قازاقستاندا مەملەكەتتىك مەنشىكتى وڭتايلاندىرۋ 2 كەزەڭمەن جۇرگىزىلەدى دەپ حابارلايدى inform.kz

«بۇگىنگى تاڭدا مەملەكەتتىك مەنشىكتە 7 مىڭعا جۋىق ۇيىم جۇمىس ىستەيدى، ولار - مەملەكەتتىك كاسىپورىندار، اكسيونەرلىك قوعامدار، جاۋاپكەرشىلىگى شەكتەۋلى سەرىكتەستىكتەر. تۇگەندەۋ جونىندەگى تاپسىرمانىڭ اياسىندا اكىمدەردىڭ ورىنباسارلارىن شاقىرا وتىرىپ جانە «اتامەكەن» ۇلتتىق كاسىپكەرلەر پالاتاسىنىڭ قاتىسۋىمەن 16 وبلىس جانە 177 اۋدان تىڭدالدى. 6 751 ۇيىمنىڭ ىشىنەن ءار نىسان قارالدى. سونداي-اق 376 رەسپۋبليكالىق مەنشىك ۇيىمى بويىنشا 22 مينيسترلىك پەن ۆەدومستۆو باياندادى»، - دەدى ول.

ءمينيستردىڭ اتاپ وتۋىنشە، تۇگەندەۋ ناتيجەلەرى بويىنشا مەملەكەتتىك مەنشىكتى وڭتايلاندىرۋ 2 كەزەڭمەن جۇرگىزىلەدى. الدىمەنەن مەملەكەتتىك مەنشىك ۇيىمدارىنىڭ سانى 1 مىڭنان اسا ۇيىمعا نەمەسە 16 پايىزعا قىسقارادى. ەكىنشى كەزەڭدە  تاعى 4 600-گە جۋىق ۇيىمعا نەمەسە باستاپقى سانىنان 65 پايىزعا ازايتۋ ۇسىنىلادى.

«باسەكەلەستىك ورتاعا بەرۋدەن باسقا وڭتايلاندىرۋدىڭ قۇرالى رەتىندە ۇيىمداردى قايتا قۇرۋ جانە جابۋ قولعا الىنادى. ءبىرىنشى كەزەڭدە ۇيىمدار سانى 1 136 كاسىپورىنعا قىسقارادى. ولاردان: 408 ۇيىم  كەستەگە ەنگىزىلگەن؛ 105 ۇيىمدى كەستەگە ەنگىزۋدى ۇسىنامىز؛ 380 ۇيىم قايتا قۇرۋ جولىمەن قىسقارادى؛ 243 ۇيىمدى تاراتۋ (جويۋ) ۇسىنىلادى. سونىمەن، ءبىرىنشى كەزەڭنەن كەيىن مەملەكەتتىك مەنشىكتە 6 مىڭنان از كاسىپورىن قالادى.قالعان ۇيىمداردىڭ نەگىزگى بولىگىن بالاباقشالار، كوللەدجدەر، اۋرۋحانالار قۇرايدى. ولار باسەكەلەستىك ورتاعا ەكىنشى كەزەڭدە ۇسىنىلادى. ءقازىر اكىمدىكتەرمەن ىلكى جوبا رەتىندە 94 ۇيىمدى كەيىننەن ساتىپ الۋ قۇقىعىنسىز سەنىمگەرلىك باسقارۋعا بەرۋ كەلىسىلدى»، - دەدى سۇلتانوۆ.