ەلىمىزدىڭ كوشى-قون زاڭناماسىن بۇزعانى ءۇشىن قازاقستان اۋماعىنان شىعارىلعان 9 جاستاعى مەيىرگۇل ۇلاربەكتىڭ اتا-اناسى ۆيزا راسىمدەپ، ەش كەدەرگىسىز كەلە الادى. بۇل جايىندا ق ر ىشكى ىستەر مينيسترلىگى مەملەكەتتىك ءتىل جانە اقپارات دەپارتامەنتىنىڭ ديرەكتورى الماس سادۋبايەۆ ءمالىم ەتتى دەپ حابارلايدى inform.kz
«مەيىرگۇل ۇلاربەكتىڭ اتا-اناسى جۇڭگو حالىق رەسپۋبليكاسىنىڭ ازاماتتارى جانە ولار اعىمداعى جىلدىڭ 8 تامىزىندا الماتى قالالىق مامانداندىرىلعان اۋدانارالىق اكىمشىلىك سوتىنىڭ قاۋلىسىمەن بەلگىلەنگەن مەرزىمدە ەلدەن شىعىپ كەتۋدەن جالتارعانى ءۇشىن اكىمشىلىك جاۋاپقا تارتىلدى. 14 تامىزدا ولار قازاقستاننان كەتتى. قازىرگى ۋاقىتتا ءىىم تاراپىنان ولاردىڭ قازاقستانعا كەلۋىنە ەشقانداي شەكتەۋ جوق. قحر-داعى قازاقستان رەسپۋبليكاسىنىڭ ەلشىلىگىندە ۆيزا راسىمدەگەن جاعدايدا ولار قازاقستانعا ەش كەدەرگىسىز كەلە الادى. جوعارىدا اتالعان قحر ازاماتتارى تۇراقتى تۇرۋ ماسەلەسىمەن جۇگىنگەن ەمەس»، - دەدى الماس سادۋبايەۆ.
ەستەرىڭىزگە سالا كەتسەك، كەشە 9 جاستاعى مەيىرگۇلدىڭ ىشكى ىستەر ءمينيسترى قالمۇحامبەت قاسىموۆتىڭ قابىلداۋىندا بولىپ اتا-اناسىنىڭ قازاقستان زاڭناماسىن بۇزعانى ءۇشىن ەل اۋماعىنان شىعارىلعاندىعىن ايتىپ، كومەك سۇراعانىن جازعان بولاتىنبىز.
