شىمكەنتتە وسىدان ەكى اي بۇرىن بولعان جويقىن جارىلىستىڭ قۇپياسى اشىلا باستادى. بەتون قابىرعالارعا دەيىن قۇلاتقان ءۇيىندىنىڭ استىندا “باۋىرىمىزدىڭ دەنەسى جاتىر” دەپ، ءىزباسقان ەرعارانىڭ تۋىستارى قانشا جەردەن زار يلەگەنىمەن، سول كەزدە قۇتقارۋشىلاردا، پوليسەيلەردە سەنبەي، ءۇيىندىنى ارشىپ، دەنەسىن  ىزدەۋگە قۇلىق تانىتپاي قويعان. اقىرى، قولدارىنا كۇرەك الىپ، ءوز بەتتەرىنشە  50 كۇن بويى قازعان جاقىندارى، ءمايىتتى الىپ شىقتى دەپ حابارلايدى halyknews.kz

ءمايىتى ءۇيىندىنىڭ استىندا قالدى دەگەن تۋىستارىنىڭ ءسوزى بۇگىن راستالىپ وتىر. ءدال وسى ەسكى قۇرىلىستىڭ ءۇيىندى استىنان بۇگىن قۇزىرلى ورىنداعىلار قىرىق جاستاعى ءىزباسقان ەرعارانىڭ ءمايىتىن ارشىپ الدى.

وقيعا ورنىنا كەلگەن ءىزباسقاننىڭ تۋىستارى ءتۇسىرىلىم توبىن ىشكە كىرگىزبەككە ارەكەتتەندى، الايدا پوليسيا وكىلدەرى باسشىلار ءالى كەلمەدى، رۇقسات جوق دەپ تيىم سالدى. بۇل جاعداي قايعىرعان كىسىلەردىڭ اشۋىن كەلتىردى.

شىمكەنتتەگى قورعاسىن زاۋىتىنىڭ ەسكى عيماراتى ماڭىنا پوليسەيلەر كوپ جينالدى. ءبارى جەدەل توپتىڭ كەلۋىن كۇتۋدە. سونداي-اق، ءىزباسقاننىڭ ءمايىتى تابىلدى دەگەندى ەستىپ كەلگەن ونىڭ تۋىستارى دا وسىندا. ءمايىت جاتىر دەگەنگە سەنبەگەندەردىڭ ءبىرى توتەنشەلىكتەر بولسا، ەندى ءبىرى مىنە، وسىلار – دەگەن مارقۇمنىڭ تۋىستارى پوليسەيلەردى نۇسقاپ كورسەتۋدە.

ماي ەرعارا، ءىزباسقاننىڭ اعاسى:
– قىرىق توعىز كۇننەن بەرى وسىندا جاتىر. وسىندا بىرنەشە ادام جاتىر، نە تولكو ون. ونىڭ الدىندا دا ءبىر ولىك شىققان. بۇلاردىكى نيكاكوي، وبسوليۋتنو بەزدەيستۆيە. سسىلكا تولكو. ميليسيا وعان. اناۋ مىناعان.

ءىزباسقاننىڭ تۋىستارىنا قازبا جۇمىستارىن جۇرگىزۋگە تىيىم سالۋشىلار كوپ بولعان. ەڭ الدىمەن اپاتتى عيماراتقا كۇزەتشىلەر جىبەرمەسە، كەيىن كەپىلدەگى مۇلىك دەپ بانك قارسى شىققان. توتەنشەلىكتەر مەن پوليسيا دا، ءتىپتى اكىمدىك تە ات تونىن الا قاشقان. تۋىستارى پروكۋراتۋراعا، پرەزيدەنت اكىمشىلىگىنە دەيىن جازعان شاعىمداردان سوڭ، از عانا قوزعالىس بولعان. ارنايى جاساق تۇسكە جاقىن ءمايىتتى تاپقان. ال توتەنشەلىكتەردىڭ ون جۇمىسشىسى مەن ارنايى تەحنيكا جاساعى جۇمىستى تاڭعى ون شاماسىندا باستاعانىن ايتادى. الدىمەن ءقاۋىپ تۋدىراتىن كەدەرگىلەردى جويىپ، كەيىن قازۋعا كىرىستىك دەيدى. الايدا ءمايىت تۋىستارى ايتقان ورىننان ارىراق جەردەن شىقتى دەپ وتىر.

تالعات بايسارييەۆ، جەدەل جاساق باسشىسىنىڭ ورىنباسارى:
– ناتيجەسىندە جوعالعان كىسى تابىلدى ءمايىتى. ىشكى ىستەر باسقارماسىنىڭ قىزمەتكەرلەرى مەن تۋىستارىنا ءمايىت الىپ شىعارىلىپ بەرىلدى.

پوليسياداعىلار ءمايىتتى ساراپتاماعا جىبەرەتىنىن ايتىپ وتىر. تۋىستارى ارتىنشا جەرلەۋگە الىپ كەتەمىز دەدى. ەلۋ كۇندەي ءۇيىندى استىندا قالعان مارقۇم ءىزباسقاندى ىزدەۋگە قۇلىق تانىتپاعان قۇزىرلى ورىنداعىلار ۇستىنەن اشىنعان اعايىندارى شاعىم بەرەتىندىكتەرىن دە جاسىرماي وتىر.