رەسەيلىك ءاربىر ەكىنشى ازامات قازاقستاندى پوست-كەڭەستىك ەلدەر اراسىنداعى ەڭ دامىعانى دەپ ەسەپتەيدى، دەپ حابارلايدى inform.kz

كورشىلەس ەل حالقىنىڭ 52 پايىزى وزىنە جاقىن ءارى قارىم-قاتىناسى نىعايعان ەل دەپ قازاقستاندى اتايدى. ونىڭ ۇستىنە رەسەي پرەزيدەنتىنىڭ نۇرسۇلتان نازاربايەۆپەن دوستىعى دا زور ماڭىزعا يە. بۇكىلرەسەيلىك الەۋمەتتىك پىكىر ورتالىعى زەرتتەۋىنىڭ ناتيجەسى وسىنداي.

ماسكەۋ مەملەكەتتىك ۋنيۆەرسيتەتىندە وتكەن عىلىمي-زەرتتەۋ كونفەرەنسياسىندا وسى وي-پىكىرلەر تالقىعا ءتۇستى. جيىندى قازاقستاننىڭ رەسەيدەگى ەلشىلىگى ۇيىمداستىردى. قوعام قايراتكەرلەرى قازاق ەلىنىڭ جەتىستىكتەرىن تارازىلاپ، تاريحشىلار تامىرى تەرەڭ، دىڭگەگى بەرىك مەملەكەت ەكەنىن ايتتى. شيرەك عاسىر شەجىرەسىن سارالاعان عالىمدار، قازاقستاننىڭ ساياسي تۇرعىدا قالىپتاسىپ، ەكونوميكالىق تۇراقتىلىققا قول جەتكىزگەنىن تىلگە تيەك ەتتى. ءارتۇرلى ۇلىستاردىڭ، ءتۇرلى ءدىن وكىلدەرىنىڭ ءبىر شاڭارىق استىندا ءتاتۋ-تاتتى ءومىر ءسۇرۋى الەمدىك ارەنادا كوپ كەزدەسە بەرمەيتىن مىسال. جيىنعا قاتىسۋشىلار مەملەكەتارالىق قارىم-قاتىناستى نىعايتۋدا قازاقستاننىڭ سەپتىگى مول ەكەنىن ەرەكشە اتاپ ءوتتى.

«نۇرسۇلتان نازاربايەۆ شيرەك عاسىر بويى ەلدى باسقارىپ ءجۇرىپ، رەسەيدىڭ ناعىز جاقىن دوسى ەكەنىن كورسەتتى. ول كىسى ساياساتتا سابىرلى، ستراتەگيالىق كوزقاراسى زور تۇلعا. قازاقستان ەكونوميكالىق تۇرعىدا كەرەمەت قادام جاسادى. بۇرىڭعى كەڭەس ەلدەرىنىڭ ىشىندە كوپتەگەن مەملەكەتتەر سەكىلدى 90-جىلدارداعى قيىن-قىستاۋ كەزەڭدى باستان وتكەردى. دەگەنمەن، ءوز قاتارلاستارىنان وق بويى وزىپ كەتتى»، دەيدى بۇكىلرەسەيلىك الەۋمەتتىك پىكىرلەردى زەرتتەۋ ينستيتۋتىنىڭ باس ديرەكتورى ۆالەريي فەدوروۆ.

«25 جىلدىڭ ىشىندە بۇل مەملەكەت كوپتەگەن قيىندىقتاردان ءوتتى. دامۋدىڭ دۇرىس جولىن تاڭداپ، حالىقتىڭ تۇرمىس-تىرشىلىگىن جاقسارتتى. بۇل وقيعالار قازاقستاندى سەنىمدى سەرىكتەس رەتىندە كورسەتەدى. قازاقستان مەن رەسەي قارىم-قاتىناسى ودان ءارى نىعايا تۇسسە ودان ەكى مەملەكەتتە ۇتىلماسى انىق»، - دەگەن پىكىرىن ءبىلدىردى ممۋ ازيا جانە افريكا ەلدەرى ينستيتۋتىنىڭ پرەزيدەنتى ميحايل مەيەر.