«حالىقتىڭ كوڭىلىنەن شىعۋ مۇمكىن ەمەس قوي. بەشبارماقتى ماقتاۋ ءۇشىن باسقا ۇلتتىڭ وكىلدەرى كليپ ءتۇسىرىپ، وزدەرى رەپ جازىپ جاتقان كەزدە ءبىز نەگە سىرتتا قالۋىمىز كەرەك؟ «قازى، قارتا، جايا» دەگەندى ايتىپ بەرىڭىز، ايەلدىڭ داۋىسى كەرەك، ونىڭ ۇستىنە قازى-قارتانى ايتاتىن ادام جۇرت تانيتىن ايەل، انا بولۋ كەرەك دەگەن سوڭ قاتىسقان ەدىم». بۇل – ايگىلى ءانشى روزا رىمبايەۆانىڭ 7-ارنا تىلشىلەرىنە بەرگەن سۇحباتىنان ءۇزىندى.

ەستەرىڭىزگە سالا كەتەيىك، رەپەرلەردەن قۇرىلعان توپتىڭ بەينەبايانىنا قاتىسقان حالىق ءارتىسى روزا رىمبايەۆانىڭ اتىنا قاتىستى عالامتوردا، الەۋمەتتىك جەلىلەردە قاتتى سىني پىكىرلەر ايتىلىپ جاتىر. بەينەبايانعا روزامەن بىرگە ۇلى ءالي وقاپوۆ جانە بەلگىلى ەسترادا ءانشىسى، كتك ارناسىندا «بەشبارماق» باعدارلاماسىن جۇرگىزىپ جۇرگەن نۇرلان ابدۋللين دە قاتىسقان. سونىڭ الدىندا عانا: «مەنىڭ ۇلىم ەڭ ءبىلىمدى ءانشى»، - دەپ ءالي تۋرالى بەدەلدى پىكىر ايتقان روزا قۋانىش قىزى رەپەرلەردىڭ توبىنا قوسىلىپ، قازاق داستارحانىنىڭ بايلىعى – قازى، قارتا، جال-جايانى ءناسيحاتتاعاندى ءجون كورگەن سياقتى. الايدا، ساحنا ساڭلاعىنا اينالعان، ءارى سىرلى-سۇلۋ اندەردى ورىنداپ كەلە جاتقان رىمبايەۆا كوپشىلىك تاراپىنان سىنعا ۇشىراۋدا. رىمبايەۆانىڭ مۇنىسى ءانشى ۇلى ءاليدى قولداعانى ما، الدە وزىنە سونداي جارناما كەرەك بولدى ما، ازىرگە بەلگىسىز. ال، ءوزى ونى جال-جايانى ءناسيحاتتادىم دەپ تۇسىندىرەدى.