ۋكراينانىڭ ۇلتتىق قاۋىپسىزدىك جانە قورعانىس كەڭەسى ءتوراعاسىنىڭ ورىنباسارى ميحايل كوۆال ۋكراين اسكەرى رەسەيشىل سەپاراتيستەر بەكىنگەن لۋگانسك مەن دونەسكىنى تولىق قورشاۋعا الاتىنىن مالىمدەدى. ونىڭ ايتۋىنشا، اسكەريلەر وسىلايشا سەپاراتيستەردى قارۋلارىن ەرىكسىز تاستاۋعا ماجبۇرلەمەك. سەپاراتيستەر كەز-كەلگەن قورشاۋعا الۋ ارەكەتى "قاقتىعىستى ساياسي جولمەن شەشۋ ءۇمىتىن كۇيرەتەدى" دەپ مالىمدەدى. ولار ۋكراينا ارمياسى بۇعان دەيىن بەكىنگەن سلاۆيانسك قالاسىن العان سوڭ بار كۇشتى دونەسك مەن لۋگانسكىگە شوعىرلاندىراتىندارىن ايتقان. ءوزىن ءوزى جاريالاعان "دونەسك حالىق رەسپۋبليكاسىنىڭ" گۋبەرناتورى پاۆەل گۋباريەۆ "ناعىز پارتيزاندىق سوعىس باستالاتىنىن" ەسكەرتتى. 7 شىلدە كۇنى تۇسكەن اقپاراتتار بويىنشا، دونەسكىدە جارىلىستاردان قالاعا باراتىن ءۇش كوپىر قيراعان. جارىلىستاردى سەپاراتيستەر جاسادى دەگەن بولجام بار – دەپ، ازاتتىق راديوسى حابارلايدى. "قامشى" سىلتەيدى