كەشە استانا قالاسىنداعى «قازاقستان» ورتالىق كونسەرت زالىندا بەلگىلى ءبيشى شۇعىلا ساپارعاليدىڭ «قازاعىم، بارىم سەن ءۇشىن» اتتى جەكە كونسەرتى ءوتتى. بۇل جولى بي پاديشاسى وپەرا دا ورىنداپ كورەرمەنىن تاڭ قالدىردى، — دەپ حابارلايدى BAQ.KZ ءتىلشىسى.  

«ۇكىلى ارۋ»، «بورتەنىڭ ءبيى»، «اي نۇرى» سياقتى بيلەرىمەن بارشا جۇرتقا تانىمال ءبيشىنىڭ كەشىنە ەڭكەيگەن قارتتان قۇنداقتاعى بالاعا دەيىن كەلىپ قاتىستى. عاجاپ قيمىلدى ادامزات بولمىسىمەن، ءومىر زاڭدىلىعىمەن بايلانىستىرا بىلەتىن ءبيشىنىڭ قويىلىمدىق بيلەرى ونەر سۇيەر قاۋىمدى ءتانتى ەتتى. كورەرمەننىڭ ءتىپتى دە تاڭقالعانى شۇعىلانىڭ ساحناعا بىردەن «Time to Say Goodbye» ءانىن وپەرا جۇلدىزدارىمەن بىرگە شىرقاپ شىققانى بولدى. حالقىمىز «ونەرلىنىڭ ءورىسى كەڭ» دەگەندى بەكەر ايتپاسا كەرەك. پاتريوتتىق، ليريكالىق، زاماناۋي اندەردى قينالماي شىرقاعان بي شەبەرى تۇرىكتىڭ ءانىن ءوز تىلىندە ورىنداپ، تاجىكتىڭ ءانىن قىتايشا تامىلجىتتى.

بار ونەرىن حالقىنا ارناعان ءبيشى ءوزى باۋلىپ جاتقان بۇلدىرشىندەردى دە ۇلكەن ساحناعا شىعاردى. سونداي-اق، كەشتە شۇعىلانىڭ ونەردەگى دوستارى دا ونەر كورسەتتى.

بيىمەن تانىلىپ، انىمەن تاڭعالدىرعان ونەرپازدى انگە اۋىسىپ كەتۋى مۇمكىن دەگەن كۇمانعا قالدىق كەش كەزىندە. كوكەيدەگى ساۋالىمىزعا ەكىلەنبەي جاۋاپ بەرگەن ونەر جۇلدىزى: «مەن ونەر ادامىمىن عوي. سوندىقتان ءان مەن ءبيدى قاتار الىپ جۇرۋگە شامام جەتەدى»،-دەپ ءتۇيدى.

الداعى ۋاقىتتا ەلدە تۇراقتى قالۋدى عانا كوزدەيتىنىن جەتكىزگەن شۇعىلا ساپارعالي قىزى جوسپارىن دا جاسىرمادى. «جاستاردى بۇكىل ونەگرە باۋليىن دەگەن ماقساتپەن اشقان ونەر ورتالىعىنىڭ جۇمىسىن ەندى-ەندى باستاپ جاتىرمىز. الداعى ۋاقىتتا جاز بويى ەل ءىشى-سىرتىندا وتەتىن كوپتەگەن كەشتەرىم جوسپارلانعان. سوعان قاراماستان، كۇز ايىندا تۇڭعىش ءان جيناعىمدى حالىققا ۇسىنامىن دەپ وتىرمىن»،-دەيدى ول.