وتكەندە ءبىر وتىرىستا جاسى جيىرما بەسكە كەلگەن ءبىر تانىسىمىزدىڭ قىزىن ءبارى وتىرعىزىپ قويىپ، ال كەپ تەرگەسىن. "نەگە جىگىتىڭ جوق، قاشان تۇرمىسقا شىعاسىڭ" ، "تويعا قاشان بارامىز"، "مەنىڭ ءبىر تۋىسىمنىڭ بالەنشە دەگەن بالاسىمەن تانىساسىڭ با.."، "وسىلاي جۇرسەڭ قالىپ قالاسىڭ"، "اكە-شەشەڭدى ۋايىمداتپاي كەتسەڭشى تەزىرەك..."
انا قىز بايعۇس نە دەرىن بىلمەيدى، ۇيالعانىنان تومەن قاراپ، كۇلىپ قويىپ وتىر. اناسى بولسا "بۇل ەشكىمدى مەنسىنبەيدى"، "ەلدىڭ سورلى قىزدارى قۇرلى بولمادى"، "ءبىر تانىستارىڭ بولسا، تانىستىرىڭدارشى وسى قىزدى" دەپ ودان ارمان قىزىن ۇيالتىپ بارادى. اقىر اياعىندا الگى قىز ورنىنا تۇرىپ، باسقا بولمەگە بارىپ، شىقپاي قويدى. كەتەر كەزدە جىلاعاننان كوزى ءىسىپ تۇرعانىن بايقادىم. جۇرەگىم سونداي اۋىرىپ كەتتى... سەبەبى، وسى تارىزدەس سيتۋاسيا ءوز باسىمدا سوڭعى كەزدەرى ءجيى ورىن الىپ ءجۇر.
مەنىڭ دە بۇگىنگى كۇنى ەڭ جەك كورەتىن سۇراعىم "قاشان تۇرمىسقا شىعاسىڭ..." قاشان شىعاتىنىمدى بىلسەم، تۇپ-تۋرا ماڭدايىما جازىپ الىپ جۇرەر ەدىم. قايدا بارمايىن وسى سۇراق مەزى ەتتى. قاي-قايداعى كوشەدە مىنگەن تاكسيستكە دەيىن "نەگە بويداق ءجۇرسىز" دەپ "ناگلو" سۇرايدى. تۋعان-تۋىس جايلى ايتپاي-اق قويايىن. ءوتىنىش، ءدال وسى سۇراقتى قويار الدىن ويلانىڭىزدارشى... قاي قىز اق كويلەك كيىپ، سۇيگەنىنە قوسىلىپ، باقىتتى ءومىر سۇرگىسى كەلمەيدى؟! بۇل پروبلەما 20-25 اراسىنداعى بارلىق قىزدىڭ باسىندا بار ەكەنىنە سەنىمدىمىن. "قۇداي بەرمەگەندى تارتىپ الا المايسىڭ" دەمەي مە؟! كىمنىڭ دە بولسىن پەشەنەسىنە جازىلعان بىرەۋى بار بولار. "سەن سۇيگەن ادام سەنى سۇيمەيدى"، "سەنى سۇيسە بولدى، سەنىڭ ءسۇيۋىڭ شارت ەمەس"، " جانىڭدى باقسا جەتەدى"، "ەسى بار جىگىتتىڭ ەتەگىنەن ۇستا"، "تۇرىنە قاراما"، "جۇمىسىنا قاراما"، "جاعدايىنا قاراما"... بىتپەيتىن كەڭەستەر... 
