قازاقستاندىق اكتەر، شوۋمەن ءارى ءانشى ءانۋار نۇرپەيىسوۆ "قازاقستان ارۋى" ۇلتتىق كونكۋرسىنىڭ فينالىنداعى ارەكەتىن ءتۇسىندىردى، - دەپ حابارلايدى  tengrinews.kz

ايتا كەتەيىك، تىكەلەي ەفيردە نۇرپەيىسوۆ قاتىسۋشى قىزداردى كىتاپ وقىمايتىنىن ايتىپ، ۇيالتقان ەدى.

"مەن تابيعي سۇلۋلىقتىڭ بولعانىن قالايمىن. شىنىمدى ايتايىن - مەن قازىلار القاسىنا كىرگىم كەلمەگەن ەدى، ۇيىمداستىرۋشىلاردان مەنى شىعارىپ تاستاۋىن سۇرادىم، ءبىراق ولار مەن اسا قاتتى قۇرمەتتەيتىن ءبىر ادام ارقىلى شىعىپ، ءوتىنىش ءبىلدىردى. بىرەۋ ارقىلى ءوتىنىش ايتقاندى ۇناتا بەرمەيمىن. وتكەن جىلى كونكۋرستىڭ قالاي وتەتىنىن كوردىم. بۇل جولعى سۇلۋلىق بايقاۋىنا سوڭعى رەت قاتىسۋ ءۇشىن بارىمدى جاسادىم. قازىلار القاسىنىڭ مۇشەسى رەتىندە مۇمكىندىگىمدى پايدالانىپ، پىكىرىمدى ايتتىم. ءبىراق، وكىنىشكە قاراي، سوڭىنا دەيىن ايتا المادىم، ميكروفوندى تارتىپ الدى"، - دەدى نۇرپەيىسوۆ. ول وسى سوزىنەن كەيىن زالدان شىعىپ كەتىپتى.

ونىڭ ايتۋىنشا، قاتىسۋشى قىزعا كىتاپ جايلى تاعى دا سۇراق قويۋعا وتكەن جىلعى كونكۋرس سەبەپ بولىپتى. سول ۋاقىتتا ءاليا مەرگەنبايەۆا كىتاپ وقىمايتىنىن مويىنداعان ەدى.

"وتكەن جىلى تۇڭىلگەنىم سونشالىقتى، كىتاپ جايلى سۇراق قويۋعا بەل بۋدىم. ەگەر قىز جاقسى جاۋاپ بەرسە، ۇندەمەي قالامىن دەپ ويلادىم. ال ەگەر دىم دا بىلمەيتىن بولىپ شىقسا، وسىلاي مالىمدەمە جاسايمىن دەپ ويلادىم. سەبەبى بۇل دياگنوز. بىزدە سۇلۋلىق كۋلتى بار، ءبىراق ءبىلىم مەن دەنساۋلىق كۋلتى جوق. وكىنىشكە قاراي، ءبىزدىڭ ترەند سونداي، ادەمى بولىپ، تۇرمىسقا شىعۋ، بالا بوسانۋ جانە بىرەۋدىڭ اسىراۋىندا وتىرۋ. ال ەگەر تۇرمىسقا شىعۋدى جازباسا، توقال بولا سالۋ"، - دەيدى اكتەر. 

"مەن قاراپايىم سۇراق قويدىم عوي، قىز نە ءۇشىن رەنجيدى؟ مەن تەك سۇراق قويدىم. مەنىڭ ايتقان سوزدەرىمنەن كەيىن ەلىمىزدە ەڭ بولماعاندا ءبىر قىز كىتاپ وقي باستاسا، بۇل ءسوزىم ورىندى بولدى دەگەن ءسوز جانە بۇل تەلەارنانىڭ ءبىر مينۋتىن وسى ماقساتتا جۇمساۋعا لايىق بولعانى. قىزدارعا جاساندى سۇلۋلىققا جۇگىرۋدىڭ قاجەت ەمەس ەكەنىن بۇرىننان ايتقىم كەلەتىن. 20 جىلدان كەيىن سىزدەر سۇلۋ بولماي قالاسىزدار. باسقا دۇنيەگە قىزىعۋ كەرەك"، - دەدى نۇرپەيىسوۆ.

