2014 جىلدىڭ العاشقى توقسانىندا رەسپۋبليكامىزدا الاياقتىق دەرەگى بويىنشا 9067 قىلمىستىق ءىس تىركەلگەن. الاياقتاردىڭ قۇربانىنا اينالاتىندار ادەتتە ەڭبەككە قابىلەتتى جاستاعى ازاماتتار، قارتتار جانە كوبىنەسە ايەلدەر. 

«بيىلعى جىلدىڭ ءبىرىنشى توقسانىندا رەسپۋبليكامىزدا 9067 الاياقتىق دەرەگى تىركەلگەن، ياعني، وتكەن جىلمەن سالىستىرعاندا 20،4 پايىزعا ارتىق. ال جالپى تىركەلگەن قىلمىستارداعى ۇلەس سالماعى 11،4%. وسى قىلمىستارعا جالپى سانى 2177 تۇلعا (2013 جىلى – 1403) قاتىسقان، ونىڭ 997ء-سى قىلمىستىق جاۋاپكەرشىلىككە تارتىلدى. قىلمىستىق ءىستىڭ توقتاتىلۋىنا بايلانىستى قىلمىستىق جاۋاۋپكەرشىلىكتەن 1180 ادام بوساتىلدى»، - دەيدى ماماندار. باس پروكۋراتۋرا قىزمەتكەرلەرىنىڭ ايتۋىنشا، الاياقتارعا الداناتىندار كوبىنەسە ايەلدەر. بۇعان سەبەپ ازاماتتاردىڭ قۇقىقتىق ساۋاتتىلىعىنىڭ جوق بولۋى، مۇنى الاياقتار قىلمىس جاساۋ كەزىندە ۇتىمدى پايدالاناتىن كورىنەدى. ستاتيستيكاعا جۇگىنسەك، الاياقتار قىلمىس جاساۋ كەزىندە كوبىنەسە تەلەفوندى پايدالانادى. ازاماتتارعا تەلەفون سوعىپ، «تۋىستارىڭىز قىلمىس جاساپ، ۋچاسكەگە جەتكىزىلدى» دەپ الدايدى. ءسويتىپ، ماسەلەنى شەشىپ بەرۋدى ۋادە ەتىپ، اقشا تالاپ ەتەدى. الاياققا الدانعاندار اقشانى ۇيالى تەلەفونعا سالادى نەمەسە ءۇشىنشى ادامدار ارقىلى بەرىپ جىبەرەدى. الاياقتىقتىڭ تاعى ءبىر مىسالى: كۋالىگىن جوعالتقان ازاماتتاردىڭ گازەتتە جاريالانعان حابارلاندىرۋلارىن مۇقيات وقىپ شىعىپ، ولارعا تەلەفون سوعادى. قۇجاتتى قايتارۋ ءۇشىن تەلەفونعا اقشا سالۋدى تالاپ ەتەدى. سونىمەن قاتار، الاياقتار جالعا العان پاتەرلەردى باسپانا ىزدەگەندەرگە بىرنەشە ايعا جالعا بەرىپ، قولما-قول اقشاسىن ساناپ الادى. اقشانى العاننان كەيىن ەكىنشى قايتارا قاراسىن كورسەتپەيدى ەكەن.

bnews.kz