تانىمال جازۋشى، دراماتۋرگ دۋلات يسابەكوۆ كوكەيىن ورتەيتىن ماسەلەلەردى جايىپ سالىپ، ءتىپتى «باسىن جۇلىپ السا» دا قانداي جاعدايعا قاتىستى پىكىرىن بىلدىرەتىنىن ايتتى، دەپ حابارلايدى NUR.KZء-تىڭ وڭىردەگى ءتىلشىسى.

وڭتۇستىك قازاقستان وبلىسىنىڭ اكىمى جانسەيىت تۇيمەبايەۆ ايماقتان شىققان 200-گە جۋىق تانىمال ازاماتتىڭ باسىن قوسىپ، قامقورلىق اكسياسىن وتكىزدى. اكسيانىڭ ماقساتى – الدا اتقارىلاتىن ورتاق ىستەردى جوسپارلاپ الۋ. «تۋعان جەردى تۇلەتۋ – پەرزەنتتىك پارىز» دەپ اتالاتىن شاراعا مەملەكەت جانە قوعام قايراتكەرلەرى، اقىن-جازۋشىلار، قازاق ەستراداسىنىڭ ونەر جۇلدىزدارى مەن كاسىپكەرلەر قاتىستى.

ولاردىڭ قاتارىندا جازۋشى، دراماتۋرگ دۋلات يسابەكوۆ تە بار. ساحنا تورىنە شىققان ول وڭتۇستىك ءوڭىرى ەلىمىزدىڭ ىرىس-قۇتى، قازاق ءتىلى مەن ەل دەموگرافياسىنىڭ التىن بەسىگىن ەكەنىن اتاپ ءوتتى. ودان وزگە دۋلات يسابەكوۆ وسىدان بىرنەشە اي بۇرىن ەل ىشىندە قىزۋ تالقىلانعان ماسەلە – بالا سانىنىڭ ارتۋىنان بيلىك مەكتەپ سالىپ ۇلگەرمەي جاتقانى تۋرالى جايتتى نازارىنان شىعارمادى.

«وتكەن جولى ءبىر ادام بالكىم وسەك پە بىلمەيمىن، «ءبىز مەكتەپ سالىپ ۇلگەرە الماي جاتىرمىز، بالانى از تۋىڭدار» دەپ ايتىپ كەتىپتى. ونى كىم ايتقانىن ايتپاي-اق قويايىن بۇل جەردە، شىركىن-اي، سول جينالىستا مەن بولمادىم عوي. باسىمدى سول جەردە جۇلىپ السا دا: «ءاي، وڭتۇستىكتىڭ ايەلدەرى تۋماڭدار ەندى، مىنا كىسى شارشاپتى عوي، مەكتەپ سالىپ ۇلگەرە الماي جاتىر ەكەن عوي. كۇيەۋلەرى مەن ايەلدەرى ەكى جاقتا تۇرىڭدار، جولاماڭدار بىر-بىرىڭە» دەپ ايتار ەدىم. ءبىر ادامدى ەكى ادام قىلا الماي جاتقاندا وسىنداي ماسەلەلەردى ەستىگەندە كۇيىپ كەتەسىڭ عوي، جانىپ كەتەسىڭ… جەرىمىزگە ءوزىمىز يە بولۋ ءۇشىن سانىمىز 67 ملن بولۋ كەرەك» دەپ اشىندى جازۋشى.

ەسكە سالساق، تامىز ايىندا سول كەزدەگى ۆيسە-پرەمەر داريعا نازاربايەۆا تۇركىستان قالاسىنا جاساعان ساپارىندا وقو تۇرعىندارى حالىق سانىنىڭ كوبەيۋىنە سۇبەلى ۇلەسىن قوسىپ وتىرعانى سونشالىق، مەملەكەت بالاباقشا مەن مەكتەپ سالىپ ۇلگەرە الماي جاتقانىن ايتقان بولاتىن.