قۇداي-وۋ، ءبىر اق رەت بەرىلەتىن ومىردە نەگە قىزدار ەشتەڭەگە قاراماۋى ءتيىس؟ نەگە سۇيمەۋى كەرەك؟ قازىرگى ۇيلەنە سالىپ، اجىراسۋدىڭ ءبارى وسىنداي "اقىلدىلاردىڭ" اقىلىن تىڭداعاننان بولار دەپ ويلايمىن كەيدە... نەبارى جيىرما ءۇش جاستاعى ماعان كۇنىنە قىرىق اقىل ايتاتىن ادام تابىلادى. سولارعا قاراسام، مەن قارتايىپ، سروگى ءوتىپ، ەسكىرىپ بارا جاتقان زات سەكىلدىمىن. مەنىڭ سۇيۋگە، تاڭداۋعا، تۇرىنە، بىلىمىنە، جۇمىسىنا، اقىر اياعى جاعدايىنا قاراۋعا دا قاقىم جوق. "ەشتەڭگە قاراما، تيە بەر". سونداعى بار ايىبىم جاسىم 24-كە كەتىپ بارا جاتقانى. ەكى جىلدان سوڭ 25-كە كەلسەم بولدى، ەشقاشان تۇرمىس قۇرماي قالاتىن سياقتىمىن. 25-فوبيا. تۋعان -تۋىس، ءبۇتىن ءبىر اۋلەت سەنىڭ ەكى جىلدان كەيىن 25-كە كەلەتىنىڭدى ەسىڭە سالا بەرەدى. سەن قانشا وزىڭە سەنىمدى، ۇستامدى، ار-يباڭدى ساقتاعان قىز بولساڭ دا، انا سوزدەردەن كەيىن كادىمگىدەي ويلانىپ، ىشتەي بىت-شىت بولىپ قالاسىڭ... قايدا بارساڭ سول اۋەن. ەشكىمدى سەنىڭ ينديۆيد ەكەنىڭ، ءوز ويىڭ، ءوز تاڭداۋىڭ، ءوز قالاۋىڭ بار ەكەنى قىزىقتىرمايدى. "اسپاننان جەرگە ءتۇس"، "مۇرنىڭدى شۇيىرمە" دەيدى. ولارعا قاراساڭ، سەنىڭ اياعىڭنىڭ استىندا جىگىت شاشىلىپ جاتقانداي، سەن بولساڭ ەشكىمدى ۇناتپاي، يدەالنىي "پرينستى" كۇتىپ جۇرگەن "وزىنشەسىڭ"... جاناشىرلىقپەن اقىل ايتىپ، كەڭەس بەرەتىندەردى تۇسىنەمىن. ءبىراق، ءبىر ۋاقىت سول قىزداردى دا تۇسىنىڭىزدەرشى. بالكىم، وعان ءوزى ويلاعان ادام جولىقپاعان بولار... قايتا-قايتا ءبىر سۇراقتى ايتىپ، جالعىز جۇرگەنىن بەتىنە باسىپ، جۇرەكتەرىن اۋىرتپاڭىزدارشى. جالپى، كىمنەن بولسىن "قاشان تۇرمىسقا شىعاسىڭ، نەگە جىگىتىڭ جوق" دەپ سۇراۋدىڭ ءوزى ىڭعايسىز ەمەس پە؟! اركىمنىڭ ءوز شەكاراسى، ءوز الەمى بولادى عوي. ول مارەدەن اسىپ، ونىڭ سەبەبى مەن سالدارىن سۇراپ، تەرگەۋگە الۋ، ەكى ساعات مورال وقۋ ول ادامعا دا ۇناي قويمايدى.
وسىندايدا جيىرما ءبىرىنشى عاسىردا تۋىلعانىما قۋانىپ قالامىن. باياعى زامان بولسا، قۇداي بىلەدى قانشا جاسىمدا ۇزاتىپ جىبەرەر ەدى، ونىڭ ءوزى ادەبي كىتاپتاردان وقىپ جۇرگەن جۇمان تازداي بولىپ جۇرسە، قۇرسىن ويلاعىم دا كەلمەيدى. وسىنداي سيتۋاسيالاردا جالپى نە ىستەۋ كەرەك؟ قىزداردى وسىلاي قىسپاققا العان دۇرىس پا؟

اۆتورى: ايجان قالييەۆا