«اتىراۋلىق جىگىت الەۋمەتتىك جەلىدەگى سۋرەت ءۇشىن ايەلىن ولتىرە جازدادى» دەگەن جاڭالىقتى «اقجايىق»  گازەتىنەن وقىپ قالدىق دا جاعامىزدى ۇستادىق. سوڭعى كەزدە ايەلىن ۇرىپ-سوققان «ەركەكتەر» تۋرالى جاڭالىقتى كوپ ەستيتىن بولدىق. سويتسەك، باياننىڭ كۇيىن كەشگەن كەلىنشەكتەر ەلىمىزدە كوپ ەكەن. ولار جايىندا كوپ ايتىلا بەرمەيدى، ب ا ق جازا بەرمەيدى. ماسەلە كوبىنە جابۋلى قازان كۇيىندە قالادى. ءبىراق مىنا ءبىر وقيعانىڭ ءجونى بولەك ەكەن. وقيعا ويدان الىنباعانىن ايتا كەتەيىك.

اتىراۋ قالاسى پروكۋرورىنىڭ ورىنباسارى ايبەك قاناتبەكوۆتىڭ ايتۋىنشا ك. ەسىمدى ەر-ازامات «ۆكونتاكتە» الەۋمەتتىك جەلىسىندە ءوز ايەلىنىڭ باسقا ەركەكپەن بىرگە تۇسكەن فوتوسىن كورىپ، ىزاعا بۋلىعىپ، قىزعانىش ورتىنە ورانادى. ەموسياسىن باقىلاي الماعان ك. ءوز ايەلىن اياۋسىز تاياق استىنا الىپ، سوسىن اس ۇيدەگى پىشاقپەن پىشاقتايدى. ايەلدىڭ جانىن اق حالاتتىلار ابىروي بولعاندا امان ساقتاپ قالا الدى.  «دەنە جاراقاتىن قاساقانا سالعانى ءۇشىن» ق ر قك 106-شى بابىنىڭ 1 تارماعى بويىنشا ءىس قوزعالىپ، قىزعانشاق كۇيەۋ سوت ۇكىمىمەن 3 جىلعا باس بوستاندىعىنان ايىرىلدى.

الەۋمەتتىك جەلىنىڭ قانشالىقتى ىڭعايلى قارىم-قاتىناس قۇرالى ەكەندىگىن ءبارىمىز جاقسى بىلەمىز. ءبىراق ونىڭ زاردابىن دا وڭباي تارتۋدامىز. «ۆكونتاكتە»، «Instagramm» بولسىن ادامنىڭ جەكە ءومىرىن جالپىعا جاريا دۇنيە ەتتى. ول جەردە ءانشىنى قۇشاقتاپ سۋرەتكە ءتۇسۋ، جۇرتتىڭ كوزىنشە سەزىم ءبىلدىرۋ، ارقانى كەڭگە جايىپ قىدىرۋ ءساندى. ناتيجەسىندە ەرلى-زايىپتىلار اراسىندا كيكىلجىڭدەر تۋىنداۋدا، ەكى ادامنىڭ اراسىندا رەنىش پايدا بولۋدا، كورسەقىزارلار مەن قارعىس ايتۋشىلار كوبەيۋدە، جىلتىر دۇنيەگە قىزىعۋشىلاردىڭ سانى ارتۋدا. سۇيىكتى جارىنان جاپا شەككەن ايەل كىممەن، قانداي پوزادا فوتوعا تۇسكەنىن بىلمەيمىز. ول سۋرەت ەتيكاعا ساي بولدى ما، بولمادى ما دەگەن سۇراققا دا پورتال، وكىنىشكە وراي، جاۋاپ بەرە المايدى. بار بىلەتىنىمىز – بارلىق پالە كەزىندە تىلدەن بولۋشى ەدى، بۇگىنگى تاڭدا پالە اتاۋلىسى قىزعانىشتان-كوزدەن.