كوپتەگەن قىز-كەلىنشەكتەرگە كۇندەلىكتى پايدالانىپ جۇرگەن ازىق-تۇلىگىمىزدىڭ، اسىرەسە، ءسۇت تاعامدارى، كوكونىس، ءتۇرلى جەمىستەر مەن سۇيىق مايلاردىڭ كوسمەتيكالىق ماقساتتا قولدانىلاتىنى بەلگىلى دە بولار. ايتسە دە ولاردى وزىنە ءتان ەرەكشەلىكتەرى مەن قۇرامىن، پايدالانۋ جولىن بىلگەن ءجون.
جۇمىرتقا
بەت تەرىسىنىڭ كەڭىگەن ساڭىلاۋلارىن تارىلتىپ، نارلەندىرەدى، جۇمسارتادى. شيكى جۇمىرتقانى جارىپ، ابدەن ەزگەن سوڭ بەت پەن مويىنعا جاعىڭىز دا 20 مينۋت جاتا تۇرىڭىز. سونان سوڭ جىلى سۋمەن جۋىپ تاستاڭىز. مۇنى شاش كۇتىمىنە دە پايدالانادى.
ءشاي
شارشاپ، قاباعىڭىز ءىسىپ جۇرسە، سالقىن شايعا مالىنعان ماقتا ءتۇيىنىن كوزىڭىزدىڭ ۇستىنە قويىپ، 15 مينۋت دەمالىڭىز. پايدالانىلعان سامانى توگىپ تاستاماي، قايناپ تۇرعان سۋعا سالىپ بىرنەشە مينۋت قايناتىپ الىڭىز. جۋىلعان باستى ساماسى سۇزىلگەن وسى شاي سۋىمەن شايساڭىز، شاشىڭىزدىڭ جىلتىراپ تۇراتىن قاسيەتىن قالپىنا كەلتىرەدى.
تۇز
ازعانا تۇز سالىنعان جىلى سۋمەن كوزىڭىزدى جۋساڭىز، جانارىڭىز جىلتىراپ شىعا كەلەدى. ال، وسىنداي تۇزدالعان جىلى سۋعا سالىنعان ماقتانى كوزىڭىزدىڭ ۇستىنە قويا تۇرساڭىز، قاباقتاعى ىسىكتى باسادى. تۇزدى ۆاننا اياق شارشاعاندا دا جاقسى كومەكتەسەدى.
مايسانا مايى
مايسانا مايىمەن شاشتى ەمدەيدى. تۇنگە قاراي شاشقا ابدەن سىڭىرە جاعىپ، ەرتەڭىنە جاقسىلاپ جۋۋ كەرەك. مايسانا مايىن سونداي-اق كىرپىككە دە جاعۋعا بولادى. سوندا كىرپىك قوڭىرلاۋ ءتۇس الادى.
بال
بەتكە جاققاندا تەرى جۇمسارىپ، جىبەكتەي بولادى. مايلى بەتكە پايدالاعاندا جۇمىرتقانىڭ اعىن (ەزىلگەن) ارلاستىرىپ، ال قۇرعاق بەتكە ءسۇت نەمەسە كىلەگەي قوسادى. سونداي-اق ۆانناعا تۇسكەندە بالل قوسساڭىز شارشاعانىڭىزدى تەز باسىپ، ۇيقىنى رەتكە كەلتىرەدى.
قيار شىرىنى
تەرىنى تازارتۋمەن بىرگە قاتايتادى دا (قياردىڭ ءبىر ءتىلىمىن پايدالانۋعا بولادى).بۇل اسىرەسە، مايلى بەتكە پايدالى. ۇككىشپەن ۇگىلگەن قيارعا ءسۇت قوسىپ ماسكا جاساۋعا بولادى. مۇنداي ماسكا بەتتى جاسارتادى، اسىرەسە، كۇن استىندا (قىزدىرىنعاندا) كوپ جۇرەتىندەر ءۇشىن وتە ءتيىمدى.
كارتوپ
تەرىنىڭ كەمشىلىكتەرىن جويۋعا كومەكتەسەدى. اسىرەسە، ەكزەماعا پايدالى قاسيەتى بار. كارتوپ تەرىنى تازارتادى، قاتايتادى، كوز اينالاسىنداعى ىسىكتى باسادى. ول ءۇشىن كارتوپتى ۇككىشپەن ۇگىپ، سۋىن بەت پەن قولعا جاعادى. قاباققا شيكى كارتوپتىڭ ءبىر تىلىگىن نەمەسە ۇككىشتەن وتكىزىپ باسسا جاقسى اسەر ەتەدى.
ورامجاپىراق
قۇرامى ءتۇرلى باعالى مينەرالدى زاتتارعا باي كاپۋستا تەرى ءۇشىن ناعىز نارلەندىرگىش بولىپ ەسەپتەلىنەدى. ونى ازعانا سۋعا قايناتىپ، سالقىنداعان سوڭ سۋىن جۋىنۋعا پايدالاناسىز.
اپەلسين
قابىعىن كەپتىرىپ، ۇساقتاپ تۋراپ الىڭىز دا بەتكە ارنالعان كەز-كەلگەن ماسكاعا پايدالانىڭىز.
ءسابىز
قۇرعاق ءارى سەزىمتال تەرىگە جاقسى اسەر ەتەدى. ول ءۇشىن ءسابىزدى ءپىسىرىپ، سالقىنداتقان سوڭ ۇككىشپەن ۇگىپ، بەتكە جاعىڭىز.
ايران
تەرىنى قالپىندا ۇستاۋعا قاجەتتى ءتۇرلى فەرمەنتتەرگە باي. تەرىنى تازارتۋدا وتە ءتيىمدى، اسىرەسە مايلى بەت ءۇشىن تاپتىرمايتىن ءادىس. ۆاننادان سوڭ ايراننان ماسكا جاساپ،20 مينۋتتان كەيىن جىلى سۋمەن شايىپ تاستاڭىز. ايراننىڭ شاشتىڭ ءتۇبىن بەكىتۋگە دە پايداسى زور. ول ءۇشىن باس جۋار الدىندا شاشقا سىڭىرە جاعادى.
