تاۋەلسىزدىكتىڭ 25 جىلدىعىنا جانە ۇلتتىق ۆاليۋتا كۇنىنە وراي تۇڭعىش پرەزيدەنت كۇنى قارساڭىندا اينالىمعا ەلباسى ن. نازاربايەۆتىڭ سۋرەتى باسىلعان 10 مىڭ تەڭگەلىك بانكنوتالار اينالىمعا شىعاتىنى حابارلانعان بولاتىن.

ال، 12 جەلتوقساننان باستاپ اتالعان بانكنوتالار ۇلتتىق بانكتىڭ فيليالدارى ارقىلى تاراتىلا باستادى. بار-جوعى 100 مىڭ دانامەن شىعارىلعان جاڭا بانكنوتانى الامىن دەۋشىلەردىڭ سانى دا از ەمەس سياقتى. ونىڭ ۇستىنە ۇلتتىق بانك پرەزيدەنت بەينەسى باسىلعان جاڭا اقشا ءار ادامعا تەك ءبىر دانادان عانا بەرىلەتىنىن، سايلاۋلارداعىداي «كارۋسەل» جاساپ، ءبىر ادامنىڭ بىرنەشە قۇندى قاعاز يەلەنۋىنە جول بەرىلمەيتىنىن دە قاتاڭ ەسكەرتكەن. سوندىقتان دا، نازاربايەۆتىڭ پورترەتى باسىلعان بانكنوتانى ۇستاۋ – ەكىنىڭ بىرىنە بۇيىرا بەرمەيتىن ب ا ق.

جاڭا ون مىڭ تەڭگەلىككە قول جەتكىزگەندەر تۇسكە تامان ول قۋانىشتارىمەن ءتۇرلى الەۋمەتتىك جەلىلەر مەن فورۋمداردا بولىسە باستاعان. ال، «Ratel» سايتى بولسا اتالعان بانكنوتانى ينتەرنەت پەن الەۋمەتتىك جەلى ارقىلى ساۋداعا شىعارعانداردىڭ دا بار ەكەنىن جازادى. وسىلايشا، ادامداردىڭ پاتريوتتىق سەزىمى مەن پرەزيدەنتكە دەگەن ماحابباتىنان دا پايدا تابۋدى ءجون ساناعاندار دا جوق ەمەس. شاماسى ولار جاڭا اقشانى ۇلتتىق بانك فيليالىنا بارىپ العاننان، ينتەرنەت ارقىلى ساتىپ الۋدى جەڭىل سانايتىنداردىڭ كوپ بولارىنا سەنىمدى سياقتى. سوندىقتان دا، جارتى كۇن ىشىندە ساتىلاتىن 10 مىڭ تەڭگەلىكتەرگە باتىل باعالار باعامى بوي تۇزەپتى. الەۋمەتتىك جەلىلەر مەن ينتەرنەت-دۇكەندەردە ول ءار داناسى ءۇشىن 15 مىڭنان 50 مىڭ تەڭگەگە دەيىن ساۋدالانۋدا.

الايدا، كوللەكسيونەرلەر ءۇشىن 100 مىڭ دانا تارالىمنىڭ دا از ەمەستىگىن ەسكەرگەن ءجون.

باسىلىم وسى ورايدا تاعى ءبىر شيكىلىكتىڭ شەتىن شىعارىپ وتىر. جاڭا بانكنوتانىڭ تۇساۋكەسەرىندە ۇلتتىق بانك ءتوراعاسى دانيار اقىشيەۆ تانىستىرعان بانكنوتالاردىڭ سەرياسى قاز دەگەن ارىپتەردەن قۇرالسا، مىنا اينالىمداعىلارىنىڭ سەرياسىندا اا ارىپتەرى تاڭبالانعان. سونداي-اق، بانكنوتانىڭ رەسمي حابارلانعانداي الماتىداعى بانكنوتا فابريكاسىندا ەمەس، قازاقستاننان تىس جەردە، De La Rue كومپانياىنا قاراستى فابريكالاردىڭ بىرىندە باسىلعانى ايتىلۋدا.