قىرعىزستان كونستيتۋسياسىنا وزگەرتۋلەر ەنگىزۋ جونىندە بۇگىن ءوتىپ جاتقان رەفەرەندۋمگە بۇعان دەيىن وزگە ساياساتكەرلەرمەن بىرگە وعان قارسىلىق بىلدىرگەن قىرعىز وپپوزيسياسى ليدەرلەرىنىڭ ءبىرى ومۋربەك تەكەبايەۆ قاتىستى. بىشكەكتەگى 1220-سايلاۋ ۋچاسكەسىندە داۋىس بەرگەن تەكەبايەۆتىڭ ايتۋىنشا، ول داۋىس بەرۋ پروسەسىندە قۇقىق بۇزۋشىلىق بايقاماعان. ازاتتىقتىڭ قازاق قىزمەتىنە ول بۇگىنگى رەفەرەندۋمدە «ءوز ۇستانىمىن» ءبىلدىرىپ داۋىس بەرگەنىن مالىمدەدى. ونىڭ پىكىرىنشە، كونستيتۋسياعا وزگەرىستەر ەنگىزۋگە ەشقانداي قاجەتتىلىك بولماعان دەپ حابارلايدى azattyq.org

- بۇرىنعى پرەزيدەنت قۇرمانبەك باكييەۆ بيلىگى كەتكەننەن كەيىن قابىلدانعان كونستيتۋسيادا ونىڭ 2020 جىلعا دەيىن وزگەرتىلمەيتىنى ايتىلعان ەدى. ال مىنا رەفەرەندۋم كونستيتۋسيانى كەز-كەلگەن ۋاقىتتا وزگەرتە بەرۋگە بولادى دەيتىن ەسكى تۇسىنىككە قايتا ورالعانىمىزدى بىلدىرەدى، - دەپ مالىمدەدى تەكەبايەۆ.

كونستيتۋسياعا وزگەرتۋلەر ەنگىزۋ تۋرالى باستامانى جوگوركۋ كەڭەشتەگى التى فراكسيا – قىرعىزستان سوسيال-دەموكراتيالىق پارتياسى، «رەسپۋبليكا – اتا جۇرت»، «قىرعىزستان»، «ونۋگۋۋ - پروگرەسس» جانە «بير بول» كوتەرگەن. اتالعان پارتيا وكىلدەرى كونستيتۋسيالىق رەفورمانىڭ باستى ماقساتى – ۇكىمەت قۇزىرەتىن كەڭەيتىپ، سوت جۇيەسى رەفورماسىن جەدەلدەتۋ دەپ مالىمدەگەن.

نەگىزگى زاڭعا وزگەرتۋلەر ەنگىزۋگە قارسى شىققان بۇرىنعى ۋاقىتشا ۇكىمەت مۇشەلەرى اراسىندا ومۋربەك تەكەبايەۆ تا بار. ول 2010 جىلى ءساۋىر ريەۆوليۋسياسى ناتيجەسىندە قۇرمانبەك باكييەۆ بيلىكتەن كەتىرىلگەننەن كەيىن ەلدە جۇرگىزىلگەن ساياسي رەفورمالاردىڭ، سولاردىڭ اراسىندا كونستيتۋسياعا ەنگىزىلگەن وزگەرتۋلەر اۆتورلارىنىڭ ءبىرى بولعان ەدى.