2016 جىلعى 16 جەلتوقسان كۇنى شامامەن ساعات 17.30-دا     قازاقستان رەسپۋبليكاسى تاۋەلسىزدىگىنىڭ 25 جىلدىعىن مەرەكەلەۋ كەزىندە تاراز قالاسىنداعى «دوستىق» ورتالىق الاڭىندا 20 م/س جىلدامدىقپەن سوققان دۇلەي جەلدىڭ ناتيجەسىندە الاڭدا ورناتىلعان قورعانىس شەبى كوتەرىلىپ كەتىپ، الاڭدا تۇرعان ادامدارعا قاراي ۇشىپ كەتتى. بۇل تۋرالى "قامشى" پورتالى «وڭتۇستىك» وڭىرلىك قولباسشىلىعىنىڭ باسپا ءسوز قىزمەتىنە سىلتەمە جاساپ حابارلايدى. 

الاڭدا قوعامدىق ءتارتىپ پەن قاۋىپسىزدىكتى قامتاماسىز ەتىپ تۇرعان قازاقستان رەسپۋبليكاسى ۇلتتىق ۇلانىنىڭ تاراز قالاسىنداعى 5513 اسكەري ءبولىمىنىڭ ساربازدارى وزدەرىنىڭ تاباندىلىعىمەن  جەدەل ارەكەت ەتۋلەرىنىڭ ارقاسىندا قورعانىس شەبىنىڭ ادامداردىڭ ۇستىنە قاراي قۇلاماۋىن قامتاماسىز ەتتى، ناتيجەسىندە الاڭعا جيىلعان حالىق وقىس وقيعادان امان قالدى. سول جەردە ۇلتتىق ۇلان ساربازدارى قاتارداعى امان اجەنوۆ، يۋريي باجين، يۋريي دىليۋك ءتۇرلى دارەجەدەگى جاراقاتتار الدى.

تابيعاتتىڭ وقىستان پايدا بولعان احۋالى كەزىندە 5513 اسكەري ءبولىم ساربازدارى وزدەرىنىڭ قايسارلىعى مەن تاباندىلىعىنىڭ ارقاسىندا بەيبىت تۇرعىنداردىڭ جاراقات الۋلارى مەن جازىمتاي جاعدايلارىنا جول بەرگەن جوق.

جاراقات العان ساربازدارعا شۇعىل العاشقى مەديسينالىق جاردەم كورسەتىلىپ، ولار تاراز قالاسىنداعى № 1 قالالىق اۋرۋحاناسىنا جاتقىزىلدى.

توتەنشە جاعداي 16 جەلتوقسان كۇنى ورىن العان. زارداپ شەككەن ساربازداردى تارازدىڭ №1 اۋرۋحاناسىنا جەتكىزدى.

ولاردىڭ اراسىندا 20 جاستاعى دىليۋك يۋريي مەن 19 جاستاعى اجەنوۆ امان باس سۇيەگىنىڭ اۋىر جانە ورتاشا دارەجەدەگى جاراقاتىن الىپ، بىردەن جانساقتاۋ بولىمىنە اۋىستىرىلعان.

سونداي-اق، تىزە بۋىندارى مەن اياق سيراقتارى زاقىمدالعان 20 جاستاعى باجەن يۋريي مەن 18 جاستاعى امانگەلدى دياسقا امبۋلاتورلىق ەم بەلگىلەنگەن.

اتالمىش وقيعانىڭ ۆيدەوسى جانسەرىك تۇرعىنبەكتىڭ Facebook پاراقشاسىنا جاريالاندى.