اقتوبە وبلىستىق قىلمىستىق ىستەر جونىندەگى مامانداندىرىلعان اۋدانارالىق سوتىنىڭ سۋدياسى احمەتقالي مولداعالييەۆ اقتوبەدە ماۋسىم ايىندا بولعان تەراكتىنىڭ جاي-جاپسارىن ايتىپ بەردى، - دەپ حابارلايدى Tengrinews.kz.

ۆيدەو Facebook الەۋمەتتىك جەلىسىندە جاريا بولدى. وندا سۋديا ماۋسىمداعى تەراكتىنىڭ حرونولوگياسىن ايتادى. ول ماۋسىمداعى تەرروريستىك شابۋىلدىڭ قالاي باستالعانىن، ونى كىمدەردىڭ ۇيىمداستىرعانىن، شابۋىلداردىڭ بارىسىندا قۇقىق قورعاۋ ورگاندارىنىڭ قالاي ارەكەت ەتكەنىن باياندايدى. ۆيدەو بارىسىندا قاندى وقيعانىڭ سۋرەتتەرى مەن ۆيدەولارى، سونىمەن قاتار لاڭكەستەردىڭ قالادا جانە قالا سىرتىندا قانداي باعىتتاردا قوزعالعانى كورسەتىلگەن ينفوگرافيكالار قويىلادى. 

"ايتا كەتەيىن، بولىپ وتكەن وقيعالار ساۋاتى از جاستاردىڭ شەتەلدىك ءدىني راديكاليزم يدەولوگتارىنىڭ اسەرىنە ءتۇسىپ قالعاندىعىنان بولدى. ساۋاتسىزدىق جانە ادامنىڭ وزگە السىزدىكتەرى، بىرەۋدىڭ اسەرىنە ءتۇسىپ قالۋ قىلمىستىق جاۋاپكەرشىلىكتەن بوساتپايدى"، - دەپ ەسكەرتەدى ۆيدەونىڭ سوڭىندا مولداعالييەۆ.

ايتا كەتەيىك، قىلمىستىق ءىس 201 تومنان تۇردى. وسى ءىس بويىنشا 215 ءتۇرلى سوت-مەديسينالىق ساراپتاما مەن 26 تەرگەۋ جۇمىستارى جۇرگىزىلگەن. وبلىستىق پروكۋراتۋراداعىلاردىڭ كەلىسىمىنە سايكەس، كۇدىكتىلەردى قاماۋ مەرزىمى 4 ايعا دەيىن سوزىلعان. سوتتالۋشىلاردىڭ مۇددەسىن 27 ادۆوكات قورعادى. 48 ادام كۋاگەر رەتىندە قاتىسسا، 88 ادام زارداپ شەككەندەر رەتىندە سوتقا شاقىرىلدى.

سوت ۇكىمىنە سايكەس، ازامات ءابدىراحمانوۆ 20 جىلعا، ايدوس جۇبانوۆ 22 جىلعا سوتتالدى. سوتتالۋشىلار ج. قۋانىشبايەۆ، ءا. اقپانبەتوۆ، ب. قۋانىشبايەۆ، ا. تاڭاتاروۆ، ا. راحمەتوۆ، ا. ساديحوۆ، ا. يمالييەۆ ءومىر بويى باس بوستاندىعىنان ايىرىلدى. قىلمىستى جاسىرىپ قالعان 18 سوتتالۋشى 2 جىلدان 5 جىلعا باس بوستاندىعىنان ايىرىلدى. قىلمىسكەرلەردى جاسىرعان ميرلان ەرداۋوۆ 4 جىلعا سوتتالدى. ال ۇسەن وتەپوۆ 4 جىلعا باس بوستاندىعىن شەكتەۋ جازاسىنا كەسىلدى. ءومىر بويى تۇرمەگە قامالعاندار ەرەكشە رەجيمدەگى كولونيادا جازاسىن وتەيدى. سونداي-اق، مۇلكى تاركىلەندى.

ەسكە سالايىق، اقتوبەدەگى تەراكت كەزىندە جەتى ادام قازا بولعان. ولاردىڭ ۇشەۋى اسكەريلەر، تورتەۋى - بەيبىت تۇرعىندار. جاراقات العاندار سانى 30 شاقتى. لاڭكەستەر  قالاداعى اكىمشىلىك عيماراتتار مەن تۇرمەنى باسىپ الماق بولعان. ءداستۇرلى ەمەس ءدىن اعىمىنىڭ 25 وكىلى "پانتەرا" جانە "پاللادا" قارۋ دۇكەندەرىنە، 6655 اسكەري بولىمىنە شابۋىل جاساعان.