىق قارسىلاسىما دايىنمىن.

 - ءسىز «WBA fedelatin» بەلبەۋىڭىزدى قورعاپ، «WBO intercontinental» مەن «UBC» تۇجىرىمى بويىنشا الەم چەمپيونى اتاعى ءۇشىن جۇدىرىقتاستىڭىز. ءبىز بىلەتىن اقپارات وسى. ءبىراق، جەكپە-جەكتەن سوڭ WBA وكىلدەرى جەكپە-جەكتى ەسەپكە الماپتى. سەبەبىن ءالى ەشكىم اشىپ ايتقان جوق. پروموۋتەرىڭىز نەلسون لوپەس تا ءالى رەسمي حابارلامادى. وسى وقيعاعا بايلانىستى ءسىز نە ايتا الاسىز؟

- بۇل بىزدەگى بوكس جانكۇيەرلەرىنىڭ دەڭگەيىنىڭ وسكەندىگى. كاسىپقوي بوكسقا دەگەن قىزىعۋشىلىق ارتقانىنىڭ بەلگىسى. وسى جارىسىما WBA – ءدىڭ جاۋاپتى ادامى كەلدى. سالماق ولشەۋدە بەلبەۋدى ءوزى ۇستاپ تۇردى، جەڭگەن كەزىمدە رينگكە شىعىپ بەلىمە تاقتى. «WBA fedelatin» مەن ءۇشىن باعىنعان بەلەس. مەن ونىڭ چەمپيونىمىن. بىرنەشە رەت قورعادىم. ءتىپتى 90 كۇننىڭ ىشىندە كىم مەنى جەكپە-جەككە شاقىرادى ەكەن دەپ تە كۇتتىم. ەشكىم شاقىرمادى. بۇل بەلبەۋدى سۇيرەتىپ جۇرە بەرگىم كەلمەيدى. بۇل بەلبەۋ كەلەسى بيىككە كوتەرىلۋ ءۇشىن باسپالداق قانا. نەگىزگى ماقسات ءۇشىن جۇمىس جاساۋ كەرەكپىز.

مەنىڭ ماقساتىم الەم چەمپيونى بولۋ. سول ءۇشىن تەر توگىپ ءجۇرمىن. الەم چەمپيونى كىم؟ لارا، كوتتو، كانەلو. مەنىڭ بوكسپەن اينالىسقان ۋاقىتىم ولاردان ارتىق بولماسا كەم ەمەس. ءقازىر كەز-كەلگەنىمەن جۇدىرىقتاسۋعا دايىنمىن. وسى ورايدا ايتا كەتكىم كەلەدى، WBAء-دىڭ بەلبەۋى ءۇشىن الاڭداپ، رەيتينگ سايتتا نەگە كورسەتىلمەگەن دەپ ۋايىمداعان جانكۇيەرلەرىمە، جۋرناليستەرگە، كاسىپقوي بوكس فەدەراسياسىنىڭ ۆيسە-پرەزيدەنتى ۆيكتور دەميانەنكو مىرزاعا العىسىم شەكسىز. وسىنداي جاناشىرلارىمنىڭ بارى ماعان ەرەكشە كۇش بەرەدى.

 - كەلەسى جەكپە-جەكتىڭ دە اۋىلى الىس ەمەس شىعار. قاي ايعا جوسپارلاپ وتىرسىزدار؟ تيتۋلدىق كەزدەسۋ بولادى ما؟

- بىزگە تۇرىپ قالۋعا، كوپ كۇتۋگە بولمايدى. چەمپيوندىق اتاق ءۇشىن بولماسا دا ماعان ءقازىر جەكپە-جەك قاجەت. سول اتاققا ءبىرتابان جاقىنداي بەرۋ كەرەك. وسى ۋاقىتقا دەيىن بىرنەشە رەت لاراعا جەكپە-جەككە شىعۋعا ۇسىنىس تاستادىق. باس تارتتى. ەگەر مەن رەيتينگتە جوعارىلاسام، وعان باس تارتۋعا مۇمكىندىك بولماي قالادى. سول ءۇشىن كوبىرەك جەكپە-جەك وتكىزىپ، رەيتينگتە جوعارىلاۋ كەرەك. تەك WBA ەمەس، بارلىق تۇجىرىم بويىنشا چەمپيون بولۋ كەرەكپىن. بۇل مەنىڭ ماقساتىم.

 - «ەكسپو-2017» حالىقارالىق كورمەسى قارساڭىندا قانات يسلام قازاقستاندا تاعى ءبىر جەكپە-جەك وتكىزەدى دەگەندى ەستىدىك. كەلىسىمشارتتار جاسالدى ما؟

- «ەكسپو» كورمەسى ەلىمىز ءۇشىن ۇلكەن مۇمكىندىك. كورمەگە كەلگەن ءجۇزمىڭداعان تۋريستەرگە قازاقستاندى تانىستىرىپ، تاريحي جەرلەردى ارالاتىپ قانداي ەل ەكەنىمىزدى كورسەتۋ كەرەكپىز. مادەنيەت جانە سپورت ءمينيسترى ارىستانبەك مۇحامەدي ۇلى جارىستان سوڭ قابىلداپ، ەلباسىنىڭ سالەمىن جەتكىزدى. جەكپە-جەگىمدى كورىپ، جانكۇيەر بولعانىن ايتتى. مينيستر ەكسپو كورمەسى كەزىندە جەكپە-جەك وتكىزۋ تۋرالى ۇسىنىس ءبىلدىردى. ارينە مەن قارسى ەمەسپىن جانە قۋانا قابىلدايتىنىمدى ايتتىم. كەلگەن تۋريستەرگە قازاقستانداعى سپورتتىڭ دەڭگەيىن كورسەتۋگە بارىنشا اتسالىسۋ ازاماتتىق پارىزىم. جاقىن كۇندەرى كەلىسسوزدەر اياقتالىپ قالادى.