قازاقستاننىڭ موڭعولياداعى توتەنشە جانە وكىلەتتى ەلشىسىنىڭ باستاماسىمەن قازاقستان رەسپۋبليكاسى تاۋەلسىزدىگىنىڭ 25 جىلدىعىنا وراي «موڭعوليا قازاقتارى» اتتى كولەمدى كىتاپ جارىققا شىقتى، دەپ حابارلايدى baq.kz
جيناققا موڭعوليا ەلىندە دۇنيەگە كەلىپ، ەكى ەلگە دە بىردەي ەڭبەك سىڭىرگەن جانە ءالى دە قىزمەت ەتىپ جۇرگەن ازاماتتار جايلى ەنسيكلوپەديالىق انىقتامالىق تۇرىندە مالمەتتەر ەنگىزىلگەن.
«بۇل ەڭبەك موڭعوليا قازاقتارىنىڭ وسى ەلدىڭ ساياسي-ەكونوميكالىق، الەۋمەتتىك-مادەني دامۋنا قوسقان ۇلەسىنىڭ تاريحي ورنى مەن ءرولىنىڭ، زيالى قاۋىمىنىڭ ءوز ورتاسىنداعى ءوسۋ جولى مەن بەت بەدەلىنىڭ ايعاعى. اتاجۇرت – قازاقستان رەسپۋبليكاسىنىڭ بۇگىنگى جاسامپاز وركەندەۋىنە قوسىپ وتىرعان ماتەريالدىق ءارى رۋحاني ۇلەستەرىنىڭ كۋاسى بولماق» - دەلىنگەن كىتاپتىڭ العىسوزىندە.
سونىمەن قاتار، بۇل جيناققا قازىرگى موڭعوليا قازاقتارى اراسىندا بولاشاعىنان ءۇمىت كۇتتىرەدى دەگەن سەنىمگە يە تالانتتى جاستاردىڭ دا ءبىر شوعىرى قامتىلعان ەكەن.
ارينە، اركىم ءوزىنىڭ قال-قادەرىنشە ەڭبەك ەتىپ، ءوز شاماسىنشا قازاق ۇلتىنىڭ دامۋىنا قىزمەت اتقارىپ كەلەدى. وسى ءبىر جيناققا ءبىر ەلدە تۇراتىن بارلىق قازاقتى سيدىرامىن دەۋ ابەستىك ەكەنىن ايتقان قۇراستىرۋشىلار بۇل ەڭبەكتىڭ تاۋەلسىزدىكتىڭ 25 جىلدىعىنا تارتقان تارتۋ ەكەنىن ايتادى.
بۇگىن باسىلىمدى موڭعوليا استاناسى ۇلانباتىر قالاسىنداعى قازاق زيالىلارىنا تانىستىرعان جوبا جەتەكشىسى، كىتاپتىڭ رەداكتورى، ق ر موڭعولياداعى توتەنشە جانە وكىلەتتى ەلشىسى قالىبەك قوبىلاندين قازاقستان رەسپۋبليكاسىنىڭ تاۋەلسىزدىك كۇنى قارساڭىندا قازاق زيالىلارىن قابىلداپ، ارنايى سىي-سياپات جاسادى.
