Brent مۇنايىنىڭ باعاسى ءبىر جارىم جىل ىشىندە العاش 57$ استى 2016 جىلعى 12 جەلتوقسان مۇناي ەكسپورتتاۋشى ەلدەر ۇيىمى (وپەك) مەن كارتەلگە كىرمەيتىن مەملەكەتتەر اراسىندا مۇناي ءوندىرىسىن قىسقارتۋ تۋرالى كەلىسىمگە قول جەتكىزىلگەننەن كەيىن،  Brent  ماركالى مۇنايىنىڭ فيۋچەرستەر قۇنى 2015 جىلدىڭ 21 شىلدەسىنەن بەرى العاش رەت 57 دوللاردان استى. بۇل تۋرالى قازاقپارات حابارلايدى.

مۇنى  لوندونداعى ICE قۇرلىقارالىق بيرجاسىنىڭ ساۋدا-ساتتىق مالىمەتتەرىنەن كورۋگە بولادى. سەنبى، 10 جەلتوقسان كۇنى ۆەنادا وپەك-كە مۇشە ەمەس ەلدەر مينيسترلەرىنىڭ كارتەلگە ەنبەيتىن مەملەكەتتەر وكىلدەرىمەن كەزدەسۋى اياقتالدى. وتىرىس التى ساعاتقا جالعاسىپ، ناتيجەسىندە مۇناي ءوندىرىسىن شەكتەۋ تۋرالى كەلىسىمگە قول قويىلدى. رەسەي ەنەرگەتيكا ءمينيسترى الەكساندر نوۆاكتىڭ حابارلاۋىنشا، كەلىسىمگە وپەك-كە كىرمەيتىن 11 مەملەكەت قوسىلدى. ولار العاشقى جارتىجىلدىقتا مۇناي ءوندىرىسىن شامامەن تاۋلىگىنە 560 مىڭ باررەلگە دەيىن ازايتاتىن بولادى. ايتا كەتەيىك، 30 قاراشا كۇنى وپەك قۇرامىنداعى مەملەكەتتەر مۇناي ءوندىرىسىن قىسقارتۋ تۋرالى كەلىسكەن بولاتىن: 2017 جىلدىڭ قاڭتار ايىنان باستاپ ول تاۋلىگىنە 1،2 ميلليون باررەلگە دەيىن قىسقارادى. سول كۇنى نوۆاك رەسەيدىڭ وتىن ءوندىرىسىن تاۋلىگىنە 300 مىڭ باررەلگە دەيىن ازايتۋعا دايىن ەكەنىن حابارلادى. 

ايتا كەتەتىن بولساق، وسىدان ءۇش جىلداي ۋاقىت بۇرىن مۇناي باعاسى قازىرگىدەن ەكى ەسەگە كوپ ەدى. اتاپ ايتقاندا، 2014 جىلى 17 اقپان كۇنى Brent ماركالى مۇناي باررەلىنە 109،40 دوللار كولەمىندە باعالاندى. ال WTI ماركالى مۇناي باررەلىنە 100 دوللارعا جەتىپ، ەكەۋىنىڭ ايىرماسى 8،54 دوللاردى كورسەتكەن بولاتىن. مۇناي باعاسى وتىز دوللارعا دەيىن قۇلدىراپ كەتكەندىكتەن قازاقستان ۆاليۋتاسى ەكى ەسەگە قۇنسىزدانىپ كەتكەن ەدى. مۇناي باعاسى كوتەرىلۋىن جالعاستىراتىن بولسا، ۆاليۋتامىز تەڭگە نىعايۋى مۇمكىن.