تاۋەلسىزدىك العاننان بەرگى 23 جىلدىڭ ىشىندە پارلامەنت ەكى جارىم مىڭنان استام زاڭ قابىلداسا، سونىڭ تەك ەكەۋى عانا قازاق تىلىندە جازىلعان. ۇكىمەت تەك قابىلدانعان قۇجاتتى عانا مەملەكەتتىك تىلگە اۋدارىپ وتىرعان. كەشە كەزەكتى سەسسيانى قورىتىندىلاعان قوس پالاتانىڭ بىرلەسكەن وتىرىسىندا ءماجىلىس ءتوراعاسى وسىنداي مالىمەتتى جاريالادى.

دەپۋتاتتار بىلتىرعى قىركۇيەكتەن باستاپ 104 زاڭدى ماقۇلداپتى. سولاردىڭ ىشىندە ەل ەسىندە قالعاندارى قىلمىستىق كودەكس پەن ءسان-سالتانات سالىعى جونىندەگى قۇجاتتار بولدى. بارىنەن دە كوشى-قون تۋرالى زاڭ قىزۋ تالقىعا تۇسكەن ەدى. وسى جاڭا وزگەرتۋلەرگە سايكەس، ورالماندارعا تەك 5 جىلدان كەيىن عانا ازاماتتىق بەرىلۋى ءتيىس بولعان. "شەتەلدەگى اعايىندى سىرتقا تەپتىك" دەگەن حالىق بۇل زاڭعا نارازىلىعىن بىلدىرگەنىمەن، ءماجىلىس دەپۋتاتتارى ءۇنسىز ماقۇلداپ جىبەردى. سەناتتا بىر-ەكى قارسىلىق تانىتقاندارعا قاراماستان قۇجات قابىلداندى. سودان كەيىن بۇل ارەكەتتەرىن قاتە دەگەن بيلىك ەندى 1 جىلدان كەيىن ازاماتتىق بەرۋدى قولعا الىپ جاتىر.

31 ارنا