اقتوبە وبلىسى، العا اۋدانىنىڭ تۇرعىنى ا. كاۋكانوۆا كۇيەۋىنەن قورعانىپ، وعان پىشاق سۇعىپ العان. جابىرلەنۋشى بىرەر مينۋت ىشىندە كوز جۇمدى.

ءۇي ىشىندەگى داۋ-جانجالدىڭ سوڭى ولىممەن اياقتالىپ، وقيعا ورنىندا قاماۋعا الىنعان 28 جاستاعى كەلىنشەك قىلمىستىق جاۋاپقا تارتىلدى. بۇگىن ءبىر بالانىڭ اناسى سوت زالىنان بوساپ شىقتى، دەپ حابارلايدى stan.kz

بۇگىن اقتوبە وبلىستىق قىلمىستىق ىستەر جونىندەگى مامانداندىرىلعان اۋدانارالىق سوتىندا 28 جاستاعى كەلىنشەكتىڭ ىسىنە قاتىستى سوت ۇكىمى شىقتى. ا.كاۋكانوۆا ىشىمدىك ءىشىپ، كەيىن ءوزىن ۇرىپ-سوققان كۇيەۋىنەن قورعانعان. اس ۇيدە جانجالداسىپ، كەيىن وقتاۋمەن ۇرعان كۇيەۋى ونىڭ دەنەسىن زاقىمداپ، جۇدىرىقتاعان. ءوز ءومىرى مەن دەنساۋلىعىن قورعاپ قالۋدى ويلاعان ا.كاۋكانوۆا پىشاق الا جۇگىرگەن كۇيەۋىنىڭ قولىن قايىرىپ، جاعالاسقان. قولى قايىرىلعان كۇيەۋىنەن ءال كەتىپ، سول ارادا پىشاق جۇرەك تۇسىنا بارىپ قادالادى. جابىرلەنۋشى وقيعا ورنىندا كوز جۇمدى.

«سوت ازاماتشا ك-نىڭ بۇل ارەكەتىن ايەل ادامنىڭ قاجەتتى قورعانۋ ىس-ارەكەتى دەپ باعالاپ، قىلمىس قۇرامىنىڭ بولماۋىنا بايلانىستى اقتادى. ازاماتشا ك. سوت زالىندا قاماۋدان بوساتىلدى. قىلمىستىق ءىستى قاراۋ ناتيجەسىندە وبلىستىق ءىىد باستىعى مەن وبلىستىق پروكۋراتۋراعا سوتقا دەيىنگى تەرگەۋ ءوندىرىسىن ءبىرجاقتى جۇرگىزگەنى جانە قىلمىستىق ءىستى جان-جاقتى، وبەكتيۆتى تەرگەمەگەندەرى ءۇشىن جەكە قاۋلى شىعارىلدى»، – دەدى سۋديا احمەدجان مولداعالييەۆ.

ايتا كەتەيىك، 28 جاستاعى ا.كاۋكانوۆا قىلمىستىق كودەكستىڭ «كىسى ءولىمى» جانە «قورعانۋ ماقساتىندا ادام ءولتىرۋ» بابى بويىنشا سوت الدىندا جاۋاپ بەردى. ول 8 اي بويى تۇرمەدە وتىردى. ال، ونى ۇيىندە 3 جاستاعى بالاسى كۇتىپ وتىر. بۇگىن سوتقا قاتىسقان تۋما-تۋىستارى ا.كاۋكانوۆانىڭ بوستاندىققا شىققانىن كورىپ، قۋانىشتان جىلاپ جىبەردى.