جۇڭگو حالىق رەسپۋبليكاسى الەۋمەتتىك جەلىلەردە كورەي حالىق دەموكراتيالىق رەسپۋبليكاسى پرەزيدەنتى كيم چەن ىنمەن فيزيكالىق ەرەكشەلىكتەرىنە، جەكە باسىنا بايلانىستى مازاق پەن ءازىل ايتىلۋىنا تيىم سالدى. «كيم – ءۇشىنشى سەمىز» سوزىنە رەسمي سەنزۋرالىق شەكتەۋ كەلدى.

الەمدىك باسپاسوزدە ءبىر تۇرلىلىگىمەن اتى تانىلعان كيم چەن ىن قىتايدا دا كوپ تالقىلاناتىن ەسىمدەردىڭ ءبىرى.

كوممۋنيستىك رەجيم ءامىر جۇرگىزەتىن سولتۇستىك كورەيا كيم اۋلەتى جاعىنان بيلەنىپ كەلە جاتىر. كيم چەن ىن وسى اۋلەتتىڭ بيلىكتە وتىرعان ءۇشىنشى ءناسىلى بولىپ تابىلادى.

جۇڭگو حالىق رەسپۋبليكاسىندا جاستار جاعى سولتۇستىك كورەيا پرەزيدەنتىن ەلدەگى اتقارىپ جاتقان ساياساتتارىمەن سىناپ، ونىڭ ءىس-قيمىلىنا، ءتۇر تۇلعاسىنا، دەنە بىتىمىنە ءتۇرلى مازاقتار ايتتى.

بۇنى ۇناتا قويماعان سولتۇستىك كورەي بيلىگى رەسمي تۇردە قىتايدان بۇنداي سىن-سىقاققا الەۋمەتتىك جەلىدە تيىم سالۋدى سۇراعان.

جۇڭگو سايكەسىنشە ەسكى وداقتاسىنىڭ تالابىن ەسكەرىپ، ينتەرنەتتەگى ەڭ ۇلكەن ىزدەۋ جۇيەسى بايدۋ مەن ميكروبلوگ جۇيەسى Weibo-دا جۇڭگو تىلىندە (金三胖)Jin San Pang دەپ ىزدەۋگە سەنزۋرا قويدى. اتالعان ءسوز «ءۇشىنشى سەمىز كيم» دەگەن ماعىنا بەرىپ، سولتۇستىك كورەي ليدەرىنىڭ جەكە باسىنا باعىتتالعان مازاق ءسوز.

ايتا كەتەر بولساق، 2014 جىلى كيم چەن ىن تۇتقىندالدى دەگەن اقپارات تاراپ كەتىپ، راسقا اينالماي شىققان. ال، بيىلعى جىلى مامىر ايىندا كيم چەن ىن ءولدى دەگەن اقپارات تاراپ، كەيىننەن سولتۇستىك كورەي پرەزيدەنتى ەل الدىنا شىققان بولاتىن.

1952 جىل كورەي تۇبەگى ەكىگە ءبولىنىپ سوعىسىپ، ناتيجەسىندە وڭتۇستىك جانە سولتۇستىك كورەيا مەملەكەتتەرى پايدا بولدى. كوممۋنيستىك رەجيمدەگى سولتۇستىك كورەياعا تەك جۇڭگو جاقتاستى. ال، وڭتۇستىك كورەياعا ناتو-عا مۇشە ەلدەر تۇگەلدەي اسكەر جىبەرگەن بولاتىن.

سولتۇستىك كورەي كونستيتۋسياسى بويىنشا سول كەزدەگى پرەزيدەنت كيم ير سەن – رەسپۋبليكانىڭ ماڭگى پرەزيدەنتى بولىپ تابىلادى. ونىڭ ۇلى، قازىرگى پرەزيدەنتتىڭ اكەسى كيم چەن يردىڭ كحدر ۇلى جەتەكشىسى دەگەن كونستيتۋسيالىق ستاتۋسى بار.

ەسكە سالا كەتسەك، پرەزيدەنتتىڭ جەكە باسىن كونستيتۋسيامەن قورعايتىن ەرەكشە ستاتۋستار قازاقستان، تۇركىمەنستان، تاجىكستان سياقتى ورتا ازيا ەلدەرىندە دە بار. اتاپ ايتساق، جاقىندا عانا تاجىكستان «ۇلت كوسەمىنە» ءتىل تيگىزۋشىلەردى 5 جىلعا قامايتىن زاڭ قابىلداعان بولاتىن.