تاجىكستان ازاماتتارى جامبىلدىق پوليسەيلەردەن ءجابىر كورگەندەرىن ايتۋدا. سوزدەرىنە سەنسەك، ماسكەۋدەن ءۇش جۇك كولىگىمەن كەلە جاتقان جۇرگىزۋشىلەردى قازاقستاندىق ءتارتىپ ساقشىلارى قورقىتىپ، 250 مىڭ رەسەي ءرۋبلىن تارتىپ العان. تونالعاندار دەرەۋ ارىز جازىپ ۇلگەرگەن سوڭ وسى ىسكە قاتىسى بار دەگەن كۇدىكپەن ەكى ينسپەكتور مەن تاعى ءبىر جەرگىلىكتى تۇرعىن ۇستالىپ وتىر. ءقازىر وسى ىسكە قاتىستى سوتقا دەيىنگى تەرگەۋ جۇرگىزىلۋدە.

بۇل تۋرالى كتك ارناسى حابارلايدى.

قاراشانىڭ ءبىرى كۇنى قىرعىزستان اسۋ ءۇشىن رەسەيدەن كەلە جاتقان ءۇش جۇك كولىگىن جامبىل وبلىسىنىڭ اۋماعىندا ءتارتىپ ساقشىلارى توقتاتادى. ولار جوندەرىنە جىبەرۋ جانە شەكاراعا جول سىلتەۋ ءۇشىن اقشا سۇراپتى. پارا بەرىپ قۇتىلعاندار پوليسيا جول سىلتەۋىمەن ءجۇرىپ، ءتۇن جارىمدا تۇيىق جولعا تىرەلەدى. ارتىنشا سول جەرگە مەملەكەتتىك ءنومىرى جوق جەڭىل كولىكپەن التى جىگىت جەتىپ كەلگەن. جابىرلەنۋشىلەردىڭ ايتۋىنشا، فورما كيگەن ەكەۋى وزدەرىن پوليسەيمىز دەپ تانىستىرىپ، قىزمەتتىك كۋالىگىن كورسەتكەن. قۋعىنشىلار سول جەردە شەتەلدىكتەرگە باس سالىپ، توناپ كەتىپتى.

ساماد نۇرماحامادي، تاجىكستان ازاماتى:

 -ءبىز اقشانى قالدىرىپ كەتۋىن سۇراپ جالىندىق، تىڭدامادى. ءبىزدىڭ بارىمىز وسى، ۇيدە بالا-شاعا كۇتىپ جاتىر، قالاي جەتەمىز دەپ جىلارمان بولدىق. ول سەندەردىڭ شارۋالارىڭ دەپ جاۋاپ قاتتى. اراسىندا 50 مىڭداي تەڭگە بار ەدى سونى قالدىرىپ، ورىس اقشاسىن تۇگەل الىپ كەتتى. ءسويتىپ، سوڭىمىزدان ەرىڭدەر دەدى. ءبىز سوڭعى كولىكتى كەرى بۇرعانشا ولار جوق، كەتىپ قالىپتى. 

جابىرلەنۋشىلەر جولدا توقتاتقان پوليسەيلەر مەن ارتىنان قۋىپ كەلگەندەردىڭ سىبايلاس ەكەندەرىنە سەنىمدى. سوندىقتان قاقپانعا الداپ تۇسىرگەندەرگە قاتىستى ارىز جازعان. بۇل اقپاراتتى وبلىستىق ىشكى ىستەر دەپارتامەنتى دە راستاپ وتىر. ءقازىر وسى دەرەككە قاتىسى بار دەگەن ءۇش كۇدىكتى ۇستالىپ، سوتقا دەيىنگى تەرگەۋ جۇرگىزىلۋدە.

-وسى قىلمىستىق ىسكە قاتىسى بار دەگەن كۇدىكپەن ەكى جول پاترۋلدىك پوليسيا ينسپەكتورى، سونداي-اق، تاعى ءبىر جەرگىلىكتى تۇرعىن تەرگەۋ اباقتىسىنا جابىلدى. ءقازىر بۇل قىلمىستىق ىسكە قاتىسى بار بولۋى مۇمكىن وزگە دە ازاماتتار ىزدەستىرىلىپ جاتىر. ال تاجىكستان ازاماتتارى ءوز ەلدەرىنە قايتۋ ءۇشىن قىرعىزستانعا قاراي شىعىپ كەتتى.

ايتا كەتەيىك، تاجىكتەردىڭ 5 مىڭ ءرۋبلىن قاعىپ العان جول ساقشىلارى شۋ شىعا باستاعان سوڭ وزدەرىنە سول اقشانى قايتاپ بەرىپتى. ءبىراق بۇل تۋرالى ەشكىمگە ءتىس جارماۋىن وتىنگەن. جابىرلەنۋشىلەر شەكارا اسىپ، ۇيلەرىنە كەتكەنىمەن، 250 مىڭ رۋبلدەرىن قايتارا الدى ما، جوق پا، ول جاعىن تەرگەۋ انىقتاماق. ال تاجىكستاندىق اقپارات قۇرالدارى جامبىلدىق ءتارتىپ ساقشىلارىنىڭ اشكوزدىگى تۋرالى جارىسا جازىپ جاتىر.