ماۋسىمنىڭ 21-22ء-سى كۇندەرىنە جوسپارلانعان ەر جانىبەكتىڭ 300 جىلدىق مەرەيتويىنىڭ العاشقى كۇنى بۇگىن كوپشىلىك قاۋىمنىڭ تاڭعى ساعات 08.00-دە شىعىس قازاقستان وبلىسى جارما اۋدانى قالباتاۋ كەنتىندەگى «ەر جانىبەك مەموريالدى كەسەنەسىنە»جينالىپ، باتىر رۋحىنا ارناپ وقىلعان قۇران حاتىمنان باستاۋ الدى. ودان كەيىن 100-دەن اسا تىگىلگەن كيىز ۇيلەرگە رەسپۋبليكانىڭ ءار بۇرىشىنان كەلگەن قادىرمەندى قوناقتاردى ورنالاستىرىپ، اس-سۋ بەرۋ شارالارى اتقارىلدى. تۇسكە تامان رەسپۋبليكالىق دەڭگەيدەگى كوكپار ۇلتتىق ويىنى باستالىپ، بىرنەشە وبلىستىق كوماندالار باپ پەن باقتارىن سىناۋعا كىرىسىپ كەتتى. كوكپار قىزىعى كەلەسى كۇنى دە جالعاسىن تاپپاق.

سونداي-اق، شىعىس قازاقستان وبلىسىنىڭ جارماۋ اۋدانىندا ءوتىپ جاتقان ەر جانىبەكتىڭ 300 جىلدىق مەرەيتويى قالباتاۋ كەنتىندە «ەل قورعانى ەر جانىبەك» اتتى عىلىمي-تاجىريبەلىك كونفەرەنسيامەن جالعاستى. جيىن شىمىلدىعى «ەر جانىبەك» اتتى دەرەكتى ءفيلمنىڭ كورسەتىلۋىمەن اشىلدى. ءسوز تىزگىنىن ۇستاۋشى سەمەي قالاسىنىڭ اكىمى ايبەك كارىموۆ كونفەرەنسياعا كەلگەن بارشا قوناقتار مەن تاريحشى، جازۋشى-عالىمدارعا العىس ايتا كەلە بايانداما كەزەگىن جارما اۋدانىنىڭ اكىمى انۋاربەك مۇحتارحانۇلىنا بەردى. ءوز كەزەگىندە انۋاربەك مۇحتارحان ۇلى شىعىس قازاقستان وبلىسىنىڭ اكىمى بەردىبەك ساپاربايەۆتىڭ قۇتتىقتاۋىن جەتكىزە وتىرىپ: «ەر جانىبەكتىڭ 300 جىلدىق مەرەيتويى بارشا قازاققا ورتاق قۋانىش. ويتكەنى، باتىردىڭ ءوزى التى الاشقا ورتاق تۇلعا ەكەنى داۋسىز»، - دەگەن زيالى پىكىر بىلدىرسە، اكادەميك تۇرسىنبەك كاكىش ۇلى: «مۇنداي كولەمدى جيىن بۇرىن-سوڭدى قازاق دالاسىندا وتە قويعان جوق شىعار. باتىر رۋحىن اسقاقتاتۋعا سىڭىرگەن ەڭبەگى ءۇشىن وبلىس اكىمىنەن باستاپ بارلىق ازاماتتارعا ايتار العىسىم شەكسىز. تارىداي شاشىلعان قازاقتى كوك تۋدىڭ استىنا بىرىكتىرۋ ءۇشىن مۇنداي شارانىڭ ماڭىزى ەرەكشە. جانىبەكتىڭ مەرەيتويى بارشا قازاق حالقىن ەلدىككە باستاسىن»، - دەپ، اق تىلەۋلى لەبىزىن ءبىلدىردى.

كونفەرەنسيا بارىسىندا قازاقستاننىڭ حالىق جازۋشىسى قابدەش ءجۇمادىلوۆ، ق ر مەملەكەتتىك سىيلىعىنىڭ يەگەرى، اقىن نەسىپبەك ايت ۇلى، بەلگىلى الاشتانۋشى عالىم تۇرسىن جۇرتباي، قحر ەڭبەك سىڭىرگەن قايراتكەرى، جازۋشى ءشامىس قۇمار ۇلى، ادەبيەتتانۋشى عالىم، پوفەسسور سەرىكقازى قوراباي، جازۋشى-عالىم نۇرداۋلەت اقىش، تاريحشى جانىمحان وشان ۇلى سىندى تۇلعالار بايانداما جاساپ، ەر جانىبەكتىڭ ەرلىك ىستەرى مەن ساياسي-قوعامدىق ەڭبەكتەرىنە جەتە ءمان بەردى. كونفەرەنسيا سوڭى جارما اۋدانىنىڭ «كاۋسار» ۇلت-اسپاپتار وركەسترىنىڭ كونسەرتىمەن اياقتالدى. ال، مەرەيتويدىڭ ەكىنشى ءبولىمى 22 ماۋسىم كۇنى الامان بايگە، قازاق كۇرەسى، ايەلدەر كۇرەسى، قىز قۋۋ، تەڭگە الۋ سىندى ت.ب. ۇلتتىق ويىندارمەن جالعاسپاق.