الماتىلىق 22 جاستاعى جىگىت ءتۇن ۋاقىتىندا كولىكتەردىڭ مەملەكەتتىك نومىرلەرىن شەشىپ الىپ، ونىڭ ورنىنا مازمۇندى جازبا قالدىرىپ كەتىپ وتىرعان. بۇل تۋرالى قالالىق ءىىد باسپا ءسوز قىزمەتىنە سۇيەنە وتىرىپ Stan.kz حابارلايدى.

“ونىڭ قالدىرعان جازباسىنىڭ ءبىرى ا-4 فورماتىنداعى قاعازدان تابىلعان. وندا ول كولىك يەسىنىڭ مەملەكەتتىك ءنومىردى قايتارۋ ءۇشىن جاسايتىن ارەكەتىن انىقتاپ جازعان. سونداي-اق، ول بۇل ارەكەتتى يگىلىكتى ءىس رەتىندە جاسايتىنىن دا ايتقان. ءبىراق، جەدەل ىزدەستىرۋ شاراسى بارىسىندا بەلگىلى بولعانداي، قىلمىستىق جولمەن كەلگەن اقشانى جۇمىسسىز ەر ادام جەكە ماقساتتا جۇمساعان. ءتورت ازامات قىلمىسكەرمەن كەلىسىپ، ونىڭ تالاپتارىن مۇلتىكسىز ورىنداعان. ال قالعان ادامدار بولسا بۇل تۋرالى تەك پوليسياعا حابار بەرۋ كەرەك دەپ، دۇرىس جولدى تاڭداي العان. وسى رەتتە ازاماتتارعا سىزدەر تەك كەلىسىم جاساۋ ارقىلى قىلمىسكەردىڭ قولىن ۇزارتاسىز جانە ولاردىڭ باسقا دا قىلمىستار جاساۋىنا جول اشىپ بەرەسىز”، – دەيدى بوستاندىق اۋداندىق پوليسيا باسقارماسىنىڭ باسشىسى بەرىك ابىلبەكوۆ.

ونىڭ تالاپتارى مىناداي:

“ءوز اۆتوكولىگىڭىزدىڭ ءنومىرىن قايتارۋ ءۇشىن، سىزگە كەلەسى تالاپتاردى ورىنداۋعا تۋرا كەلەدى:

1.     كيۆي-اميانعا 5000 تەڭگە جىبەرۋ: ءنومىرى: +7 747 343 22 10

2.     قۇقىق قورعاۋ ورگاندارىنا حابارلاسپاۋ!

3.     اقشانى جىبەرگەن كەزدە ۇيالى تەلەفونىڭىز بەن ءنومىر بەلگىسىنىڭ ءۇش ءنومىرىن جازىپ جىبەرۋ. مىسالى: 8 777 914 56 76 214

4.     اقشا 16.11.2016 كۇنى ساعات 22:00-دەن كەش جىبەرىلمەۋى ءتيىس.

اقشانى ءسىز كەز-كەلگەن تەرمينالدان جىبەرە الاسىز. جوعارىداعى تالاپتاردى ورىنداعاننان كەيىن، سىزگە كولىگىڭىزدىڭ ءنومىرى جاسىرۋلى تۇرعان ورىننىڭ تولىق مەكەن-جايى جىبەرىلەدى.

تالاپتاردىڭ ءبىرىن بۇزعان جاعدايدا، ءسىز اۆتوسون ارقىلى كوپ ۋاقىت پەن اقشا جۇمساپ، قالپىنا كەلتىرۋگە ءماجبۇر بولاسىز.

ءوز كەزەگىمىزگە ءسىزدىڭ ءنومىرىڭىزدىڭ قايتارىلاتىنىنا 100 پايىز كەپىلدىك بەرەمىز. جانە ول ۇرلانعان ورىنعا جاقىن ماڭعا جاسىرىلادى. ءبىز دە ادامبىز، سوندىقتان وسىنداي جولمەن اقشا تابۋعا تۇسىنىستىكپەن قاراۋىڭىزدى سۇرايمىز. بۇل ءبىز ءۇشىن قايىرىمدى ءىس جاساۋدىڭ بىردەن-بىر جولى”، – دەپ جازىلعان.

قازىرگى تاڭدا كۇدىكتى ۋاقىتشا تەرگەۋ يزولياتورىندا وتىر. جاقىن ارادا سوتقا دەيىنگى تەكسەرۋ جۇمىستارى باستالماق. سونىمەن قاتار، كريمينالدى پوليسيا كۇدىكتىنىڭ باسقا دا قىلمىستارعا قانشالىقتى قاتىسى بار ەكەندىگىن زەرتتەپ جاتىر. ەگەر قىلمىسكەردىڭ ارەكەتىنەن زارداپ شەككەن ازاماتتار بار بولسا، مىنا نومىرلەرگە حابارلاسىپ شاعىم بىلدىرە الادى: 254-47-00 جانە 254-47-01.