ەكسپو اۋماعىندا ۇلكەن اپات! استاناداعى حالىقارالىق كورمە  وتەتىن نىسانداردىڭ ءبىرى پايدالانۋعا بەرىلمەي جاتىپ قيرادى. پاۆيلونداردىڭ ورتاسىن بايلانىستىرىپ تۇرعان كوپىر ءتۇس مەزگىلىندە وپىرىلىپ تۇسكەن. ازىرگە اپاتتىڭ سەبەبى بەلگىسىز. قۇلاپ قالعان كوپىردى BI Group سالعاندىقتان، قۇرىلىس كومپانياسىنىڭ ءوزى ونى قالپىنا كەلتىرمەك. وقيعا ورنىندا تەكسەرۋ ءجۇرىپ جاتىر.

بۇل تۋرالى كتك ارناسى حابارلايدى.

بومبا تۇسكەندەي عوي. قار شىعار دەپ ويلادىق. ەڭبەگىمىز بوسقا كەتتى. قايتا تۇسكى استىڭ كەزى بولىپ امان قالدىق.

مەملەكەتتىڭ ميللياردتارىنا سالىنعان ەلىمىزدەگى ەڭ اۋقىمدى قۇرىلىس اۋماعىنداعى نىسان ءدال وسىلاي جۇمىسشىلاردىڭ كوز الدىندا قيراپ قالعان. ۇيالى تەلەفونىنا ءتۇسىرىپ تۇرعان قۇرىلىسشىلار جىلدار بويعى ەڭبەگىمىز ەش كەتتى دەپ وكىنۋدە. قايتا، اپات تۇسكى ۋاقىتتا بولعاندىقتان، ەشكىم زارداپ شەكپەگەن. ال نىساننىڭ قۇلاعانىن كوزبەن كورگەن جۇمىسشىلار سۇحبات بەرگىسى كەلمەدى.

-وبەكتى جابىق. ەشكىمدى جىبەرمەيمىز. كەتىڭىزدەر!

وپىرىلىپ قالعان كوپىر تۋرا قازاقستانعا تيەسىلى شار ىسپەتتەس نىسان مەن جۋىردا عانا شەتەلدىك يەلەرىنە تابىستالعان حالىقارالىق پاۆيلونداردىڭ اراسىنا سالىنعان ەكەن.

«استانا ەكسپو-2017» ۇك» اق قوعاممەن بايلانىس دەپارتامەنتى:

-بۇگىن ساعات 13.30-دا   حالىقارالىق  مامانداندىرىلعان كورمە تەرريتورياسىندا س1 مەن س2 پاۆيلوندارى اراسىنداعى دەكوراتيۆتى كوپىر رەتىندە سالىنعان قۇرىلىم قۇلادى. جانىنداعى عيماراتتارعا زيان كەلگەن جوق. نىساننىڭ مەردىگەرى BI Group بولعاندىقتان، قۇرىلىس كومپانياسى  كوپىردى قالپىنا كەلتىرەتىن بولادى.

وسىلايشا، حالىقارالىق كورمە وتەتىن نىساندار پايدالانۋعا بەرىلمەي جاتىپ قيراۋدا. قايتا قوناقتاردىڭ كوزىنشە قۇلاپ، ەلىمىزدى ۇياتقا قالدىرماعانى ابىروي بولدى.

كۇزەتشىلەر ەكسپو-نىڭ اپات بولعان اۋماعىنا ادام جۋىتپايدى، ءجىتى قاراۋىلداپ تۇر. ال جۇمىسشىلاردىڭ ايتۋىنشا، حالىقارالىق كورمە وتەتىن جەردە قۇرىلىس ۋاقىتشا توقتاپ تۇر. وقيعا ورنىندا تەكسەرىس  جۇرۋدە  جانە اسەمدىك ءۇشىن سالىنعان وتكەلدىڭ قۇلاۋىنا نە سەبەپ بولعانى انىقتالۋدا.

كوپىردى سالعان BI Group زارداپ شەككەندەردىڭ جوق ەكەنىن جاريالادى. جانە كەلگەن شىعىندى دا ەسەپتەپ جاتىر ەكەن. ايتا كەتۋ كەرەك، ەكسپو باسشىلارى جۋىردا عانا حالىقارالىق كورمەگە قاتىساتىن بەس ەل: جۇڭگو، فرانسيا، گەرمانيا، تۇركيا مەن ۆەنگريا وكىلدەرىنە تيەسىلى پاۆيلونداردى ءبولىپ بەرگەن ەدى. ۇيىمداستىرۋشىلار ءالى ونداعان نىساندى يەلەرىنە تاپسىرۋى ءتيىس. ال جۇزدەن اسا مەملەكەت قاتىساتىن حالىقارلىق كورمەنىڭ باستالۋىنا بۇگىن تۋرا 206 كۇن قالدى. ال ەكسپو 10-شى ماۋسىمدا اشىلىپ، ءۇش اي وتەدى. حالىقارالىق شارانى كورۋگە 5 ميلليونعا جۋىق ادام كەلەدى دەپ جوسپارلانۋدا.