اقيىق اقىن تاڭجارىق جولدى ۇلى مەن داۋلەسكەر كۇيشى ءاشىم ءدوڭشى ۇلىنىڭ اتى كۇنەس قالاشىعى ورتالىعىنداعى ورتالىق كوشەلەرگە بەرىلەتىن بولدى. بۇل تۋرالى «قامشى» پورتالى حابارلايدى. اتالعان اكىمشىلىك ورىن شىڭجاڭداعى ىلە ايماعىندا ورنالاسقان الەمدەگى قازاقتار ەڭ كوپ قونىستانعان اۋدان كۇنەس اۋدانىنىڭ ورتالىعى بولىپ تابىلادى.

كۇنەس اۋدانىنىڭ اكىمشىلىگى 9-جەلتوقساندا ارناۋلى قاۋلى قابىلداپ، وتكەن عاسىردا ادەبيەت پەن مادەنيەتكە ەڭبەك سىڭىرگەن، ارتىنا تاۋداي مۇرا قالدىرعان، وسى ءوڭىردىڭ پەرزەنتتەرىنىڭ ەسىمىن ورتالىقتاعى حان كوشەلەرگە قويدى.

بۇگىن، 13 جەلتوقسان شىڭجاڭ اۆتونومياسىنا تارالاتىن قازاق ءتىلدى تەلەارنالار مەن راديولار بۇل تۋرالى ارناۋلى حابارلار جاساپ تاراتقان. سونداي-اق، ىلە وبلىستىق قازاق راديوسى 14-جەلتوقسان كۇنى تاڭعى ەفيردەن قايتالاي حابارلار تاراتاتىن بولادى.

وقىرماننىڭ ەسىنە سالا كەتەتىن بولساق، قازاق ادەبيەتىنىڭ كورنەكتى وكىلى، الاشوردانىڭ ارعى بەتتەگى جارىق جۇلدىزى تاڭجارىق جولدى ۇلى، اتاقتى كۇيشى ءاشىم ءدوڭشى ۇلى وسى كۇنەس اۋدانىندا تۋعان. ولاردىڭ اتى تۋعان اۋىلىندا عانا ەمەس جەتىسۋ وڭىرىندە تانىمال بولدى. ىلەنى ەن جايلاعان قازاقتى ءبىرى جىرىمەن تەربەسە ءبىرى كۇيىمەن سۋسىنداتتى. ءاشىم ءدوڭشى ۇلى (1896-1962) ءوز جانىنان جۇزگە تارتا كۇيلەر شىعارعان.

تاڭجارىق جولدى ۇلى (1903-1947) – تۇرمە ادەبيەتىن قالىپتاستىرۋىمەن اتى تانىمال. بىرنەشە جىلىن قازاقستاندا وتكىزگەن تاڭجارىق  – قىتايداعى قازاق ادەبيەتىنىڭ نەگىزىن قالاۋشى. ول – شىڭجاڭ وڭىرىندە العاشقى قازاق گازەتىن شىعارىپ، تەاتر اشقان، ۇستازدار جاساقتاپ، مەكتەپ سالدىرعان اعارتۋشى. ەڭ باستىسى، تاڭجارىق – ءاليحان بوكەيحانوۆ باستاعان «الاشوردانىڭ» جۇڭگو جەرىندەگى وكىلى بولدى. ول ءوز ءومىرىنىڭ ون جىلعا جۋىق ۋاقىتىن تۇرمەدە وتكىزدى. قايسار قالامگەر تاڭجارىق شىعارمالارىنىڭ 80-90 پايىزى تۇرمەدە جازىلعان.

اتالعان كۇنەس اۋدانىندا قالىڭ جۇرتقا تانىمال جازۋشى ءجۇمادىل مامان، «كوك تۋدىڭ جەلبىرەگەنى» ءانىن ومىرگە اكەلگەن ەرمۇرات زەيىپحان سياقتى تۇلعالار تۋعان.

ايتا كەتسەك، تاڭجارىق پەن ءاشىم اتىنا استانا قالاسىندا دا كوشە اتاۋلارى بەرىلگەن.