اقتوبە قالالىق سوتىنىڭ سۋدياسى زينايدا شىمىروۆا «مۇناي جانە مۇناي ونىمدەرىن ۇرلاۋمەن اينالىستى» دەپ ايىپتالعان توپتىڭ قۇرامىندا«كۇشتىك قۇرىلىم قىزمەتكەرلەرى دە بولعانىن» ايتتى دەپ حابارلايدى www.nur.kz.

شىمىروۆا 9 جەلتوقساندا كۇدىكتى توپتىڭ مۇشەلەرى باۋىرجان باتىروۆ پەن نۇرلان قازكەنوۆتى قاماۋعا سانكسيا بەرگەندە وسىنداي مالىمدەمە جاسادى.

سۋديانىڭ سوزىنشە، «ۇيىمداسقان قىلمىستىق توپقا كۇشتىك قۇرىلىم قىزمەتكەرلەرىنەن بولەك كۇزەت سالاسىنىڭ، مۇناي وڭدەۋشى كاسىپورىنداردىڭ وكىلدەرى مەن كولىك جۇرگىزۋشىلەرى دە مۇشە بولعان». سوتتا ايىپ تاعىلعان ازاماتتاردىڭ ءبىرقاتارىنىڭ فاميليالارى اتالدى.

ازىرشە جاريا بولعاندارى: ءىزباساروۆ، قالييەۆ، ەركەتايەۆ، اميتوۆ، ءدۇسىپوۆ. بۇل ازاماتتاردى قاماۋعا الۋ تۋرالى سوت سانكسياسى 10 جەلتوقسان كۇنى بەرىلەتىنى حابارلاندى.

اقتوبە وبلىسى مەن قازاقستاننىڭ كەيبىر ايماعىندا 7 جەلتوقسان كۇنى ۇقك جۇرگىزگەن ارنايى وپەراسيا بارىسىندا «مۇناي جانە مۇناي ونىمدەرىن ۇرلاۋمەن جانە زاڭسىز تاسىمالداۋمەن اينالىسقان» دەگەن كۇدىكپەن بىرنەشە ادام ۇستالعان ەدى.

رەسمي اقپارات بويىنشا 7 جەلتوقسان كۇنى ۇقك مەن كوررۋپسياعا قارسى ءىس-قيمىل ۇلتتىق بيۋروسى جانە ىشكى ىستەر مينيسترلىگى بىرلەسىپ، بىرنەشە ايماقتا «مۇناي ونىمدەرىن جىمقىرۋمەن اينالىسقان» دەگەن كۇدىككە ىلىنگەن توپتى ۇستاۋ وپەراسياسىن جۇرگىزگەن.

اقتوبەدەگى ارنايى وپەراسيا مۇناي وڭدەۋ زاۋىتىندا دا ءوتتى. ارنايى قىزمەت قانشا كۇدىكتىنىڭ قاي جەردە ۇستالعانى تۋرالى ناقتى اقپارات بەرمەدى. وپەراسيا بارىسىندا كۇدىكتىلەردەن وزگە مۇناي مەن مۇناي ونىمدەرى بار اۆتوسيستەرنالار دا تاركىلەنگەن.

ۇقك تاراتقان مالىمەت بويىنشا «مۇناي ۇرلاۋمەن اينالىسقانداردى قورعاشتاعان، راديكالدى ءسالافيزمدى تۇتىناتىن قىلمىستىق توپتىڭ بىرنەشە مۇشەسى ۇستالعان».