“اڭىز ادام” جۋرنالىنا قاتىستى سوت شەشىمى زور الاڭداۋشىلىق پەن وكiنiش تۋعىزادى. قاندى گيتلەردىڭ قىلمىستارىن ايىپتاپ، تاريحتان ساباق الۋعا جانە بۇنداي زۇلماتتىڭ XXI عاسىردا قايتالانۋىنا جول بەرمەۋگە شاقىرعان باسىلىمعا جاسالىپ وتىرعان قىسىم مۇلدە تۇسىنىكسىز. جۋرنالدىڭ مازمۇنىمەن تانىسپاي، قالايشا وسىنداي قاتقىل ارەكەتتەرگە بارۋعا بولادى؟ جۋرنال مۇقاباسىنداعى گيتلەردىڭ سۋرەتىنە كەلسەك، سوت پەن ارداگەرلەر ونداعى “ادامزاتتىڭ قاسىرەتى” دەگەن باتپانداي جازۋدى، فاشيستىك سۆاستيكانى قاق ايىرىپ تۇرعان قولداردىڭ سۋرەتىن نەلىكتەن ەلەمەدى؟ ءدال سول گيتلەردىڭ سۋرەتىن باسىپ شىعارعان رەسەيلىك “پراۆدا”، “يزۆەستيا”، “كومسومولسكايا پراۆدانى”، امەريكاندىق “تايم” مەن “ۋاشينتون پوستتى”، فرانسۋزدىڭ “فيگاروسىن” باسقا دا مىڭداعان باسىلىمداردى، فيلمدەردى، توم-توم كىتاپتاردى نەلىكتەن ەشكىم قۋدالاعان جوق، الدە سول گيتلەردىڭ ءوزى سەكىلدى وتقا جاققان جوق؟ نەمەسە "اڭىز ادام" ساندارىنىڭ ءبىرىن قانىشەر ستالينگە ارناعاندا ەشكىم نەگە ورە تۇرەگەلگەن جوق؟ وسىنداي اششى دا جاۋاپسىز سۇراقتار كوپ. كەزىندە بوريس پاستەرناكتىڭ دا شىعارمالارىن كسرو-دا ءدال وسىلاي وقىماي جاتىپ ايىپتاعان، اياۋسىز كۇيە جاققان. نە شىقتى؟ سوڭىنان ونى بۇكىل الەم مويىنداپ، نوبەل سىيلىعىن بەردى. بۇگىندە ورىس حالقى پاستەرناكتى ماقتان تۇتادى، ال وعان قيانات جاساعاناداردىڭ ءۇنى دە قاراسى وشكەن. كەزىندە ۇر دا جىق ساياساتتىڭ قۇرباندارىنا ءاليحان بوكەيحانوۆ، احمەت بايتۇرسىنوۆ، مۇستافا شوقاي، جۇسىپبەك ايماۋىتوۆ، ماعجان جۇمابايەۆتار، باسقا دا قازاق حالقىنىڭ سۇيىكتى ۇلدارى، پۋبليسيستەرى، اقىن-جازۋشىلارى اينالدى. زامان وتە ولاردىڭ ۇلىق ەسىمدەرى كوشە مەن الاڭدارعا بەرىلدى، ال ولاردى ماسكەۋ تاپسىرىسىمەن داتتەگەن، قيناعان، يتشە ازاپتاپ ولتىرگەن شوشكا-جەندەتتەر ەل قارعىسىنا يە بولدى. تاجال كسرو ءداۋىرى، ازات وي مەن ادىلدىكتى جانشىعان رەسەيلىك وتارلاۋ مەن رەپرەسيالار زامانى كەلمەسكە كەتتى. قازاقستان تاۋەلسىز مەملەكەت بولدى. وسىنى تۇسىنەر ۋاقىت، بوگدەنىڭ بولماسا دا ءوزىمىزدىڭ تاريحتان ساباق الاتىن كەز جەتتى عوي. شەن مەن لاۋازىم، قۋ اقشانىڭ بۋى ۋاقىتشا عانا، ال ار-وجدان، يمان، ادامگەرشىلىك پەن شىندىق - ماڭگىلىك جانە ولار الدىنداعى قىلمىس ءتۇبى جاۋاپسىز قالماق ەمەس.

(راسۋل جۇمالىنىڭ فەيسبۋكتەگى پاراقشاسىنان)