قاشاعان كەن ورنىنىڭ اشىلۋىندا ەلباسى زالدا وتىرعان جاس جىگىتكە كوزى ءتۇستى. 2000 جىلى 7 جاستاعى بەرىك ءدال سول قاشاعان ايماعىندا ەلباسىمەن كەزدەسكەن ەدى. نازاربايەۆ سول بالانىڭ بەتىنە ءوز قولىمەن مۇناي جاققانىن ەسىنە الدى دەپ حابارلايدى mgorod.kz
2013 جىلى ول بالامەن "بولاشاق" زاۋىتىنىڭ اشىلۋىندا ەكىنشى رەت كەزدەسكەن ەكەن. ول كەزدە بەرىك ۇلى بريتانياداعى مانچەستەرلىك ۋنيۆەرسيتەتتە ءبىلىم الىپ جۇرگەن.
بەرىكتىڭ تاڭداعان ماماندىعى - مۇنايشى، شەت ەلدە ءبىلىم الىپ، جارتى جىلدان بەرى تۋعان ولكەسىندەگى قاشاعان كەن ورنىنىڭ دامۋى ءۇشىن ءوز مۇناي وندىرىسىندە ەڭبەك ەتىپ كەلەدى.
بۇگىن، ياعني، 7 جەلتوقساندى ەلباسىمىز اتىراۋداعى قاشاعان ەلدى مەكەنىندە ورنالاسقان كەن ورنىن رەسمي تۇردە ىسكە قوستى.
- بارشا قازاقستاندىقتاردى وسى ۇلكەن قۋانىشپەن - قاشاعان كەن ورنىنىڭ ىسكە قوسىلۋىمەن شىن جۇرەكتەن قۇتتىقتايمىن، - دەپ ەلباسىمىز ءوز لەبىزىن ءبىلدىردى.
سونىمەن قاتار تاۋەلسىزدىك جىلدارىندا اتىراۋ حالقىنىڭ قانشالىقتى وزگەرگەندىكتەرىن مالىمدەدى.
- اتىراۋلىقتار قازىرگى تاڭدا مۇلدەم باسقا ادامدار، ولاردىڭ اراسىندا شەت ەل فيرمالارىندا جانە كۇردەلى ءوندىرىس ورىندارىندا ينجەنەر بولىپ قىزمەت اتقارىپ جۇرگەن مىقتى ماماندار كوپ، وزگە تىلدەردى وتە جاقسى مەڭگەرگەن، سول سەبەپتى دە ءدال سونداي ادامدار ەلىمىزدىڭ ەڭسەسىن كوتەرەتىن تۇلعالار، - دەدى ءنۇرسۇلتان نازاربايەۆ. - مەن اتىراۋ تۇرعىندارىن تاۋەلسىزدىك مەرەكەلەرىمەن قۇتتىقتاپ، الداعى ۋاقىتتاردا تابىس تىلەيىن دەپ ارنايى وسى قالاعا تابان تىرەدىم.
2016 جىلدىڭ 1 قاراشاسىندا قاشاعانداعى مۇناي ءوندىرىسى ءبىر تايلىكتە 75 باررەل كورسەتكىشىن قۇرادى. قازىرگى ۋاقىتتا بۇل كورسەتكىشتى 180 مىڭ باررەلگە كوتەرۋ ماقساتىندا قارقىندى جۇمىستار اتقارىلىپ جاتىر.
وسى جىلدىڭ اياعىنا دەيىن 1 ملن. توننا مۇناي مەن 680 ملن. تەكشەمەتر گاز ءوندىرۋ جوسپارلانىپ وتىر. ال كەلە جاتقان 2017 جىلدا 8،9 ملن. مۇناي مەن 5،6 ملرد. تەكشەمەتر گاز ءوندىرۋ كوزدەلدى.
قاشاعان كەن ورنىنىڭ اشىلۋىندا ەلباسىمىز اتىراۋ وبلىسىنىڭ 13 مۇناي قىزمەتكەرلەرىن ماراپاتتادى. سونان سوڭ شەتەلدىك NCOC كومپانياسىنىڭ ينۆەستىرلىك-اكسيونەرلىك قوعامىمەن كەزدەسۋ بولدى.
اۋدارعان: نازەركە لابيحان
