قازاقستانعا ورالعانىمەن ەلىمىزدىڭ كوشى-قون زاڭناماسىن بۇزعانى ءۇشىن كەرى قايتارىلعان قانداستارىمىزدىڭ قاراسى قالىڭ. سولاردىڭ قاتارىندا 9 جاستاعى مەيىرگۇلدىڭ دە اتا-اناسى بار. 

قازىرگى ۋاقىتتا الماتىدا جالعىز ءوزى قالىپ، تۋىستارىنىڭ ءۇيىن پانالاعان كىشكەنتاي قىز بۇگىن ەلورداعا ارنايى كەلىپ، مۇڭىن ىشكى ىستەر ءمينيسترى قالمۇحانبەت قاسىموۆقا اقتاردى، دەپ حابارلايدى inform.kz

«نۇر وتان» پارتياسىندا وتكەن قوعامدىق قابىلداۋدا مەيىرگۇل مينيسترگە ارنايى جازىلعان ءوتىنىشىن تابىستادى. اتا-اناسىمەن تەز ارادا قاۋىشاتىندىعىنا ءۇمىت ارتقان ول ەل تاۋەلسىزدىگىڭ 25 جىلدىعىنا وراي شەتتەن ورالعانعانىمەن قازاقستاننىڭ كوشى-قون زاڭناماسىن بۇزىپ كەرى قايتارىلعان قانداستارىمىزعا دا راقىمشىلىق جاسالسا دەيدى.

مەيىرگۇلدىڭ مينيسترگە جازعان حاتىن:

«قالمۇحانبەت قاسىموۆ اتاعا ءوتىنىش! مەنىڭ اتىم  مەيىرگۇل. جاسىم 9-دا. الماتى قالاسىنداعى №93 مەكتەپتىڭ 3 «ءا» سىنىبىندا وقيمىن. 2013 جىلى قىتايدان الماتىعا كوشىپ كەلگەنبىز. ول جاقتا جۇڭگو بالاباقشاسىندا وقىدىم. اتا-انام مەنى قازاقشا وقىتامىن، قىزىم قازاق بولىپ ءوسسىن دەپ، مەن ءۇشىن قازاقستانعا كوشىپ كەلدى. اكەمنىڭ اتى  ۇلاربەك، انامنىڭ اتى  ورالحان. ءبىراق اكەم مەن شەشەمدى پوليسيا قۇقىق بۇزدىڭ دەپ قىتايعا شىعارىپ جىبەردى. 5 جىل كەلە المايدى ەكەن. مەن الماتىدا جالعىز ءوزىم قالدىم. مەن اتا-انامدى قاتتى ساعىندىم. تۇندە توسەكتە جاتقاندا كۇندە جىلايمىن. ولار كۇندە تۇسىمە كىرەدى. تەز كەلسە ەكەن دەپ اللادان كۇندە تىلەيمىن. قالمۇحانبەت اتا مەن سەكىلدى ءسىزدىڭ دە نەمەرەڭىز بار شىعار، ماعان كومەكتەسىڭىزشى، وتىنەمىن. اكەم مەن شەشەمە جانە سونداي كىسىلەرگە ءبىر جولعا راقىمشىلىق جاساڭىزشى. «نۇر وتان» پارتياسىنا سول ءۇشىن الماتىدان كەلدىم. ولار قازاقستان تەز قايتىپ ورالسىنشى. مەن ولاردى قاتتى ساعىنىپ كەتتىم».