ال "قازاقستاننىڭ ءبىرىنشى ۆيسە-ارۋى" اتاعىن جەڭىپ العان "استانا ارۋى" ەلناز نۇرسەيىتوۆا كونكۋرستاعى ناتيجەگە كوڭىلى تولاتىنىن ايتادى. "25 قىزدىڭ ىشىندە كوبى تيتۋل الا المادى، سوندىقتان ءبىرىنشى ورىن العانىما قۋانىشتىمىن، قانداي دا بولسىن جەڭىس قوي"، - دەدى نۇرسەيىتوۆا.

ارۋ ءبىلىم تەكسەرۋ كونكۋرسىندا نەلىكتەن دۇرىس جاۋاپ بەرە الماعانىن ءتۇسىندىردى. "مەنىڭشە، جاقسى جاۋاپ بەردىم، ءبىراق ءبىر ساتتە ساسىپ قالدىم. مەن ەشكىمگە رەنجىگەن جوقپىن. سەبەبى ول (ءانۋار نۇرپەيىسوۆ - اۆت.) ءاردايىم كىتاپ جايلى سۇراق قويادى، بۇلاي بولاتىنىن ءبىلدىم. ءانۋار نۇرپەيىسوۆتىڭ ودان كەيىن ايتقانى ماعان عانا ەمەس، بارلىق قاتىسۋشىعا قاتىستى. ءبىراق كەيبىرەۋلەر ونىڭ بۇل ءسوزى ماعان عانا ايتىلدى دەپ ويلاپ، جامان پىكىرلەر جازىپ جاتىر، وزىنە سول كەرەك دەگەندەي"، - دەيدى قىز. "جالپى العاندا ول دۇرىس ايتتى، ءبىراق بۇل كونكۋرستا ايتقانى دۇرىس ەمەس دەپ ويلايمىن. سەبەبى بۇل زياتكەرلىك كونكۋرس ەمەس، سۇلۋلىق بايقاۋى"، - دەدى ول.

ونىڭ ايتۋىنشا، قىز قازىرگى ادەبيەتتى وقيدى. "قازىرگى ۋاقىتتا "شانتارام" كىتابىن وقىپ جاتىرمىن، "دو ۆسترەچي س توبوي"، "ەسلي يا وستانۋس" "پەسن"، "گارري پوتتەردىڭ" بارلىق بولىگىن وقىعانمىن. ماعان قازىرگى ادەبي تۋىندىلار ۇنايدى، ورىس تىلىنە اۋدارىلعان اعىلشىن كىتاپتارى دا ۇنايدى"، - دەدى قىز. قازاق كلاسسيكتەرىنىڭ ىشىنەن ول ءابدىجامىل نۇرپەيىسوۆتىڭ "قان مەن تەر" رومانىن، مۇحتار اۋەزوۆتىڭ "اباي جولى" رومانىن جانە سۇلتانماحمۇت تورايعىروۆتىڭ "قامار سۇلۋ" رومانىن وقىعانىن ايتتى.

"ونىڭ حالىقتىڭ الدىندا باتىر، ال مەنىڭ دىم وقىمايتىن قىز بولىپ كورىنگەنىم ادىلەتسىزدىك. اتا-انامنىڭ الدىندا دا ۇيات! ولار مەنى ەلدىڭ الدىندا ماسقارا بولسىن دەپ تاربيەلەگەن جوق قوي. مەنىڭ انام ءمۇعالىم، سوندىقتان بالا كەزدەن كىتاپ وقىپ وستىك. ءانۋار نۇرپەيىسوۆ مەنى ماسقارالاپ قانا قويماي، اتا-انام مەن تۋىستارىمدى دا وكپەلەتكەنىن تۇسىنبەيدى! ونى قويشى، ميلليونداعان قازاق قىزىنا اۋىر ءسوز ايتىلدى"، - دەدى ەلناز نۇرسەيىتوۆا.

"استانا ارۋى-2016" جانە "قازاقستاننىڭ ءبىرىنشى ۆيسە-ارۋى" 18 جاستاعى ەلنار نۇرسەيىتوۆا قازاق تەحنولوگيا جانە بيزنەس ۋنيۆەرسيتەتىنىڭ ستۋدەنتى، بەينەلەۋ ونەرىمەن، مۋزىكامەن اينالىسادى، ارمرەستلينگ، باسكەتبول، ۆولەيبولمەن اينالىسادى.