«باتىل جۇرەك» سىيلىعى استانا-بۋراباي تاس جولىندا بولعان كولىك اپاتى كەزىندە ادامداردى قۇتقارىپ ءجۇرىپ ەرلىكپەن قازا تاپقان قۇرماربەك جاكەتايدىڭ تۋىستارىنا بەرىلەتىن بولدى دەپ حابارلايدى kazakh_inform. ماراپات «حالىق سۇيىكتىسى» ۇلتتىق سىيلىعى اياسىندا تاعايىندالعان. «قۇماربەك جاكەتاي ۇلى - شىندىعىندا بەيبىت كۇننىڭ باتىرى. ول جانتۇرشىگەرلىك اپاتتا ادامداردى قۇتقارۋ جولىندا جانىن پيدا ەتتى. «حالىقتىڭ سۇيىكتىسى - نارودنىي ليۋبيمەس گودا» قوعامدىق سىيلىعىنىڭ ۇيىمداستىرۋشىلارى مەن ءادىلقازىلارى «باتىل جۇرەك» قۇرمەتتى سىيلىعىن ەرەن ەرلىگى ءۇشىن قۇماربەك جاكەتايۇلىنا بەرۋدى دۇرىس دەپ شەشتى»، - دەپ جازدى Facebook-تەگى پاراقشاسىندا اتالعان سىيلىقتىڭ ۇيىمداستىرۋشى عالىم بايتوق. ەسكە سالساق، 4 جەلتوقساندا كوكشەتاۋ تاس جولىندا جانتۇرشىگەرلىك اپاتتا ءۇش جاسار بالا قۇتقارىلدى.

كۋاگەرلەر قۇماربەك جاكەتايۇ ۇلىنىڭ ساۋ-تامتىعى قالماعان كولىك ىشىنەن كىشكەنتاي بالانى امان الىپ شىققانىن ايتادى. ودان كەيىن ارتقى ورىندىقتا وتىرعان قىز بالانى قۇتقارۋعا ۇمتىلعان ول ارت جاقتان قاتتى جىلدامدىقپەن كەلىپ سوعىلعان اۆتوبۋستىڭ استىندا قالعان. بۇگىنگى تاڭدا الەۋمەتتىك جەلىلەردە قازاقستان حالقى مارقۇمنىڭ وتباسىنا كومەك كورسەتۋ اكسياسىن ۇيىمداستىرىپ جاتىر. قازىرگى تاڭدا بانكتەن سەرىك نويانباي ۇلىنىڭ اتىنا ارنايى شوت اشىلىپ، ەلىمىزدىڭ تۇكپىر-تۇكپىرىنەن قارجى قۇيىلۋدا. بەيسەنبى كۇنى اقمولا وبلىستىق ءىىد-نىڭ باسپا ءسوز حاتشىسى گۇلنار پينچۋك قۇماربەك جاكەتايۇلىن ناگراداعا ۇسىنۋ ماسەلەسى الداعى ۋاقىتتا شەشىلەتىنىن ءمالىم ەتكەن: «قىلمىستىق ءىستى تەرگەۋ امالدارى مەن بولعان وقيعانىڭ ءمان-جايى انىقتالعان سوڭ وتە قيىن جاعدايدا ادامداردىڭ ءومىرىن الىپ قالۋعا دەگەن ۇمتىلىسى ءۇشىن مارقۇم قۇماربەك جاكەتايۇلىن ناگراداعا ۇسىنۋ ماسەلەسى شەشىلەتىن بولادى». ودان بولەك «قازاقپارات» حاا اقمولا وبلىسىندا بولعان اپات جايلى تولىققاندى ماقالا جاريالاعان ەدى.

قۇماربەك جاكەتاي ۇلى بۋراباي اۋدانى جاڭاجول اۋىلىنىڭ تۇرعىنى. 1991 جىلى موڭعوليادان اتامەكەنگە ورالعان. ارتىندا ءۇش بالاسى، جارى قالدى. ول ءومىرىنىڭ سوڭعى ساتىندە قارشاداي بالانى امان الىپ الۋعا كومەكتەسىپ، ورىمدەي جاس قىزدى قۇتقارىپ قالدى. ەكى جاستىڭ ءومىرى ءۇشىن ءوز جانىن پيدا ەتتى.